Akwa Kuyula 2 - Mukanda Wa Zambi 1970

¹ Kanganda ka Mwene Zambi mwilu yakatuka ku limbo lia Gilgale, yaya ku limbo lia Bokime, yambila Aisraele ngwenyi: “Yami nanutuhwishile mu chifuchi cha Egiptu, yingununeha mu chifuchi chino nalakenyene tushakulu twenu. Yingwamba ngwami: ‘Chichi kashiha Usendo wami nichimwe ni yenu.

² Kuchatambile kulikata ni akwa chifuchi chino. Chatamba kubuzula yilumbilo yo.’ Alioze yenu kunwalingile ko chize nanwambile.

³ Kashika haliabwila ngunanulweze ngwami, chichi kahuma atu wano ku meso jenu. Kumaabwa akwa kole jenu, mazambi jo maakabwa muheto kuli yenu.”

⁴ Muze kanganda ka Mwene Zambi mwilu hamba chino, Aisraele eswe yaalila mbimbi.

⁵ Kashika homa haze yaaluka ho ngwo, Bokime, yaalambwila ko Mwene Zambi mulambu.

Kufwa cha Yoshua

⁶ Yoshua yamwanga Aisraele ku yifuchi yo, mutu mweswe yazuka chihinga cha chifuchi chenyi.

⁷ Ha matangwa eswe a mwono wa Yoshua, Aisraele te kaakulingila Mwene Zambi. Yaanyongonona nawa kumulingila ndoo ku kufwa cha miata waze amwene yuma yeswe yize Mwene Zambi alingilile Aisraele.

⁸ Yoshua mwana wa Nune, kavumbi ka Mwene Zambi, te habwa ni miaka 110, mba yafwa.

⁹ Yaamufunda mu chifuchi cha chihinga chenyi ku Timnate Sera, mu chifuchi cha milundu ya Efraime, ku sali lia norde lia mulundu wa Gashe.

¹⁰ Chisemuko chize cheswe yaafwa. Alioze chize chasulile ho yaavulama kwo Mwene Zambi ni yeswe yize alingilile Aisraele.

Israele yalitwamina kuwayila Mwene Zambi

¹¹ Mba Aisraele yaavulumuna Mwene Zambi, yaabutuka kukombelela mahamba Bale.

¹² Yaalitwamina kuwayila Mwene Zambi, Zambi ya tushakulu two, yoze waatuhwishile mu chifuchi cha Egiptu, yaabutuka kuwayila mazambi eka; mazambi ja atu waze te aajingilika, yaafukamina. Chenacho evwishile Mwene Zambi ufwatulo.

¹³ Yeehuka kuwayila Mwene Zambi, yaakombelela Bale ni Astarte.

¹⁴ Kashika Mwene Zambi yevwila Aisraele ufwatulo, yatayiza akwa kole jo kwabinjisa ni kububa yuma yo. Yatayiza eswe waze te aajingilika ni kwakumba, mba Aisraele hi kahashile ko nawa kulifunga ene.

¹⁵ Matangwa eswe muze te akuya mu jita Mwene Zambi yalimika no ngwe chize ambile. Yaamona lamba linji.

¹⁶ Mwabwamuze Mwene Zambi yaaha Aisraele akwa kwayula waze aakwashile kuli akwa kwabuba yuma yo.

¹⁷ Hindu Aisraele kaabanjikile ko kuli akwa kwayula. Yeehuka Mwene Zambi yo, yaawayila mazambi eka. Tushakulu two te kakwononoka ku Shimbi ja Mwene Zambi, alioze Chisemuko chize chaha kaalingile ko Chenacho.

¹⁸ Muze te Mwene Zambi akwaha Aisraele umwe mukwa kwayula, yamukwasa kwalamwina kuli akwa kole jo ha matangwa eswe a mwono wa mukwa kuyula yoze. Mwene Zambi yeevwila keke muze te akulinyenga mumu ha lamba lio.

¹⁹ Alioze muze mukwa kuyula mafwa, atu maahiluka ku yitanga yo yikulu, kuhiana yize te akulinga atato. Yaalingila ni kuwayila mazambi eka, keechele ko yitanga yo yibi.

²⁰ Kashika te Mwene Zambi wakweevwila ufwatulo nikwamba ngwenyi: “Chisemuko chino haashiha Usendo wami uze nakolesele ni tushakulu two. Mumu kaangwononokenene,

²¹ chichi kahuma nichimwe mavungu waze Yoshua ahichikile.

²² Mungweseka Aisraele ku tachi ja akwa kole jo nyi maafunga Shimbi jami, ngwe chize alingile tushakulu two.”

²³ Kashika Mwene Zambi yahichika mavungu waze mu chifuchi. Kakwashile ko Yoshua kwakumba, chibwe muze iye hafwa, kaahumine ko.