Akwa Kuyula 6 - Mukanda Wa Zambi 1970

Gideone

¹ Aisraele yaavulumuna Mwene Zambi nawa, neye yaakunjika kuli Amidiane miaka shimbiali.

² Amidiane yaabwa ni tachi kuhiana Aisraele. Kashika Aisraele yaaswama mu mena ni mu yivwenge mu milundu ni kulilamwina.

³ Muze Aisraele akuwile yimwe mbuto, Amidiane ni Aamaleke ni mavungu a mu puya yeeza ni kwasa no jita.

⁴ Te kaakujika musumba wo mu chifuchi, mba moonona mbuto ja Aisraele eswe ndoo ku Gaza ku sude. Te keeshi kuhichika ko Chuma nichimwe; mapanga, ni ngombe, ni yimbulu jo, yaayaya no eswe.

⁵ Yeezaza hamwe ni ngombe ni mazuwo jo a makubu, kwoka cho ngwe makumbi. Ayo, hamwe ni tumelu two, niumwe hakachi ko wahashile kwaalula. Yeezaza ni kulitanda mu chifuchi.

⁶ Aisraele yiijahwa ni kulimika no.

⁷ Mba Aisraele yaakololoka kuli Mwene Zambi hanga aakwase ni kulimika ni Amidiane,

⁸ Mwene Zambi yaatumina umwe mukwa munanyi yoze waalwezele ngwenyi, Mwene Zambi, Zambi ya Aisraele, kanambe ngwenyi: “Yami nanutuhwishile mu undungo mu chifuchi cha Egiptu.

⁹ Nanulamwinyine kuli akwa Egiptu ni kuli atu waze te akulimika ni yenu mu chifuchi chino. Yingwahuma ku meso jenu, yingunwaha chifuchi cho.

¹⁰ Yingunwamba ngwami, yami nguli Mwene Zambi. Zambi yenu, kanda nuwayila mazambi ja Amore, a mu chifuchi chize nunatwama. Alioze kunwangubanjikile ko.”

¹¹ Mba kanganda ka Mwene Zambi yeza mu chihunda cha Ofra, yatwama mushi lia mutondo shene wa Joashe, wa ku jimo lia Abiezere. Mwanenyi Gideone te kanazungula mbuto ku tenga ma ukamino, hanga Amidiane keechi kumumona.

¹² Kanganda ka Mwene Zambi yamusolokela, yamwamba ngwenyi: “Mwene Zambi kali hamwe ni yena, uli mukwa tachi ni hamu!”

¹³ Gideone yamukumbulula ngwenyi: “Mwata, nyi Mwene Zambi kali hamwe ni yetu, mumu yika yuma yino yeswe yinatuwane? Yikomokeso yeswe yize te atata akutulweza hakutwala kuli Mwene Zambi, ngwe chize atutuhwishile mu chifuchi cha Egiptu, yilihi yo? Mwene Zambi hatumbila, hatukunjika mu moko ja Amidiane.”

¹⁴ Mwene Zambi yatewuluka kuli iye, ngwenyi: “Yako ni tachi je jeswe, ukalamwine Aisraele ku moko ja Amidiane. Yami mwene ngunakutumu.”

¹⁵ Gideone ngwenyi: “Alioze ngwe kuchi munguhasa kulamwina Aisraele? Akwa jimo liami kaali akepe kuhiana mu vungu lia Manase, ni yami nguli mulelu kuhiana mu jiko lietu.”

¹⁶ Mwene Zambi ngwenyi: “Unahase kuchilinga mumu yami mungukukwasa. Muuhasa kufwenya Amidiane hashi lume, ngwe mutu umuwika unafwenye.”

¹⁷ Gideone ngwenyi: “Nyi hiwanguvwila vumbi, ngulweze chimwe chilayi chize muchingulweza ngwo, yena uli mwe Mwene Zambi.

¹⁸ Ngunakulweze ngwami, kanda ukatuka ndoo hinakunehena umwe mulambu wa yakulia.” Mwene Zambi ngwenyi: “Mungushimbwila ndoo hiwahiluka.”

¹⁹ Mba Gideone yanjila mu zuwo lienyi, yateleka musamba wa pembe, yanda wunga wa tiriku kilograme kumi, uze kuushi yitumbo, yocha mbolo. Yasa yifwo mu chisoka ni mutato mu mulondo, yayitwala kuli kanganda ka Mwene Zambi, yoze te uli mushi lia mutondo shene, yamwaha yo.

²⁰ Mwe kanganda yamwamba ngwenyi: “Sako yifwo ni mbolo ha liwe lino, zujila ho mutato.” Gideone yalinga Chenacho.

