Akwa Kuyula 10 - Mukanda Wa Zambi 1970

Tola

¹ Muze Abimeleke hafwa, Tola mwana wa Puwa, mujikulu wa Dodo yeza ni kulamwina Aisraele. Te wa ku vungu lia Isakare, katwama mu limbo lia Shamire, mu chifuchi cha milundu ya Efraime.

² Yayula Aisraele miaka makumi aali ni yitatu, mba yafwa. Yaamufunda ku Shamire.

Jaire

³ Muze Tola hafwa, yikwiza Jaire wa ku chifuchi cha Gileade. Yayula Aisraele miaka makumi aali ni yaali.

⁴ Yabwa ni ana a malunga makumi atatu, waze te akwenda ha yimbulu makumi atatu. No yaabwa ni membo makumi atatu mu chifuchi cha Gileade, waze te akuvulwoka ngwo, membo ja Jaire.

⁵ Jaire yafwa, yaamufunda mu limbo lia Kamone.

Jefta

⁶ Aisraele yaavulumuna nawa Mwene Zambi, yaawayila mahamba Bale ni Astarte, ni mazambi ja Asiria, ni akwa Sidone, ni Amoabe, ni Aamone, ni Afilistia. Yeehuka Mwene Zambi yo, yaalitwantina kumuwayila.

⁷ Mba Mwene Zambi yevwila Aisraele ufwatulo, yashinjika Afilistia ni Aamone hanga aakumbe.

⁸ Yaahungumiona Aisraele, waze te atwama mu Gileade mu chifuchi cha Aamore ku chivumbuko cha lwiji Yordau, miaka kumi ni nake.

⁹ Aamone yaazauka Yordau ni kwasa jita ni vungu lia Yuda, ni Benjamine, ni Efraime. Aisraele yaamona lamba linji.

¹⁰ Hohene Aisraele yaakololoka kuli Mwene Zambi yo ngwo: “Hitunakuvulumuna, ni kukwehuka yena Zambi yetu, ni kukombelela Bale.”

¹¹ Mwene Zambi yaakumbulula ngwenyi: “Akwa Egiptu, ni Aamore, ni Aamone, ni Afilistia,

¹² ni akwa Sidone, ni Aamaleke, ni Amaone anubinjishile mwaka wali. Muze nwakololokele kuli yami, chanulamwinyine ko kuli ayo, nyi?

¹³ Hindu yinungwehuka, yinuwayila mazambi eka. Kashika hichahashile nawa kunulamwina.

¹⁴ Yeenu nukololoke kuli mazambi waze hinwatongola, anulamwine muze nuli mu lamba.”

¹⁵ Aisraele yaakumbulula Mwene Zambi ngwo: “Hitwavulumuna. Linga cheswe chize unazange, alioze tunalembe, tulamwine kama musono.”

¹⁶ Chenacho Aisraele ehukile mazambi ja yilambala, yaawayila Mwene Zambi yo. Neye yevwa chinyengo mumu ha lamba lia Aisraele.

¹⁷ Mba tujita twa Aamone yaalulika jita, yaajika musumba wo mu chifuchi cha Gileade. Tujita twa Aisraele no yaakunguluka, yaajika musumba wo ku Mizpa mu Gileade.

¹⁸ Kwenako miata ja mavungu ja Aisraele alihulilile ngwo: “Iya mabwa tetekeli ni kwasa jita ni Aamone? Yoze machilinga mabwa mwata wa yetu eswe muno mu Gileade.”