Akwa Kuyula 7 - Mukanda Wa Zambi 1970

Gideone yakumba Amidiane

¹ Limwe tangwa Gideone, mwe Jerubale, ni tujita twenyi eswe yaalimeneka ni kujika musumba wo ku shima lia Harode. Musumba wa Amidiane yiubwa ku norde yo ku mulundu wa More.

² Mwene Zambi yambila Gideone ngwenyi: “Chichi kunukwasa kukumba Amidiane mumu tujita waze uli no oka naye. Nyi ka, maanyonga ngwo, twakumba ku tachi ja yetwene. Nyi chocho, keechi kungulemesa.

³ Lweza tujita ngwe: ‘Mweswawo Unevu woma ahiluke ku mahienyi; yetu mutusala hano ha mulundu wa Gileade.’ ” Mba 22,000 yaahiluka ku mahio, alioze 10,000 yaasala.

⁴ Mwene Zambi yambila nawa Gideone ngwenyi: “Hindu tujita waze uli no oka naye. Alonge ku mbumbulu ya lwiji, kwenako mungwahandunwina. Nyi mungwamba ngwami, yono mwe maya ni yena, mwe maya. Nyi mungwamba ngwami, yono kechi kuya ni yena, mwenawo masala.”

⁵ Chenacho Gideone atwalile e tujita, yaalonga ku mbumbulu ya lwiji. Mwene Zambi yamwamba ngwenyi: “Handununa waze akunwa meya ngwe chize akunwa kawa kuli waze maanwa meya ni kuzondama ha makungunwa jo.”

⁶ Waze anwine meya ni moko yaabwa kulakaji jitatu akwo eswe yaanwa ngwe chize akunwa kawa.

⁷ Mwene Zambi yambila Gideone ngwenyi: “Mungunulamwina ni kutukwasa kukumba Amidiane ni tujita 300 wano anwanga meya ni moko jo. Lweza waze akwo asala ho, ahiluke ku mahio.”

⁸ Chenacho Gideone ahilwishile Aisraele akwo ku mahio, yasala lume ni 300. No yaanda yakulia yeswe hamwe ni yitavwi. Musumba wa Midiane yiubwa ku mwanda mu chikulo.

⁹ Ha ufuku uzewene Mwene Zambi yambila Gideone ngwenyi: “Katukenu nwase jita ni Amidiane; hinanwahoo.

¹⁰ Alioze nyi woma Unevu, Palumuka ko hamwe ni kavumbi ke Pura.

¹¹ Munwivwa yuma yize maahanjeka, mba munutakama nwase no jita.” Hohene Gideone ni kavumbi kenyi Pura yaapalumuka ku Sesa lia musumba wa akwa kole jo.

¹² Amidiane, ni Aamaleke, ni mavungu a ku puya te haalizaza mu chikulo, kwoka cho ngwe makumbi. Yaabwa ni tumelu anene, anji, kwoka cho ngwe masekeseke a ku mbumbulu ya kalunga lwiji.

¹³ Muze Gideone haheta, yevwa umwe mutu te kanawila mukwo chilota. Ngwenyi: “Nalota chilota chino, henaha kambolo ka masa kanalangumukina ku musumba wetu, kabuba ku zuwo. Lie zuwo yilibuzuka yilitala mwilu.”

¹⁴ Sepa lienyi yamukumbulula ngwenyi: “Awo uli mukwale wa Gideone Kaisraele, mwana wa Joashe! Hi Chuma chikwo ko! Zambi hatukunjika, yetu ni tujita twetu eswe, mu moko jenyi.”

¹⁵ Muze Gideone hevwa kwawula cha chilota chize ni we ulumbunwiso wacho, yafukama, yawayila Zambi. Mba yahiluka ku musumba wa Aisraele, yaamba ngwenyi: “Katukenu! Mwene Zambi hakunjika tujita twa Amidiane mu moko jetu!”

¹⁶ Yahandununa tujita twenyi 300 mu mbunga jitatu, yahana chitavwi kuli mutu ni mutu, ni mulondo, ni soka lia kahia mukachi

¹⁷ Yaamba ngwenyi: “Muze yami munguheta ku sesa lia musumba, nungutala yami, nungwimbulula.

¹⁸ Muze yami ni mbunga yami mutuhumuna yitavwi, mba ni yenu nawa munuhumuna niyenu, nujingilike musumba. Munukolema ngwenu: ‘Mumu hali Mwene Zambi ni mumu hali Gideone, wooo!’ ”

¹⁹ Mba Gideone ni tujita twenyi 100 yaakundama ku musumba, te hakamwihi ni ha muchima ufuku, te maachisalakanyisa tufunga atangu. Mba yeemba yitavwi ni kubuzwola milondo yize te anakwata.

²⁰ Mbunga jize jikwo jaali no yaalinga nawa chizechene. Ayo eswe yaakwata masoka jo ku moko a chimeso, ni yitavwi yo ku moko a chindume nikukololoka ngwo: “Mukwale mumu hali Mwene Zambi ni mumu hali Gideone, wooo!”

²¹ Mutu mweswe yamana homa lienyi ku sesa lia musumba, ni tujita twa akwa kole eswe yaachina ni kutetwoka.

²² Muze te tujita twa Gideone anembi yitavwi yo, Mwene Zambi yakalisa mbunge ja akwa kole alimike ene ni ene ni mikwale yo. Yaachinyina ni kutalikisa ku Zaretane ndoo ku Bete Shita, ni ndoo ku limbo lia Abele Mehola hehi ni Tabata.

²³ Hohene tujita twa Gideone yaatambieka malunga a ku mavungu ja Naftali, ni Ashere, ni ku mbunga yeswe yaali ya Manase, yaakaula Amidiane.

²⁴ Gideone yatuma tunganda ku chifuchi cheswe cha milundu ya Efraime, ngwenyi: “Palumukenu, twase jita ni Amidiane. Talenu kanawa lwiji Yordau ni njiji jikwo jeswe ndoo ku Betebara, Amidiane kanda azauka.” Yaatambieka malunga ja Efraime. No yaafunga lwiji Yordau ni njiji jikwo jeswe ndoo ku Betebara.

²⁵ Yaakwata mianangana aali ja Amidiane, Orebe ni Zebe. Yaashihila Orebe ku liwe lia Orebe, yaashihila Zebe ku ukamino wa vinyu wa Zebe. Yaahanga lume Amidiane, yaatwalila Gideone mitwe ya Orebe ni Zebe, mwe Gideone te kali ku chivumbuko cha Yordau.