Akwa Kuyula 5 - Mukanda Wa Zambi 1970

Mwaso wa Debora ni Barake

¹ Ha tangwa lize Debora ni Barake mwana wa Abinoame yeemba mwaso uno ngwo:

² “Halisenu Mwene Zambi! Aisraele yaasa mbunge ni kwasa jita; atu yaachitayiza ni chiseke.

³ Banjikenu, yenu mianangana! Kanyamenu, yenu akwa kuyula! Mungwimba miaso ni chisaji kuli Mwene Zambi, Zambi ya Aisraele.

⁴ Mwene Zambi, muze wahichikile milundu ya Seire, muze watuhukile mu chifuchi cha Edome, hashi yihanyika, ni vula mwilu yanoka. Ewa, malelwa yaanokesa vula.

⁵ Milundu yiinyika ku meso ja Mwene Zambi ya Sinai, ku meso ja Mwene Zambi, Zambi ya Aisraele.

⁶ Ha matangwa ja Shamgare mwana wa Anate, ha matangwa ja Jaele, atu keendanganyine ko nawa mu chifuchi mu majila anene, shina mu tumajila tukepe.

⁷ Aisraele yaahona miata ndoo ni muze yena Debora hiwaasoloka, yiwiza ngwe naye ya Aisraele.

⁸ Muze Aisraele atongwele mazambi aha, mu chifuchi yimubwa jita. Mukachi ka tujita 40,000, yaawana mo kama umwe unambata lukebwe hanji kunga, nyi?

⁹ Mbunge yami yili hamwe ni miata ja tujita twa Aisraele, hamwe ni atu waze atayijile kuya mu jita. Halisenu Mwene Zambi!

¹⁰ Chambululenu, yenu nwakwenda ha yimbulu atoma, yenu nwakutwama ha makubu ni yenu waze nwakwendangana kweswako.

¹¹ Banjikenu! Atu waze ali ni chizungozungo ku mashima ja meya kaanambulula kukumba cha Mwene Zambi, kukumba cha Aisraele! Mba atu ja Mwene Zambi yaakatuka mu membo jo, yaapalumuka ha milundu.

¹² Likoleleze Debora, tetekela! Tetekela! Imba mwaso! Tetekela! Yako kulutwe, Barake, mwana wa Abinoame, twala funge je!

¹³ Mba akwa kushishika yaapalumuka; atu ja Mwene Zambi yeeza kuli iye, haalilulika kulu ha kwasa jita.

¹⁴ Yaakatuka ku Efraime, yaapalumuka ku chikulo, kunyima lia vungu lia Benjamine ni tujita two. Miata ja tujita yaakatuka ku Makire, yaapalumuka ha mulundu. Tuvumbi two yaakatuka ku Zabulone, no yaapalumuka.

¹⁵ Miata ja Isakare yeeza hamwe ni Debora; Ewa, Aisraele yeeza ni Barake nawa, yaamukaula mu chikulo. Alioze vungu lia Rubene yaalihandununa; te kaanayambashana ha kwiza.

¹⁶ Mumu yika asalile kunyima ni mapanga? Ha kubanjika tufunga twa mapanga muze anatambika yendo yo, nyi? Ewa, vungu lia Rubene te haalihandununa; te haanayambashama ha kwiza.

¹⁷ Vungu lia Gade yaasala ku chivumbuko cha Yordau, vungu lia Dane yaasala ku maulungu. Vungu lia Ashere yaasala ku mbumbulu ya kalunga lwiji; kwenako asalile.

¹⁸ Alioze Azabulone ni Anaftali yaakunjika mwono wo ku utoji wa kufwa mu jita.

¹⁹ Ku Tanake, ku mbumbulu ya lwiji Megido, mianangana yeeza ni kwasa jita; miangana ja Akanana yaasa jita, alioze mbongo ja prata kaajibubile ko.

²⁰ Matongonoshi kwilu yaasa jita; muze te anabalika kwilu, yaasa jita ni Sisera.

²¹ Muhuji ni mwavu wa ku Gishone, hiyaahungumuna. Munguya, munguya kulutwe ni tachi!

²² Tuvwalu yeeza fuji, yaazomboka ni lundunjila.

²³ Kanganda ka Mwene Zambi kanambe ngwenyi: ‘Shinga Meroze, shinga waze atwama mo, mumu keejile ko ni kukwasa Mwene Zambi, keejile ko ni kwasa jita hamwe nenyi.’

²⁴ Jaele pwo lia Hebere mukwa Kene; kawaha kuhiana mapwo eswe, kahiana kuwaha mapwo waze atwama mu mazuwo ja makubu.

²⁵ Sisera yeta meya, alioze yamwaha yamwa; yamunehena maji a yamwa mu chenga chibema.

²⁶ Jaele yakwata lumbambo mu kwoko lia chimeso, mweto ku kwoko lia chindume; yahata Sisera, yamuwonda mu mbalangwe; yamulia ndusu mu mutwe.

²⁷ Sisera yazondama ha makungunwa, yalimbuka, yabomba kuluu ku molu ja Jaele. Ku molu jenyi yazondama, yalimbuka; yalimbuka hashi, yafwa.

²⁸ Naye ya Sisera yanonokena ha kapenda, yalila mbimbi ngwenyi: ‘Kuchi mba temba lienyi linashimbula? Kuchi mba tuvwalu twenyi kaasolo kuhiluka?’

²⁹ Tuvumbi twenyi a mapwo, akwa mana, yaamukumbulula, chibwe iye mwene yalikumbulula ngwenyi:

³⁰ ‘Kota kaanatete yuma yize haabuba mu jita, mwana pwo umuwika, hanji aali, kuli mweswe kajita, ni mahina abema, mumu hali Sisera, ni mahina akulomba, akusa ha kota ya mwanangana wa pwo.’

³¹ Mwene Zambi, akwa kole je eswe akafwe chechize, alioze masepa je akabwe ngwe tangwa muze mulivumbuka ni tachi jalio.” Mba yikubwa uhwimino mu chifuchi miaka makumi awana.