Akwa Kuyula 4 - Mukanda Wa Zambi 1970

Debora ni Barake

¹ Muze Ehude hafwa, Aisraele yaavulumuna nawa Mwene Zambi.

² Mba Mwene Zambi yaakunjika mu moko ja Jabine, mwanangana wa Kanana yoze te watwama mu limbo lia Hazore. Mwata wa tujita twenyi jina lienyi Sisera, te katwama ku Haroshete wa Mavungu.

³ Jabine te kakwete matemba a jita a utale 900, yayula Aisraele ni uswii ni kwamwesa lamba miaka makumi aali. Mba Aisraele yaakololoka kuli Mwene Zambi aakwase.

⁴ Debora mukwa munanyi, pwo lia Lapidote, te ngaji wa Aisraele.

⁵ Te kakutwama mushi lia mungaji, hakachi ka membo ja Rama ni Betele, mu milundu ya Efraime, Aisraele yaaya ko ni kwabatwila.

⁶ Limwe tangwa Debora yatambika Barake, mwana wa Abinoame, wa ku limbo lia Kedeshe mu chifuchi cha Naftali, yamwamba ngwenyi: “Mwene Zambi, Zambi ya Aisraele, hakwamba ngwenyi: ‘Twala malunga 10,000 a ku mavungu ja Naftali ni Zabulone ku mulundu wa Tabore.

⁷ Yami munguneha Sisera, mwata wa tujita twa Jabine, ase jita ni yena ku lwiji Kishione. Makabwa ni matemba jenyi ni tujita twenyi, alioze mungukukwasa kumukumba.’ ”

⁸ Barake yakumbulula ngwenyi: “Nyi yena muuya hamwe ni yami, ni yami munguya; alioze nyi yena kuwayile, ni yami chichi kuya.”

⁹ Debora ngwenyi: “Chinalite, munguya hamwe ni yena. Alioze kuuchi kubwa ni lufuma wa kukumba, mumu Mwene Zambi makunjika Sisera mu moko ja mutwa pwo.” Chenacho Debora akatukile ku Kedeshe hamwe ni Barake.

¹⁰ Mba Barake yatambika mavungu ja Zabulone ni Naftali, malunga 10,000 yaamukaula. Debora neye yaya nenyi.

¹¹ Ha matangwa waze Hebere, mukwa Kene, yajika zuwo lienyi lia makubu ku Kedeshe, hehi ni mutondo shene ku Zananime. Te hanalihandununa ni akwa Kene akwo, vungu lia Hobabe, mwanakwo ya tato weno ya Mose.

¹² Muze Sisera hevwa ngwo, Barake hakanduka ha mulundu wa Tabore,

¹³ yatambika matemba jenyi 900 a utale ni tujita twenyi eswe, yaatuma katu ku Horoshete wa Mavungu ndoo ku lwiji Kishone.

¹⁴ Debora yambila Barake ngwenyi: “Yako! Mwene Zambi kali kulutwe lie! Musono hanukwasa kukumba Sisera.” Mba Barake yapalumuka ha mulundu wa Tabore hamwe ni tujita twenyi 10,000.

¹⁵ Muze Barake ni mbunga yenyi hasa jita, Mwene Zambi yabinjisa Sisera ni tujita ni matemba jenyi eswe. Sisera yasunuka ha temba, yachina hashi.

¹⁶ Barake yahanga matemba ni tujita ndoo ku Haroshete wa Mavungu. Tujita twa Sisera eswe yaashiha, kukwasalile niumwe.

¹⁷ Sisera yachinyina ku zuwo lia makubu lia Jaele, pwo lia Hebere mukwa Kene, mumu mwanangana Jabine wa ku Hazore te kakulivwa ni jiko lia Hebere.

¹⁸ Jaele yatuhuka ni kubatwiza Sisera, yamwamba ngwenyi: “Mwata, tweya kuno; njila mu zuwo liami. Kanda wivwa woma.” Yanda blankete, yamufuka.

¹⁹ Sisera yamwamba ngwenyi: “Nalemba, ngwehenu kama amwe meya ngunwe; pwila ngunevu.” Neye yajikula tuku ya yamwa, yamwaha anwe, yamufuka nawa.

²⁰ Mba Sisera yamwamba ngwenyi: “Manenu mu chikolo cha zuwo. Nyi umwe meza ni kunuhula ngwenyi: ‘Kuno kuli mutu, nyi?’ Nwamba ngwenu: ‘Keshiko.’ ”

²¹ Sisera te hijamuhwa, yaya mu tulo anji. Jaele yanda mweto ni lumbambo wa ku zuwo, yamukundama hakepe hakepe, yamutala, yamuhata lumbambo mu mbalangwe ndusu lume mu mavu.

²² Muze te Barake anafupu Sisera, Jaele yaya ni kumubatwiza, yamwamba ngwenyi: “Tweya kuno! Ngulweze yoze unafupu.” Yaaya hamuwika kuze te anabombo Sisera hashi, hanafu, ni lumbambo mu mbalangwe.

²³ Ha tangwa lize Zambi yakwasa Aisraele kukumba Jabine, mwanangana wa Kanana;

²⁴ yaasa nenyi jita ndoo yaakuwisa eswe.