Akwa Kuyula 1 - Mukanda Wa Zambi 1970

Vungu lia Yuda ni Simeone yaakumba Adonibezeke

¹ Muze Yoshua hafwa, Aisraele yaahula Mwene Zambi ngwo: “Vungu lika maalianga kulimika ni Akanana?”

² Mwene Zambi yakumbulula ngwenyi: “Ayuda e maabwa atangu. Mumu hinaakunjika chifuchi.”

³ Ayuda yaambila Asimeone ngwo: “Tuyenu ku chifuchi chize hanatukunjika yetu, hanga tukase jita ni Akanana. Mba hanga tukaye nawa ku chifuchi chenu.” Chenacho Asimeone,

⁴ ni Ayuda ayile ni kwasa jita hamuwika. Mwene Zambi yaakwasa kukumba Akanana ni Aperize, yaakumba tujita 10,000 ku limbo lia Bezeke.

⁵ Yaawana ko Adonibezeke, yaasa nenyi jita.

⁶ Mwe Adonibezeke yachina, alioze yaamuhanga, yaamukwata, yaamubatwola minwe ya shina ya ku molu ni ku moko.

⁷ Adonibezeke yamba ngwenyi: “Mianangana makumi shimbiali nabatwile minwe yo ya shina ya ku moko ni ku molu, yaatongwona yifwenyufwenyu mushi lia mesa yami. Haliabwila ni yami nawa Zambi hangulinga cho.” Mba Ayuda ni Asimeone yaamutwala ku Yerusaleme. Kwenako afwilile.

Ayuda yaakumba Yerusaleme ni Hebrone

⁸ Ayuda yaasa jita ni Yerusaleme, yaakumba. Yaashiha, yoocha lie limbo.

⁹ Mwabwamuze yaaya ni kwasa jita ni Akanana waze te atwama mu chifuchi cha milundu, ni cha mindundena, ni mu puya ku sude.

¹⁰ Yaaya ni kwasa jita ni Akanana waze te atwama mu limbo lia Hebrone, lize te akuvuluka ngwo, Kiriate Arba. Kwenako akumbilile akwa jimo lia Sheshai, ni Ahimane, ni Talamai.

Otniele yakumba Debire

¹¹ Malunga ja Ayuda yaakatuka ko, yaaya ku limbo lia Debire, lize te akuvuluka ngwo, Kiriate Sefera, yaasa no jita.

¹² Umwe wa kuli ayo jina lienyi Kaleba, yamba ngwenyi: “Mweswawo makumba Kiriate Sefera, mungumwaha mwanami Aksa kubwa pwo lienyi.”

¹³ Otniele, mwana wa Kenaze mwanakwo ya Kaleba, yakumba lie limbo, mba Kaleba yamwaha mwanenyi Aksa kubwa pwo lienyi.

¹⁴ Ha tangwa lia umbachiso mwe Otniele yamwamba ngwenyi: “Mwite tata akwehe munda.” Neye yasunuka ha chimbulu chenyi. Kaleba yamuhula ngwenyi: “Yika unazange?”

¹⁵ Yamukumbulula ngwenyi: “Tata, ngwehenu mwane amwe mashima ja meya, mumu chifuchi chize hiwangwaha chili chumu.” Mba Kaleba yamwaha mashima a ku tunda ni ku mwanda.

Ayuda ni Abenjamine yaakumba akwa kole jo

¹⁶ Vungu lia tato wenu ya Mose, Akene, yakatuka hamwe ni Ayuda ku Yeriku, limbo lia mingaji, yaaya mu puya ku sude ya Arade mu Yuda. Kwenako atwamine mukachi ka Aamaleke.

¹⁷ Ayuda yaaya hamwe ni Asimeone, yaakumba Akanana waze te atwama mu limbo lia Zefate. Yaashinga lie limbo, yaalionona, yaaliluka jina ngwo: Horma.

^18-19 Mwene Zambi yakwasa Ayuda, mba yaakumba chifuchi cha milundu. Alioze kaakumbile ko Gaza, ni Ashkelone, ni Ekrone, hamwe ni Yifuchi yo ya kujingilika. Atu waze te atwama mu yana ya ku mbumbulu ya kalunga lwiji yaabwa ni matemba a utale, kashika Ayuda kaahashile ko kwakumba.

²⁰ Yoshua yahana Hebrone kuli Kaleba nikulita ni liji lia Mose. Neye yahuma majimo atatu a vungu lia Anake.

²¹ Alioze Abenjamine kaahumine ko Ajebuse, waze te atwama mu limbo lia Yerusaleme, kashika atwama mo ndoo ni musono.

Aefraime ni Amanase yaakumba Betele

^22-23 Aefraime ni Amanase yaaya ni kwasa jita ni limbo lia Betele, lize te akuvuluka ngwo, Luze. Mwene Zambi yaakwasa. Yaatuma ngendeshi ni kwendesa lie limbo.

²⁴ Yaamona umwe mutu te kaneza, yaamuhula ngwo: “Tulweze chize chatamba kunjila mu limbo, mba hanga tukuhichike ni mwono.”

²⁵ Neye yaalweza, mba Aefraime ni Amanase yaashiha atu eswe mu limbo, shina lume mutu yoze ni akwa jiko lienyi yaahichika ni mwono.

²⁶ Mwe lunga yoze yaya ku chifuchi cha Ahite, yatunga ko limbo, yaliluka ngwenyi, Luze; lili ni jina lize ndoo ni musono.

Atu waze Aisraele kaahumine ko

²⁷ Vungu lia Manase kahumine ko atu waze te atwama mu membo ja Bete Shana, ni Tanake, ni Dore, ni Ibleame, ni Megido, ni yihunda ya kusulangana. Akanana yaatwama lume kokwene.

²⁸ Muze Aisraele haatakama, yaapwisa Akanana ndungo jo, alioze kaahumine ko eswe.

²⁹ Aefraime kaahumine ko Akanana waze te atwama mu limbo lia Gezere, kashika Akanana atwama hamwe no.

³⁰ Azabulone kaahumine ko atu waze te atwama mu membo ja Kitrone ni Nahalale, Kashika Akanana atwama hamwe no, yaapwisa ndungo kuli Azabulone.

³¹ Aashere kaahumine ko atu waze te atwama mu membo ja Aku, ni Sidone, ni Alaba, ni Akziba, ni Helba, ni Afeke, ni Rehobo.

³² Aashere yaatwama mukachi ka Akanana mumu kaahumine ko.

³³ Anaftali kaahumine ko atu waze te atwama mu membo ja Bete Shemeshe ni Betanate. Anaftali yaatwama mukachi ka Akanana, alioze yaapwisa Akanana ndungo jo.

³⁴ Aamore yaashinjika Adane ku chifuchi cha milundu, kaatayijile ko kupalumuka ku chana.

³⁵ Aamore yaatwama lume mu membo ja Aijalone, ni Shalbime, ni ha mulundu wa Herese. Alioze Aefraime ni Amanase yaazeyesa, yaapwisa ndungo.

³⁶ Ku norde ya Sela, njiza ya Amore yiikaula jila ya Akrabime mukachi ka milundu.