²¹ Mba kanganda ka Mwene Zambi yolola lukanda yoze abwile nenyi ku kwoko, songo yilikwata ha yifwo ni ha mbolo yize te kuyishi yitumbo. Kahia yiikafwindangana ha liwe, yifwo ni mbolo yiiwema yeswe upu. Hohene kanganda ka Mwene Zambi yajimuka ku meso jenyi.

²² Mba Gideone yanyingika ngwenyi, kuma te kanganda ka Mwene Zambi amona, yahanjika ni kuchikima ngwenyi: “Lwangu mama! Mwene Zambi, hinamona kanganda ke meso ni meso!”

²³ Alioze Mwene Zambi yamwamba ngwenyi: “Hwima mbunge, kanda wivwa woma. Kuuchi kufwa.”

²⁴ Gideone yatungila ko Mwene Zambi chilumbilo, yachiluka jina ngwenyi: “Mwene Zambi Uhwimino Wetu.” (Kwe chili ndoo ni musono ku Ofra, chihunda cha Abiezere.)

²⁵ Ha ufuku uzewene Mwene Zambi yambila Gideone ngwenyi: “Anda kuji a ngombe wa muchaali wa tatenu, yoze wa miaka shimbiali. Buzula chilumbilo cha tatenu cha Bale, batwola miyombo ya mahamba Ashera yize yili ko.

²⁶ Utungile Mwene Zambi ye chilumbilo chibema homa hano hakolo. Mba muwanda ngombe, umwoche mweswe wa muundu, ubwe mulambu wa kwocha. Uwoche ha kunyi ja miyombo yize mubatwola.”

²⁷ Gideone yanda ngamba jenyi kumi, yalinga ngwe chize Mwene Zambi hamwamba. Yevwila woma akwa jiko lienyi, ni akwa limbo, kuchilinga ha mwalwa, kashika yachilinga ufuku.

²⁸ Muze akwa limbo haahinduka chichamene, yaamona chilumbilo cha Bale haachibuzula, ni miyombo ya Ashera haayibatwola, ni kuji a ngombe wa muchaali hamwocha ha chilumbilo chize te hasalakanyisa ho.

²⁹ Yaalihula hula ngwo: “Iya walinga chino?” Muze haashindakenya yaanyingika ngwo, Gideone, mwana wa Joashe, mwe wachilinga.

³⁰ Mba yaambila Joashe ngwo: “Neha mwane kuno, hanga tumushihe! Mumu habuzula chilumbilo cha Bale ni habatwola miyombo ya Ashera yize te yiliko.”

³¹ Alioze Joashe yambila eswe waze akungulukile ni kulimika nenyi ngwenyi: “Kuma yenu nunahakwila Bale, nyi? Nunazange kumukwasa, nyi? Mweswawo mamuhakwila chatamba kumushiha shimbu kanda kucha. Nyi Bale kali umwe Zambi, mwechenu alihakwile iye mwene, mumu chili chilumbilo chenyi chize habuzula.”

³² Chize ku tangwa lize Gideone yaamuluka jina ngwo: Jerubale, mumu Joashe yamba ngwenyi: “Mwechenu, Bale alihakwile iye mwene, chili chilumbilo chenyi chize habuzula.”

³³ Hohene Amidiane eswe, ni Aamaleke, ni mavungu a ku puya yaalikungulula, yaazauka Yordau, yaasa musumba wo ku chikulo cha Jezrele.

³⁴ Mwiku wa Mwene Zambi yiuyula Gideone, neye yahumuna chitavwi ni kutambika malunga eswe a mu jimo lia Abiezere anukaule.

³⁵ Yatuma tunganda mu yifuchi yeswe yaali ya Manase ni kutambika malunga eswe amukaule. Yatuma nawa tunganda ku mavungu ja Ashere, ni Zabulone, ni Naftali. No nawa yeeza, yaalichinga hamwe nenyi.

³⁶ Gideone yambila Zambi ngwenyi: “Unambe ngwe, muulamwina Aisraele ni kwoko liami.

³⁷ Chinabeme ngunase ngona ja panga hashi, haze twakufujila tiriku. Ha chichamene mume ukabwe lume ha je ngona, alioze hashi hakabwe ha chau, mba mungunyingika ngwami, kuma muulamwina Aisraele ni kwoko liami.”

³⁸ Yichibwa Chenacho. Muze Gideone alimenekene, yakama je ngona ja panga; musenge yiuzala ni mume.

³⁹ Mba Gideone yambila Zambi ngwenyi: “Kanda ungutenukina mwane, nguchihanjike kama nawa chisuho chimuwika. Nalemba mwane, ngutayize ngucheseke nawa je ngona. Chisuho chino ngona jibwe jumu, hashi haule ni mume.”

⁴⁰ Ha ufuku uzewene Zambi yalinga Chenacho. Ha chichamene je ngona yijuma chau, alioze hashi yihaula ni mume.