Alevi 1 - Mukanda Wa Zambi 1970

Milambu ya kwocha

¹ Mwene Zambi, mu zuwo lienyi lia makubu, yatambika Mose, yamwaha Shimbi

² hanga Aisraele ajifunge muze maalambula milambu yo. Muze umwe makalambula chimwe chimuna, akalambula ngombe hanji panga hanji pembe.

³ Nyi makalambula umwe wa ku ngombe jenyi mulambu wa kwocha, chatamba kwanda kuji yoze keshi kapalia. Chatamba kumutwala ku chikolo cha zuwo lia Zambi lia makubu, mba Mwene Zambi amutayize.

⁴ Mutu akasa kwoko lienyi ha mutwe wa chimuna, mba muchibwa mulambu wa kuchiza shili yenyi.

⁵ Akashihila ko kuji a ngombe, mba mahako, ana ja Arone a malunga, akakunjike e manyinga kuli Mwene Zambi ni kwasapwila ku mbango jeswe jiwana ja chilumbilo chize chili ku chikolo cha zuwo.

⁶ Mba akazuwe che chimuna ni kuchibatwola yipinji yipinji,

⁷ akatengeka kunyi ha chilumbilo ni kuwika kahia,

⁸ akocha ye yifwo, ni mutwe, ni maji, yikaweme.

⁹ Mutu yoze maneha mulambu akakosa yifwo ya mu jimo ni molu ni meya, mwe hako akocha mulambu weswe ha chilumbilo akaweme. Lupembo wa mulambu uno wa yakulia kakuwahila kuli Mwene Zambi.

¹⁰ Nyi mutu makalambula umwe wa ku yimuna yenyi, panga hanji pembe, chatamba kubwa shina kuji yoze keshi kapalia.

¹¹ Akamushihila ku sali lia chilumbilo ku norde, mahako akasapwila manyinga ku mbango jeswe jiwana ja chilumbilo.

¹² Mba mwe mutu akabatwole tumba tumba ja yifwo, ni hako akasa je tumba ha jiko, ni mutwe, ni maji.

¹³ Mwe mutu akakosa yifwo ya mu jimo ni molu, mba hako makakunjika we mulambu kuli Mwene Zambi ni kuwocha weswe ha chilumbilo ukaweme. Lupembo wa mulambu uno wa yakulia, kakuwahila kuli Mwene Zambi.

¹⁴ Nyi mwe mutu makalambula mulambu wa kwocha wa kajila, chatamba kubwa katele hanji liembe.

¹⁵ Mwe hako akalambula kajila ha chilumbilo, akamutukula mukonga ni kwocha mutwe ha chilumbilo, ukaweme. Manyinga akahichila ku lumbu lia chilumbilo

¹⁶ Chisakwilia ni yize yili ho, akayimbila ku sali lia chilumbilo, ku chichichila cha uto, ku chivumbuko.

¹⁷ Akamubula ni kumusanganyika, mba mamwocha mweswe ha chilumbilo, akaweme. Lupembo wa mulambu uno wa ya kulia kakuwahila kuli Mwene Zambi.