Akwa Kuyula 3 - Mukanda Wa Zambi 1970

Mavungu waze asalile mu chifuchi

¹ Chenacho Mwene Zambi ahichikile amwe mavungu mu chifuchi hanga eseke Aisraele waze te kanda asa kama jita mu chifuchi cha Kanana.

² Chino yachilinga alongese yisemuko yeswe ya Aisraele hakutwala ku jita, chibichibi waze te kanda achasa kama jita.

³ Mu chifuchi yimusala membo atano ja Afilistia, ni membo eswe ja Akanana, ni Asidonia, ni Ahive waze te atwama ku milundu ya Libano, chize ku mulundu wa Bale Hermone ndoo ku jila ya Hamate mukachi ka milundu.

⁴ Yaabwa akwa kweseka Aisraele, hanga amone nyi moononoka ku Shimbi ja Mwene Zambi, jize Mose ahanyine kuli tushakulu two.

⁵ Chenacho Aisraele atwamine mukachi ka Akanana, ni Ahive, ni Ahite, ni Aamore, ni Aperize, ni Ajebuse.

⁶ Yaalimbachila mapwo ni yaawayila mazambi jo.

Otniele

⁷ Aisraele yaavulama Mwene Zambi yo, yaamuvulumuna ni kukombelela mahamba Bale ni Ashera.

⁸ Mba Mwene Zambi yeevwila Aisraele ufwatulo, yatayiza mwanangana Kushane Rishataime wa chifuchi cha Mesopotamia kwakumba. Neye yaayula miaka nake.

⁹ Mba Aisraele yaakololoka kuli Mwene Zambi, neye yaatumina mukwa kwatusula. Jina lienyi Otniele, mwana wa Kenaze mwanakwo ya Kaleba.

¹⁰ Mwiku wa Mwene Zambi yiumuhulumukina, mba yabwa mukwa kuyula Aisraele. Mwe Otniele yaya ku jita, Mwene Zambi yamukwasa kukumba mwanangana wa Mesopotamia.

¹¹ Mu chifuchi yimubwa uhwimino miaka makumi awana, mba Otniele yafwa.

Ehude

¹² Aisraele yaavulumuna nawa Mwene Zambi. Kashika Mwene Zambi yatakamisa mwanangana Eglone wa chifuchi cha Moabe alimike ni Aisraele.

¹³ Eglone yakunga Aamone ni Aamaleke; no yaakumba Aisraele, yaatambula Yeriku, limbo lia mingaji.

¹⁴ Aisraele yaalingila Eglone miaka kumi ni nake.

¹⁵ Mba Aisraele yaakololoka kuli Mwene Zambi, neye yaatumina mukwa kwatusula. Jina lienyi Ehude, mukwa kapipa, mwana wa Gera wa ku vungu lia Benjamine. Aisraele yaatuma Ehude ni milambu kuli mwanangana Eglone wa Moabe.

¹⁶ Ehude yalifulila mukwale, kusuhwa chawo ngwe sentimetro 50. Yaujichikila ha shina lia kulu lia utata mu mahina jenyi.

¹⁷ Mba yatwala milambu kuli mwanangana Eglone, te hatohwa kuhiana.

¹⁸ Muze Ehude halambula ye milambu, atu waze ayimbachile yaahilwisa ku mahio.

¹⁹ Alioze muze Ehude haheta hehi ni Gilgale, ku mawe a kwola, yahiluka kuli Eglone, yamwamba ngwenyi: “Mwanangana, nguli ni liji lia kunulweza ku tenga.” Kashika mwanangana yambila tuvumbi twenyi ngwenyi: “Tuhukenu, tusale ukawetu!” Eswe yaatuhuka.

²⁰ Muze te mwanangana anatwama ukawenyi mu chibatulo chenyi cha kwilu, mu chihuhumuke, Ehude yamukundama, yamwamba ngwenyi: “Nguli ni liji lia Mwene Zambi lia kukulweza.” Mwe mwanangana yakatuka.

²¹ Ehude yatomona mukwale ku shina lia kulu lienyi lia utata ni kwoko lienyi lia umama, yaunjisa mu jimo lia mwanangana.

²² Mukwale weswe yiunjila muchima, ni che chikundo cheswe, maji yaufuka helu. Kautomwene ko mu jimo lia mwanangana, yalibihishila mu molu.

²³ Ehude yatuhuka, yajila yajilo unyimenyime, yaayikasa lume mbe,

²⁴ yaya kwenyi. Tuvumbi yeeza, yaamona yajilo ya kukasa, yaanyonga ngwo, mwanangana hahambuluka.

²⁵ Yaashimbula shimbu lisuku. Muze haamona ngwo, kasolo kwazulula ku chajilo, yaanda sapi yaazulula ko. Yaamuwana hanabombo hashi, hafwa.

²⁶ Ehude yachina muze te ayo anachilaluka. Yahiana ha mawe a kwola, yachinyina ku Seira.

²⁷ Muze haheta ku milundu ya Efraime, yemba chitavwi ni kutambika malunga ja Aisraele aye ku jita. Yaatetekela, yaapalumuka ha mulundu.

²⁸ Yaamba ngwenyi: “Ngukaulenu! Mwene Zambi hatutayiza kukumba akwa kole jetu Amoabe.” Mba Aisraele yaapalumuka hamwe ni Ehude, yaakumba atu ha mwaa wa Yordau haze te Amoabe akuzawokela; kaatayijile ko mutu niumwe kuzauka.

²⁹ Ha tangwa lize yaashiha yitakame a tujita twa Moabe ngwe 10,000; niumwe wa kuli ayo kachinyine ko.

³⁰ Ha tangwa lize Aisraele yaakumba Amoabe; mu chifuchi yimubwa uhwimino miaka makumi nake.

Shamgare

³¹ Mukwa Kuyula Shamgare mwana wa Anate yamuhinga. Yalamwina Aisraele muze ashihile Afilistia 600 ni musongolwela wa kwendesa nawo ngombe.