3 Yoano 1 - Mukanda Wa Zambi 1970

Kumeneka

¹ Mukwetu Gayu, yami mukulwana wa Chikungulwila, ngunakusonekena. Nakukuzanga ni umwenemwene.

² Mukwetu, ngunalembe hanga ubwe kanawa mu yuma yeswe. Mujimba we uhinduke ngungungu ngwe chize uli ni tachi mu kuliendela ni Zambi.

³ Nawahilile kuhiana muze akwetu akwo ejile nikungwambulwila ngwo, wakukaula umwenemwene. Ni yami mwene ngunachinyingika ngwami, wakutwama kanawa nikulita ni umwenemwene.

⁴ Yuma yize yakunguwahisa kuhiana yenayi ayi: kwivwa ngwo, ana jami kaakulinga umwenemwene.

Umwenemwene wa Gayu

⁵ Mukwetu, wakulinga milimo ye ni kushishika kuli akwetu, chibwe kaali ngeji.

⁶ Haanachambulula mu Chikungulwila chino hakutwala ku zango lie. Kwasa akwenu kanawa muze maabwa mu jila ha kuya sali likwo, Chilinge ngwe chize Zambi mawahilila.

⁷ Mumu haanayi mu wenyi mu jina lia Kristu, kaatayijile ko waze hi akwa Kristu ko kwakwasa.

⁸ Kashika, yetu akwa Kristu chatutamba kuzumbula atu waze, hanga tubwe ni kulinga no hamuwika mu milimo yo ya kulongesa liji liamwenemwene.

Diotrefe ni Demetriu

⁹ Nasonekene kamukanda ku Chikungulwila, alioze Diotrefe, yoze wakuzanga kubwa mwata wa Chikungulwila, kakulituna liji lize ngunambe.

¹⁰ Kashika, muze mungukanuheta, mungukanwambulwila yeswe yize akulinga: maliji abi ni mahuza waze akuhanjika hali yetu, ni chize keshi kutambula atu ni akwetu waze akwizaza. Kakukinda chibwe waze akuzanga kwatambula ni kweseka kwatuhwisa mu Chikungulwila.

¹¹ Mukwetu, kanda wimbulula yibi, alioze wimbulula yibema. Yoze wakulinga yibema kali wa Zambi. Yoze wakulinga yibi kamwene ko Zambi.

¹² Atu eswe kaakuchichimieka Demetriu, maliji waze kaali amwenemwene. Yetu tunamuchichimieka. Unanyingika ngwe, yize twakwamba yili yamwenemwene.

Maliji akusula

¹³ Yuma yinji nguli nayo yakukwambulwila, alioze Chazangile kuyisoneka ni sonekeso ya ulombo.

¹⁴ Ngunase ko mbunge ngwami, hasala hakepe mba mungwiza ni kukutala, mba mutuhanjika meso ni meso.

¹⁵ Zambi akwehe uhwimino. Masepa je kaanakumeneka. Meneka masepa jetu ha majina.