Alevi 14 - Mukanda Wa Zambi 1970

Kubemesa cha akwa musongo ukalu wa ha chikowa

¹ Mwene Zambi yalongesa Mose

² Shimbi jino hakutwala ku kubemesa cha mukwa musongo ukalu wa ha chikowa. Ha tangwa lize maakamwambulula ngwo, kanabeme, akamutwala kuli hako.

³ Mba hako makamutwala haze lia musumba ni kumutala. Nyi ngwe musongo hiwaya,

⁴ hako akalweza mutu yoze habema akanehe tujila aali abema hamwe ni mutondo sedru, ni muhipu uchila ngee, ni mafwo a chisapo.

⁵ Mba hako akahane maliji ha kushiha kajila umuwika ha chenga cha uma chize chili ni meya a ku shima.

⁶ Akanda kajila mukwo hamwe ni mutondo sedru, ni muhipu uchila, ni chisapo, ni kuyichubika mu manyinga ja kajila yoze hashiha.

⁷ Hako akasapwila manyinga waze hali mwe mutu yisuho shimbiali, mba makamuvuluka ngwenyi, habema. Mba makatusula kajila yoze wa mwono akaye kwenyi mu yambu.

⁸ Mwe mutu akakosa mahina jenyi, akatewula kambu jenyi jeswe, akasana, mba makabema. Mahasa kunjila mu musumba, alioze chamutamba kutwama haze lia zuwo lienyi lia makubu matangwa shimbiali.

⁹ Ha tangwa lia muchishimbiali akatewula nawa kambu jenyi, ni wevu wenyi, ni yikenyikenyi yenyi, ni wonawona weswe wa ha mujimba wenyi, akakosa mahina jenyi, akasana, mba makabema.

¹⁰ Ha tangwa lia muchinake akatwala makuji aali a panga ni chihwo a mwaka umuwika, keeshi kapalia, ni kilo jitatu ja wunga wakuchinga ni maji a olive, ni makumi atatu a sentilitro a maji a olive.

¹¹ Hako akatwala mwe mutu ni ye milambu ku chikolo cha zuwo lia Zambi lia makubu.

¹² Akanda kuji a panga umuwika hamwe ni e maji ni kuyihungisa ku meso ja Mwene Zambi, ni kuyilambula mulambu wa kulibemesa. Kuuli mulambu wa kuhilwisa ni kuwezela.

¹³ Akashihila mwe mwana panga kuma kwa chijila, kuze akushihila yimuna mumu ha milambu ya milonga ni ya kwocha. Chamutamba kulinga chino mumu mulambu wa kuhilwisa ni kuwezela uli ngwe mulambu wa milonga, uli wa mbala wa hako, uli wa chijila kuhiana.

¹⁴ Mwe hako akanda amwe manyinga a panga ni kwakomona ku twitwi lia chindume, ni ku munwe wa shina wa ku chindume wa ku kwoko, ni wa ku kulu lia mwe mutu yoze anabemesa.

¹⁵ Hako akanda amwe maji ni kwazujila mu kwoko lienyi lia chimeso,

¹⁶ ni kuchubika mo munwe wenyi wa ku kwoko lia chindume, ni kwasapwila yisuho shimbiali ku meso ja Mwene Zambi.

¹⁷ Maji waze maakasala mu kwoko lienyi, hako akaakomona ku songo lia twitwi lia chindume, ni ku munwe wa shina wa ku chindume wa ku kwoko ni wa ku kulu lia mutu yoze anabemesa, ha manyinga waze hakomona.

¹⁸ Maji waze maakasala mu kwoko lienyi, akaakwita ha mutwe wa mutu yoze. Chenacho hako chatamba kubemesa mutu yoze.

¹⁹ Hohene hako malambula mulambu wa milonga ni kumanununa Shimbi ya kubemesa. Mabwamuze mashiha chimuna cha mulambu wa kwocha,

²⁰ ni kuulambula hamwe ni mulambu wa mbuto ha chilumbilo. Chenacho hako chatamba kumanununa Shimbi ya kubemesa, mba mwe mutu mabema.

²¹ Nyi ngwe mutu kali chiswale, keshi kwenyi ni yimuna yino, akaneha musamba wa kuji a panga umuwika ha mulambu wenyi wa kuhilwisa ni kuwezela, ni kuuhungisa ku meso ja Mwene Zambi. Akanda nawa kilo ya wunga yimuwika yakuchinga ni maji a olive, mumu ha mulambu wa mbuto, ni makumi atatu a sentilitro ya maji.

²² Akaneha nawa tutele aali hanji ana a membe aali, umuwika mumu ha mulambu wa milonga, mukwo mumu ha mulambu wa kwocha.

²³ Ha tangwa lia muchinake lia kulibemesa chenyi akayineha kuli hako ku chikolo cha zuwo lia Zambi lia makubu.

²⁴ Hako akanda mwana panga ni maji, akayihungisa, mumu kuuli mulambu wa kuhungisa ku meso ja Mwene Zambi.

²⁵ Akashiha mwana panga ni kwanda amwe manyinga ni kwakomona ku twitwi lia chindume lia mwe mutu, ni ku munwe wa shina wa ku chindume wa ku kwoko ni wa ku kulu.

