Akwa Kuyula 9 - Mukanda Wa Zambi 1970

Abimeleke

¹ Abimeleke mwana wa Gideone, yaya ku limbo lia Shekeme, kuze te kwatwama usoko wa naye eswe, yahanjika no,

² yahula malunga ja Shekeme ngwenyi: “Chika nunazange? Anuyule kuli ana ja Gideone eswe makumi shimbiali, nyi hanji kuli mutu umuwika? Nyingikenu ngwenu, yami ni yenu tuli mujingwa umuwika.”

³ Usoko wa naye yaahanjika ni malunga a ku Shekeme hakutwala kuli Abimeleke. No eswe yaamutayiza mumu te kaali usoko wo.

⁴ Yaamwaha Abimeleke mbongo ja prata makumi shimbiali ja ku zuwo lia Bale wa Usendo. Ni mbongo jize yafweta najo yingulungulu, atu amokmoko waze amukawile.

⁵ Yaya ku zuwo lia tato ku Ofra, yashiha ayayo ni ana akwo makumi shimbiali, ana ja Gideone, ha liwe. Alioze Jotame, mwana wa kasulasongo yaswama, kamushihile ko.

⁶ Mba malunga a ku Shekeme ni ku Betmilo yaakunguluka, yaaya ku mutondo wa chijila wa shene ku Shekeme. Kwenako apwishile Abimeleke mwanangana.

⁷ Muze Jotame hachivwa, yakanduka ha mulundu wa Gerizimo, yamana ho, yakololoka kuli ayo ngwenyi: “Yenu malunga a ku Shekeme, ngubanjikenu, ni Zambi anwivwe!

⁸ Limwe tangwa mitondo yiikunguluka ni kutongola mwanangana. Yiyambila mutondo wa olive ngwo: ‘Bwako mwanangana wetu.’

⁹ Alioze mutondo wa olive yiukumbulula ngwenyi: ‘Kuma, nguhichike maji jami akulemesa no mazambi ni atu, hanga nguye ni kuyula mitondo, nyi?

¹⁰ Mba mitondo yiyambila mutondo mukuyu ngwo: Tweya yena hanga ubwe mwanangana wetu.’

¹¹ Alioze mukuyu yiukumbulula ngwenyi: ‘Kuma, nguhichike mihuko yami yibema yiyema nguye ni kuyula mitondo, nyi?’

¹² Hohene mitondo yiyambila mutondo vinyu ngwo: ‘Tweya yena ubwe mwanangana wetu.’

¹³ Alioze mutondo vinyu yiwamba ngwenyi: ‘Kuma, nguhichike vinyu yami yize yakuwahisa mazambi ni atu, ngwize ni kuyula mitondo, nyi?’

¹⁴ Mba mitondo yeswe yiyambila mutondo mingonga ngwo: ‘Tweya ubwe mwanangana wetu.’

¹⁵ We mungonga yiukumbulula ngwenyi: ‘Nyi nunazange ngubwe mwanangana wenu, tweyenu nuswame mu chizulie chami. Nyi kunwazangile, kahia mukatuhuka mu mingonga yami mu kocha mitondo yeswe ya ku Libano.’ ”

¹⁶ Jotame yaweza ho ngwenyi: “Kuma, hinwabwa ni mbunge yimuwika ni kupwisa Abimeleke mwanangana wenu nyi? Kuma, chino che kulemesa Gideone, ni akwa jiko lienyi, nikulita ni yitanga yenyi yibema, nyi?

¹⁷ Iwulukenu ngwenu, tata jita anwashilile. Yakunjika mwono wenyi mu utoji hanga anulamwine kuli Amidiane.

¹⁸ Alioze musono hinwatewuluka ni kulimika ni akwa jiko lia tata. Hinwashiha ana jenyi a malunga 70 ha limwe liwe. Hinwapwisa Abimeleke, mwana wa ndungo yenyi wa pwo, mwanangana wa Shekeme mumu kali usoko wenu.

¹⁹ Chize nwalinga musono kuli Gideone ni akwa jiko lienyi, nyi nwachilinga ni mbunge yimuwika, wahililenu hamwe ni Abimeleke neye hamwe ni yenu.

²⁰ Alioze nyi ka, kahia kakakatuke kuli Abimeleke ni kwocha malunga a ku Shekeme ni a ku Betmilo. Kahia kakakatuke kuli malunga a ku Shekeme ni a ku Betmilo ni kwocha Abimeleke.”

²¹ Mba Jotame yachina mumu yevwila yayo Abimeleke woma. Yaya ku limbo lia Bere, yatwama ko.

²² Abimeleke yayula Aisraele miaka yitatu.

²³ Mba Mwene Zambi yasa kole hakachi ka Abimeleke ni malunga a ku Shekeme, no yaalimika nenyi.

²⁴ Yuma yino yabwile hanga amwese lamba Abimeleke ni malunga a ku Shekeme, waze amushinjikile ni kushiha ana ja Gideone makumi shimbiali a malunga.

²⁵ Malunga a ku Shekeme yaasweka amwe malunga ha milundu ni kulimika ni Abimeleke, yaatambwola yuma kuli eswe waze abaliekele ko. Atu yaalweza Abimeleke sango jize.

²⁶ Mba Gale mwana wa Ebede yeza ku Shekeme hamwe ni ayayo ni anakwo. Malunga a ku Shekeme yaalikunda nenyi.

²⁷ Ayo eswe yaaya ku minda yo ya vinyu, yaahela vinyu, yaayikama, yaalinga chiwanyino, yaanjila mu zuwo lia zambi yo, yaahaha, yaanwanwa, yaatuka Abimeleke.

