Akwa Kuyula 8 - Mukanda Wa Zambi 1970

Aisraele yaakumba Amidiane liakulu

¹ Hohene malunga ja Efraime yaambila Gideone ni kumutenukina kuhiana ngwo: “Mumu yika kuwatutambikile muze wayile ni kwasa jita ni Amidiane? Chuma chino watulinga kuchi chinalumbunuka?”

² Gideone yaakumbulula ngwenyi: “Chuma chize yami nalinga chili chikepe, chize nwalinga yenu chili chinene. Chize yenu malunga ja Efraime nwalinga chinahiana chize alinga akwa jiko liami eswe.

³ Mwene Zambi hakunjika mu moko jenu mianangana aali ja Amidiane Orebe ni Zebe. Chize yami nalinga chili chikepe, alioze chize nwalinga yenu chili chinene chahiana.” Muze Gideone hamba chino, hikaatenukine ko nawa.

⁴ Gideone ni tujita twenyi 300 yaaheta ku Yordau, yaazauka. Te haahonga kuhiana, hindu yaakaula akwa kole jo.

⁵ Muze haaheta ku Sukote, yambila malunga a mu limbo ngwenyi: “Nalemba mwane, ahenu kama tujita mbolo. Kaanahonge chinji, mumu tunahange Zeba ni Zalumuna, mianangana ja Amidiane.”

⁶ Alioze miata ja Sukote yaamba ngwo: “Yenu kanda nuchikwata Zeba ni Zalumuna, mumu yika mutuhanyina mbolo kuli tujita twenu?”

⁷ Gideone ngwenyi: “Kuheshi Chuma! Muze Mwene Zambi hakunjika Zeba ni Zalumuna mu moko jami, nyingikenu ngwenu, mungukanuhowahowa ni mbimbo ni mikalale ya mu puya!”

⁸ Gideone yaya ku limbo lia Penuele, yahanjika maliji waze ene kuli atu jalio. No yaakumbulula ngwe akwa Sukote.

⁹ Mba yaambila ngwenyi: “Muze mungukahiluka ni uhwimino, mungukabuzula zuwo lienu lisuku lia kukoleka.”

¹⁰ Zeba ni Zalumuna te kaali ku Karkore ni tujita two. Ku mbunga ya tujita two twa mu puya yikusala lume 15,000; mumu 120,000 te haashiha kulu.

¹¹ Gideone yaya jila ya ku njiza ya ku puya, ku chivumbuko cha Noba ni Jogbeha, yaatungumuna.

¹² Zeba ni Zalumuna, mianangana aali ja Midiane yaachina, alioze Gideone yaahanga, yaakwata, tujita eswe yaamwangana ni mwongo.

¹³ Muze te Gideone anakatuka ku jita ku Here,

¹⁴ yakwata umwe mukweze wa ku Sukote, yamuhula yihula yeka ni yeka. Mwe mukweze yasonekena Gideone majina ja miata a mu Sukote makumi shimbiali ni shimbiali.

¹⁵ Mba Gideone yaya kuli malunga a mu Sukote, yaamba ngwenyi: “Nunewuluka muze nwalitunyine kungukwasa, nyi? Yinwamba ngwenu, kutwahashile kuhana yakulia kuli tujita twe waze te haahonga mumu kanda nuchikwata Zeba ni Zalumuna. Talenu wano, hinaakwata!”

¹⁶ Mba yanda mingonga ni mikalale, yaahowahowa miata ja mu Sukote, yaamwesa lamba.

¹⁷ Yabuzala nawa zuwo lisuku lia kukoleka lia ku Penuele, yashiha malunga a mu limbo.

¹⁸ Mba Gideone yahula Zeba ni Zalumuna ngwenyi: “Atu waze nwashihile ku Tabore, te kuchi abwa?” Yaakumbulula ngwo: “Te kaalifwa ni yena, eswe te kaali ngwe ana ja mwanangana.”

¹⁹ Gideone ngwenyi: “Atu waze te kaali ayaya, yetu eswe mama umuwika. Nyi te kunwaashihile kama, kachi ni yami chichi kunushiha.”

²⁰ Mba yambila mwanenyi mutangu Jetere ngwenyi: “Katuka waashihe!” Alioze mwe mukweze katomwene ko mukwale wenyi. Yevwa woma, mumu te uchili kanuke.

²¹ Hohene Zeba ni Zalumuna yaambila Gideone ngwo: “Katuka tuhu utushihe yena mwene. Lunga chatamba kulinga milimo ya ulunga.” Gideone yaashiha, mba yanda yijingo ya oru yize yaabwile ha kota ya tumelu two.

²² Hohene Aisraele yaambila Gideone ngwo: “Bwako mwanangana wetu, yena ni vungu lie, mumu hiwatulamwina kuli Amidiane.”

²³ Gideone yaakumbulula ngwenyi: “Yami chichi kubwa mwanangana wenu, chibwe mwanami wa lunga. Mwene Zambi mwe mabwa mwanangana wenu.”

²⁴ Alioze yaweza ho ngwenyi: “Ngunanwichi chimwe Chuma. Mutu mweswe wa kuli yenu angunehene yingeliengelie yize atambwile mu jita.” (Amidiane, te kaabwa ngwe atu akwo waze akutwama mu puya, te kaakuzanga yingeliengelie.)

²⁵ Atu yaakumbulula ngwo: “Chibema, tunakwehe yo.” Yaala hina hashi, mba mutu mweswe yasa ho yingeliengelie yize atambwile mu jita.

²⁶ Yingeliengelie ya oru yize Gideone atambwile, kulema chayo kilograme makumi aali, chinge ni yibenya, ni malenge, ni mahina a ufungo a mianangana ja Amidiane, ni yijingo ya ha kota ja tumelu two,

²⁷ Gideone yalinga nayo hamba, yamusa mu limbo lienyi, mu Ofra. Aisraele eswe yeehuka Zambi, yaaya ko ni kukombelela mwe hamba. Yichibwa muheto kuli Gideone ni kuli akwa jiko lienyi.

²⁸ Chenacho Aisraele akumbile Amidiane. Amidiane hikaabwile ko nawa ni tachi ja kwasa jita ni Aisraele. Chifuchi yichibwa ni uhwimino miaka makumi awana, ndoo ni ku kufwa cha Gideone.

Kufwa cha Gideone

²⁹ Gideone, mwe Jerubale, yahiluka ni kutwama ku zuwo lienyi mwene.

³⁰ Te kali ni ana a malunga makumi shimbiali, mumu wabwile ni mapwo anji,

³¹ Yabwa nawa ni pwo mukwo wa ku Shekeme; yasema nenyi mwana wa lunga, yamuluka jina ngwenyi, Abimeleke.

³² Gideone, mwana wa Joashe, yafwa ni uwahililo mu ushinakaji wenyi, yaamufunda mu fuka lia tato Joashe, ku Ofra, mu limbo lia jimo lia Abiezere.

³³ Muze Gideone hafwa, Aisraele yaavulumuna nawa Zambi ni kukombelela mahamba Bale. Yaalinga Bale wa Usendo, zambi yo.

³⁴ Kaalingilile ko nawa Mwene Zambi, Zambi yo, yoze waalamwinyine kuli akwa kole jo eswe waze te anaajingilika.

³⁵ Kaalwezele ko vumbi akwa jiko lia Gideone, chibwe te haalingila yibema.