Akwa Kuyula 12 - Mukanda Wa Zambi 1970

Jefta ni Aefraime

¹ Malunga ja Efraime yaalulika jita, yaazauka Yordau ku Zafone, yaambila Jefta ngwo: “Mumu yika watangunukine njiza yiuya ni kwasa jita ni Aamone, kutusanyika ka tuye hamwe ni yena? Mutukwochela mu zuwo!”

² Alioze Jefta yaakumbulula ngwenyi: “Yami ni atu jami twalimikine chinji ni Aamone. Nanusanyikine, alioze kunwazangile ko kwiza ni kutulamwina.

³ Muze namwene ngwami, kunwejile ko, yingukunjika mwono wami, yingutangunuka njiza ni kwasa no jita, ni Mwene Zambi yangukwasa kwakumba. Nyi Chenacho mba kuchi nuneza ni kwasa jita ni yami?”

⁴ Mba Jefta yaakungulula malunga ja Gileade eswe, yasa jita ni malunga ja Efraime, yaakumba. (Aefraime te haamba ngwo: “Yenu Agileade mu Efraime ni mu Manase, nuli akwa kuchina kuli Aefraime!”)

⁵ Agileade yaatambula yau yeswe ya Yordau, nyi ka Aefraime maachina. Muze umwe Kaefraime meseka kuchina, mahula jila ha kubalika, Agileade maamuhula ngwo: “Uli Kaefraime nyi?” Nyi wamba ngwenyi: “Ka,”

⁶ maamwamba ngwo: “Amba ngwe, Shibolete.” Alioze iye mamba ngwenyi: “Sibolete,” mumu kaahashile ko kuliamba kanawa. Mba maamukwata ni kumushiha kuze kwene ku chau cha Yordau. Ha matangwa waze Agileade yaashiha Aefraime 42,000.

⁷ Jefta yayula Aisraele miaka yisambano, mba yafwa. Yaamufunda mu limbo lienyi mu Gileade.

Ibzana ni Elone, ni Abdone

⁸ Muze Jefta hafwa, Ibzane wa ku limbo lia Betleheme yayula Aisraele.

⁹ Yabwa ni ana a malunga makumi atatu ni ana a mapwo makumi atatu nawa Yahangisa ana jenyi a mapwo ku malo ku majiko eka, ni yambachila anenyi a malunga makumi atatu mapwo a hi majiko eka. Ibzane yayula Aisraele miaka shimbiali,

¹⁰ mba yafwa. Yaamufunda mu Betleheme.

¹¹ Muze Ibzane hafwa, Elone wa ku Zabulone yayula Aisraele miaka kumi

¹² mba yafwa. Yaamufunda mu Aijalone mu chifuchi cha Zabulone.

¹³ Muze Elone hafwa, Abdone mwana wa Hilele, wa ku limbo lia Piratone yasongwela Aisraele.

¹⁴ Yabwa ni ana a malunga makumi awana ni ajikulu makumi atatu a malunga, waze akwenda ha yimbulu makumi shimbiali. Abdone yayula Aisraele miaka nake,

¹⁵ mba yafwa. Yaamufunda mu Piratone mu chifuchi cha Efraime, mu chifuchi cha milundu ya Amaleke.