Alevi 10 - Mukanda Wa Zambi 1970

Nadabe ni Abihu yaavulumuna

¹ Ana ja Arone a malunga, Nadabe ni Abihu, mutu ni mutu yanda chula chenyi cha kwokwela kahia, yasa ho makala a kahia ni yuma ya vumba libema, yaayilambula kuli Mwene Zambi. Alioze kahia kaze te hi kachijila ko, mumu Mwene Zambi kaambile ko.

² Susumuku Mwene Zambi yatuma kahia, yikoocha eswe aali, yaafwa ku meso ja Mwene Zambi.

³ Henaho Mose yambila Arone ngwenyi: “Chino chechize Mwene Zambi ambile ngwenyi: ‘Eswe waze akungulingila chaatamba kulemesa ulinange wami. Mungukasolola uhenya wami kuli atu jami.’ ” Alioze Arone yahola kwenyi kuluu.

⁴ Mba Mose yatambika Mishaele ni Elzafane, ana a malunga ja Uziele, natu ya Arone, yaamba ngwenyi: “Tweyenu nuchize asonyi jenu waze haafwa ku zuwo lia Zambi lia chijila, nwatwale haze lia musumba.”

⁵ No yeeza, yaakwata ku mahina, yaatwala haze lia musumba, ngwe chize Mose aalwezele.

⁶ Mba Mose yambila Arone ni ana jenyi a malunga Eleazare ni Itamare ngwenyi: “Kanda nuvundula kambu jenu hanji kuchanuna mahina jenu ha kusoloka ngwe hinwafwisa. Nyi nwachilinga kumunufwa, ni Mwene Zambi kumevwila Chikungulwila cheswe ufwatulo. Alioze usoko wenu Aisraele eswe maahasa kulila kufwa chino cha kahia ka Mwene Zambi.

⁷ Kanda nukatuka ku chikolo cha zuwo lia Zambi. Nyi ka, kumunufwa, mumu hananuwayisa ni maji a Mwene Zambi.” No yaalinga ngwe chize Mose aalwezele.

Shimbi hakutwala kuli mahako

⁸ Mwene Zambi yambila Arone ngwenyi:

⁹ “Yena ni ana je a malunga kanda nunjila mu zuwo lia kuwayila muze hinwanwa vinyu hanji kunwa chikwo chisasu. Nyi ka, kumunufwa. Shimbi yino chanutamba kuyifunga mu vungu lienu ku yisemuko yeswe.

¹⁰ Chanutamba kuhandununa mukachi ka yuma ya Zambi ni yuma yenu, mukachi ka yize ya chijila ni yize ya luchisa.

¹¹ Chanutamba kulongesa Aisraele Shimbi jeswe jize nahanyine kuli Mose.”

¹² Mba Mose yambila Arone ni ana jenyi a malunga waze asalile ho, Eleazare ni Itamare, ngwenyi: “Andenu mulambu wa mbuto uze wasala ku mulambu wa Mwene Zambi, nulinge mbolo yize kuyishi yitumbo, nuyilila ku sali lia chilumbilo, mumu uli mulambu wa chijila kuhiana.

¹³ Nuulila muma mwa chijila. Chili Chihanda cha yena ni ana je a malunga cha yakulia yize haalambula kuli Mwene Zambi. Chenacho Mwene Zambi angulwezele.

¹⁴ Alioze yenu ni majiko jenu munuhasa kulia bambo lize haahungisa ni kulu lize haalambula. Chatamba kuyilia muma mwa chijila. Milambu yino ya Aisraele yili chitundo cha yenu ni ana jenu ya ku milambu ya kulivwa ni Zambi.

¹⁵ Nehenu kulu ni bambo ayihungise ku meso ja Mwene Zambi. Kuuli mulambu wa kuhungisa. Yuma yino yili ya yenu ni ana jenu ndoo ku miaka yeswe, ngwe chize Mwene Zambi ambile.”

¹⁶ Mose yahula hakutwala ku kuji a pembe mumu ha mulambu wa milonga, Muze hevwa ngwo haulambula kulu, yatenukina Eleazare ni Itamare nikwamba ngwenyi:

¹⁷ “Mumu yika kunwayile mulambu wa milonga muma mwa chijila? Kuuli mulambu wa chijila kuhiana. Mwene Zambi hananwehe wo ha kuchiza milonga ya Chikungulwila.

¹⁸ Muze kunwanehene manyinga mu zuwo lia Zambi, kachi te mulambu nunakaulila haze, ngwe chize nanwambile.”

¹⁹ Mba Arone yakumbulula ngwenyi: “Nyi ngwe musono halianga mulambu wa milonga, kachi ngunawaha ku meso ja Mwene Zambi, nyi? Atu kaalambulanga mulambu wo wa kwocha, hindu yuma yibwa haha hiyanguwana.”

²⁰ Muze Mose hachivwa, yahwima mbunge.