Alevi 11 - Mukanda Wa Zambi 1970

Tushitu waze atu maahasa kulia

¹ Mwene Zambi yaaha Mose ni Arone Shimbi jikwo jino,

² mumu hali Aisraele. Munuhasa kulia tushitu eswe

³ waze akubikula, waze akwete sende ja kubula.

^4-6 Alioze kunwahashile kulia kamelu, ni sele, ni mbalu. Kaali a luchisa mumu chibwe kaakubikula alioze keeshi sende ja kubula.

⁷ Kanda nulia ngulu. Kali wa luchisa, mumu chibwe kali ni sende ja kubula alioze keshi kubikula.

⁸ Kanda nulia tushitu wano chibwe kwakwata muze haafwa, mumu kaali a luchisa.

⁹ Munuhasa kulia yishi eswe waze akwete yihehe ni mahalo.

¹⁰ Alioze tushitu a mu meya waze keeshi yihehe ni mahalo, kanda nwalia.

¹¹ Kaali a luchisa. Kunwahashile kwalia chibwe kwakwata muze haafwa.

¹² Kunwahashile kulia kashitu watwama mu meya keshi yihehe ni mahalo.

^13-19 Kunwahashile kulia tujila wano: tela, ni chikungulu, ni cheselele, ni sasa, ni ngungu, ni hulayula, ni chikwakwalo, ni otrishe, ni chozo, ni chitwanjimbu, ni chitokola, ni toji, ni katovi, ni mbwembweto, ni kafukufuku.

²⁰ Tututu eswe waze akwete mapulwa kaali a luchisa,

²¹ shina waze akutumbwoka.

²² Munuhasa kulia wano: makumbi, ni mapasu, ni tuzeze.

²³ Alioze tututu akwo eswe akepe akepe waze akwete mapulwa ni waze akukalala kaali a luchisa.

^24-28 Tushitu wano, nyi haafwa, mweswe maakwata ku mijimba yo, kumabwa wa luchisa ndoo ku chingoloshi: kashitu yoze ukwete sende kujishi kubula, ni kashitu wa molu awana yoze ukwete yala. Mweswawo mambata mijimba yo ya kufwa chamutamba kukosa mahina jenyi, hindu kumabwa wa luchisa ndoo ku chingoloshi. Alioze kashitu yoze ukwete sende ja kubula ni wakubikula, munuhasa kukwata.

^29-30 Tushitu wano: mukondo, ni kolo, ni tumbi, ni kasulu, kaali a luchisa.

³¹ Mweswe yoze maakwata, chibwe a mwono chibwe hafwa, kumabwa wa luchisa ndoo ku chingoloshi.

³² Nyi ngwe mujimba wo wa kufwa wakwata ku chimwe Chuma, kuchabwa cha luchisa, chino chatwala ku yuma ya mitondo, ni mahina, ni malambu hanji tuku, kuheshi Chuma chibwe yeswe milimo. Chatamba kuyichubika mu meya, alioze muyibwa ya luchisa ndoo ku chingoloshi.

³³ Nyi ngwe mijimba yo yaholokela mu ndeho (yimbia) ya uma, Chuma cheswe chilimo kuchabwa cha luchisa, ni ye ndeho chatamba kuyishiha.

³⁴ Yakulia yize yinatela kulia, nyi yasapukila meya a mu ndeho yize, muyibwa ya luchisa, hanji yuma ya kunwa nyi yakwata ku ndeho yize kuyabwa ya luchisa.

³⁵ Kashitu yoze wafwa, nyi waholokela ha chimwe Chuma, Chuma chize kuchabwa cha luchisa. Jiko lia uma chatamba kulibuba,

³⁶ alioze shima lia meya mulisala libema, alioze Chuma cheswe chize muchikwata ku mujimba wa kashitu yoze walifwila muchibwa cha luchisa.

³⁷ Nyi kashitu yoze waholokela ha mbuto yize nunambe kukuwa, mbuto yize muyisala yibema.

³⁸ Alioze nyi haamwangina meya ha mbuto mba kashitu walifwila, waholokela ho, mbuto yize muyibwa ya luchisa.

³⁹ Nyi ngwe kashitu yoze munuhasa kulia walifwila, yoze makwata ku mujimba wenyi kumabwa wa luchisa ndoo ku chingoloshi.

⁴⁰ Nyi umwe walia yifwo ya mwe kashitu yoze walifwila, chamutamba kukosa mahina jenyi, hindu kumabwa wa luchisa ndoo ku chingoloshi. Yoze mambata kashitu yoze walifwila, chatamba kukosa mahina jenyi, hindu kumabwa wa luchisa ndoo ku chingoloshi.

⁴¹ Kanda nulia tushitu akepe akepe waze akwenda hashi,

⁴² yoze wakukalala, hanji wakwenda ni yilio yiwana, hanji yoze ukwete moko anji anji.

⁴³ Kanda nulipwisa akwa luchisa ha kulia tushitu ngwe wano.

⁴⁴ Yami nguli Mwene Zambi, Zambi yenu, ni yenu chanutamba kubwa minangi, mumu yami nguli munangi.

⁴⁵ Yami nguli Mwene Zambi, nanuchijile mu chifuchi cha Egiptu hanga ngubwe Zambi yenu. Chanutamba kubwa minangi, mumu yami nguli munangi.

⁴⁶ Kashika, jino je Shimbi hakutwala kuli tushitu ni tujila, eswe waze atwama mu meya, ni eswe waze atwama hashi.

⁴⁷ Nukahandununa hakachi ka tushitu a luchisa ni waze abema, ha kushishika tushitu waze munuhasa kulia ni waze kunwahashile kulia.