Alevi 12 - Mukanda Wa Zambi 1970

Kulibemesa cha pwo muze hasema mwana

¹ Mwene Zambi yamwaha Mose Shimbi jikwo jino

² mumu hali Aisraele. Nyi pwo wasema mwana wa lunga, pwo yoze mabwa wa luchisa matangwa shimbiali, ngwe chize akubwa muze akuya ku zuwo likwo.

³ Ha tangwa lia muchinake mwe mwana akamupwisa ngalami.

⁴ Pwo makabwa nawa wa luchisa matangwa akwo makumi atatu ni atatu, mba makabema. Kanda akwata ku Chuma cha chijila, chibwe kunjila muma mwa chijila, ndoo matangwa jenyi a kulibemesa haamanunuka.

⁵ Alioze nyi ngwe wasema mwana wa pwo, pwo yoze makabwa wa luchisa matangwa kumi ni awana, ngwe chize te akubwa muze akuya ku zuwo likwo. Makabwa nawa wa luchisa matangwa akwo makumi asambano ni asambano, mba makabema.

⁶ Muze matangwa jenyi a kulibemesa haamanunuka, chibwe mwana kali wa lunga chibwe wa pwo, akamutwala kuli hako ku chikolo cha zuwo lia Zambi lia makubu, hamwe ni mwana panga wa mwaka umuwika, mumu ha mulambu wa kwocha, ni mwana liembe hanji katele, mumu ha mulambu wa milonga.

⁷ Hako chatamba kukunjika mulambu wa pwo yoze kuli Mwene Zambi ni kukosa luchisa wenyi, mba makabema. Chenacho makalinga mwe pwo muze hasema mwana.

⁸ Nyi ngwe mwe pwo kahashile kulanda mwana panga, chamutamba kutwala tutele aali hanji ana a membe aali, umwe wa ha mulambu wa kwocha, mukwo wa ha mulambu wa milonga. Hako makamufukila milonga yenyi, mba makabema.