2 Yoano 1 - Mukanda Wa Zambi 1970

Kumeneka

¹ Mama yoze atongwele Zambi ni ana jenyi, yami mukulwana wa Chikungulwila, ngunanusonekena: chamwenemwene nakunuzanga kuhiana. Hi yami wika ko nakunuzanga, alioze ni waze eswe ananyingika umwenemwene.

² Nakunuzanga mumu ha umwenemwene uze tuli nawo, uze mutukabwa nawo ndoo ku miaka yeswe.

³ Tata Zambi ni Yesu Kristu Mwanenyi, atulweze utu, ni atuvwile keke, ni atwehe uhwimino, hanga tuhase kutwama ni umwenemwene ni zango heswe.

Umwenemwene ni zango

⁴ Nawahililile kuhiana ha kumona ana je akwo kaali amwenemwene nikulita ni Shimbi yize atuhele Tata Zambi.

⁵ Chenacho mama, Shimbi yino ngunakusonekena hi yaha ko, alioze yize tuli nayo chize ku kabutu ngwo, tulizangenu.

⁶ Nyi tuli ni zango lize, chatutamba kufunga Shimbi ja Zambi. Shimbi yize atuhele chize ku kabutu yino ngwo, chanutamba kulizanga.

⁷ Akwa kupianguka anji haanamwangana hano hashi, keeshi kutayiza ngwo, Yesu Kristu haneza hano hashi, hanalumuka mutu. Mutu ngwe yoze, kali mukwa kupiangula, kali mukwa kole wa Kristu.

⁸ Litalenu kanawa hanga kunuchi kafulwa chawana cha milimo yenu, alioze nukachitambule cheswe.

⁹ Yoze wakulituna longeso lia Kristu keshi kuliendela ni Zambi. Yoze wakutayiza longeso lia Yesu kakuliendela ni Tata Zambi hamwe ni Mwanenyi.

¹⁰ Nyi mutu meza kuli yenu, alioze keshi ni longeso lino, kanda numutambula mu mazuwo jenu, chibwe kumuwahisa mu milimo yenyi.

¹¹ Mumu mweswawo machilinga malinunga nenyi ha yitanga yenyi yibi.

Maliji akusula

¹² Yuma yinji nguli nayo ya kunwambulwila, alioze Chazangile kunusonekena yo ha mikanda ni ulombo. Alioze ngunase ko mbunge ngwami, mungukeza kuli yenu ni kuhanjika nenu meso ni meso; mba mutuwahilila kuhiana.

¹³ Ana ja ndumbwe, yoze Zambi hanatongola, kaanakumeneka.