²⁶ Hako akazujila amwe maji mu kwoko lienyi lia chimeso

²⁷ ni kwaasapwila yisuho shimbiali ku meso ja Mwene Zambi, ni munwe wenyi wa chindume.

²⁸ Akanda amwe maji waze maakasala mu kwoko lienyi, akaakomona ku songo lia twitwi lia chindume ni ha munwe wa shina wa ku chindume wa ku kwoko ni wa ku kulu.

²⁹ Maji waze maakasala mu kwoko lienyi, akaakwita ku mutwe wa mwe mutu yoze. Chenacho hako chatamba kumanununa Shimbi ya kulibemesa.

³⁰ Mba akalambule umwe wa kuli tutele hanji membe

³¹ ngwe mulambu wa milonga, mukwo mulambu wa kwocha, hamwe ni mulambu wa mbuto. Chenacho hako chatamba kumanununa Shimbi ya kubemesa mutu yoze.

³² Yino yili Shimbi ya chiswale yoze wayiza musongo ukalu wa ha chikowa nyi kahashile kulambula mulambu uze anamwambe mumu ha kulibemesa.

Mbundu mu mazuwo

³³ Mwene Zambi yalongesa Mose ni Arone

³⁴ Shimbi jino hakutwala ku mazuwo waze haakwachika mbundu. (Chaatamba kufunga Shimbi jino muze maakanjila mu chifuchi cha Kanana, chize Mwene Zambi makaaha ngwe chihinga cho.)

³⁵ Mweswawo makamona ngwenyi, mbundu hiyakwachika mu zuwo lienyi, chatamba kuya ni kulweza hako.

³⁶ Neye makahana Shimbi ha kuchiza yuma yeswe ya mu zuwo shimbu kanda achiya ni kutala ye mbundu. Nyi ka, yuma yeswe ya mu zuwo muyikabwa ya luchisa. Mba makaya

³⁷ ni kutala ye mbundu. Nyi ngwe mbundu muyibwa mu mbango ya zuwo ngwe mafwo a matamba, hanji ngwe yichila, nawa nyi hiyanjila mu mbango,

³⁸ akatuhuka mu zuwo ni kuliajila matangwa shimbiali.

³⁹ Ha tangwa lia muchishimbiali akahiluka ni kulitala nawa. Nyi ngwe mbundu hiyatanda,

⁴⁰ akahana Shimbi akachize mawe waze ali ni mbundu, ni kwambila kumwe kuma kwa luchisa, haze lia limbo.

⁴¹ Mba chamutamba kulweza atu ha kukola mambango ja zuwo, mavu eswe a ku mambango akaambila kumwe kuma kwa luchisa, haze lia limbo.

⁴² Akanda mawe akwo akasalakane mawe waze achijile, ni kushinguna nawa c mambango.

⁴³ Nyi ngwe mbundu hiyasoloka nawa mu zuwo lize hachiza mawe ni kusalakanyisa ho eka, ni hashinguna mo nawa,

⁴⁴ hako akaya ni kutala. Nyi ngwe hiyatanda, zuwo kuliabiha.

⁴⁵ Chatamba kulibuzula lieswe, ni e mawe jalio, ni ye mitondo yalio, ni e mavu jalio waze akulishingwina, ni kuyitwala kumwe kuma kwa luchisa, haze lia limbo.

⁴⁶ Mweswawo makanjila mu lie zuwo muze halijilika, makabwa wa luchisa ndoo ku chingoloshi.

⁴⁷ Mweswawo makabomba mo hanji makanjila mo chamutamba kukosa mahina jenyi.

⁴⁸ Muze hako makaya ni kutala lie zuwo nyi makamona ngwe mbundu kuyasolokele mo nawa, chamutamba kwamba ngwenyi, zuwo linabeme, mumu mbundu yeswe hayichiza.

⁴⁹ Ha kubemesa zuwo, akanda tujila aali, ni yimwe yihanda ya mutondo sedru, ni muhipu uchila ngee, ni mafwo a chisapo.

⁵⁰ Akashihila umwe kajila ha chenga cha uma chize chili ni meya a ku shima.

⁵¹ Akanda mutondo sedru, ni chisapwilo, ni muhipu uchila, hamwe ni kajila yoze wa mwono, akayichubike mu manyinga a kajila yoze hashiha ni mu meya waze ali mu chenga. Akasapwila ku zuwo yisuho shimbiali.

⁵² Chenacho hako chatamba kubemesa zuwo ni manyinga a kajila, ni meya a ku shima, ni kajila wa mwono, ni mutondo sedru, ni chisapwilo, ni muhipu uchila.

⁵³ Mba chamutamba kwecha mwe kajila wa mwono haze lia limbo hanga akahumuke, akaye mu yambu. Chenacho makamanununa Shimbi ja kubemesa zuwo, mba mulikabema.

⁵⁴ Jino jili Shimbi hakutwala ku musongo ukalu wa ha chikowa;

^55-56 ni yijingo, ni yizuwu, ni yibeka, ni Shimbi hakutwala ku mbundu ya ha mazalo ni ya mu mazuwo.

⁵⁷ Shimbi jino jinalumbununa muze chimwe Chuma hichabwa cha luchisa hanji chibema.