²⁸ Gale yamba ngwenyi: “Yetu malunga a ku Shekeme kuchi twabwa? Mumu yika tunalingila Abimeleke? Kali ngwe iya? Mwana wa Gideone Zebule kali mwata wa tujita twenyi, alioze mumu yika yetu mutumulingila? Tulemesenu kashakulu ka vungu lietu Hamore.

²⁹ Nyi te atu wano kaabwile kama mu chiyulo chami, kachi munguchiza Abimeleke! Kachi mungumwamba ngwami: ‘Lulieka tujita twe ase jita!’ ”

³⁰ Zebule, mwata wa limbo, muze hevwa maliji ja Gale yevwa ufwatulo,

³¹ Yatuma tunganda kuli Abimeleke ku Aruma ngwenyi: “Gale mwana wa Ebede, ni ayayo ni anakwo a ku Shekeme heeza, haavundula akwa limbo alimike ni yena.

³² Kashika haliabwila, tuhukenu ni malunga waze nuli no, nwize ufuku nwajikinyine mu minda,

³³ Nukalimeneka, nukase jita ni akwa limbo. Muze Gale ni tujita twenyi meeza ni kulimika ni yenu, nwalinge cheswe munuzanga!”

³⁴ Chenacho Abimileke ni tujita twenyi eswe akatukile ha ufuku, yaajikinyina ku limbo ni mbunga jiwana.

³⁵ Muze Abimeleke ni tujita twenyi haamona Gale kanatuhuka mu limbo ni kumana ku chikolo, yaakatuka kuze te anajikinyina.

³⁶ Gale yaamona, yambila Zebule ngwenyi: “Tala! Malunga anapalumuka ha milundu!” Zebule yakumbulula ngwenyi: “Ka, yili yizulie ya milundu.”

³⁷ Gale yamba nawa ngwenyi: “Tala! Malunga anapalumuka ha mulundu, mbunga yimuwika kaanakatuka ka mutondo shene wa kutaha nawo, kaanejila mu jila!”

³⁸ Mba Zebule yamba ngwenyi: “Haliabwila kulisamba che chilihi? Yena wambile ngwe, mumu yika mutulingila Abimeleke. Kaali malunga waze watukile. Haliabwila tuhuka wase no jita!”

³⁹ Gale yatuhuka ni malunga a ku Shekeme ni kwasa jita ni Abimeleke.

⁴⁰ Alioze Gale yachina, Abimeleke yamuhanga. Atu anji alemanyine, ndoo ni ku chikolo cha limbo.

⁴¹ Abimeleke yatwama mu Aruma, ni Zebule yahuma Gale ni ayayo ni anakwo, yaatuhwisa mu Shekeme, kaahashile ko kutwama mo nawa.

⁴² Muze hikwacha Abimeleke yevwa ngwo, atu a ku Shekeme hiimaaya ku minda.

⁴³ Mba yanda tujita twenyi, yaahandununa mu mbunga jitatu, yaaswama mu minda ni kushimbwila. Muze haamona atu kaanatuhwoka mu limbo, yaatuhuka kuze te anaswame ni kwashiha.

⁴⁴ Muze Abimeleke ni ye mbunga yenyi te anazomboka ni kujikinyina ku chikolo cha limbo, mbunga jikwo jaali yaasa jita ni atu mu minda, yaashiha eswe.

⁴⁵ Yikubwa jita yinene tangwa heswe lia muundu. Abimeleke yakumba akwa limbo, yaanongesa eswe katota mukele.

⁴⁶ Muze miata a mu limbo lia kukoleka lia Shekeme haachivwa, yaachinyina mu zuwo likolo lia Bale wa Usendo.

⁴⁷ Atu yaalweza Abimeleke ngwo, eswe haalikungulwila mu zuwo.

⁴⁸ Mba Abimeleke hamwe ni tujita twenyi yaakanduka ha mulundu wa Zalmone. Yanda njimbu, yachaya lukunyi, yalitwika ye ha chipaya chenyi. Yambila tujita twenyi, no yaachilinga nikawashi.

⁴⁹ Chenacho mutu mweswe achayile lukunyi, yaakaula Abimeleke yaajilumbika hanga oche zuwo likolo, yaaliwika kahia. Atu eswe abwile mo yaafwa, malunga ni mapwo, ngwe kanunu.

⁵⁰ Mba Abimeleke yaya ku limbo lia Tebeze, yaliseleka, yalikumba,

⁵¹ Mwabwile zuwo lisuku likolo. Atu eswe a mu limbo, miata ni malunga ni mapwo, yaachinyina mo. Yaaliajila, yaanyina ha fulumba.

⁵² Muze Abimeleke heza ni kwasa jita, yakundama ku chikolo cha lie zuwo ni kuliocha kahia.

⁵³ Alioze umwe pwo yambila liwe lia kutwa nalio wunga, yiliholokela ha mutwe wa Abimeleke, yilimuwonda.

⁵⁴ Neye yatambika mukweze wenyi, yoze te wakumumbachila yuma yenyi ya jita, yamwamba ngwenyi: “Tomona mukwale we, ungushihe. Chazangile ambe ngwo: ‘Pwo wamushiha.’ ” Chenacho mukweze wenyi amumanunwine ni mukwale, yafwa.

⁵⁵ Muze Aisraele haamona ngwo, Abimeleke hafwa, eswe yaahilwoka ku mahio.

⁵⁶ Chenacho Zambi afwetesele Abimeleke ha chitela chize alingile kuli tato muze ashihile ana ja tato a malunga makumi shimbiali.

⁵⁷ Chikwo nawa, Zambi yamwesa lamba malunga a ku Shekeme mumu ha ungulungulu wo, nikulita ni Shingo lize aashingile kuli Jotame, mwana wa Gideone.