2 Timoteu 4 - Mukanda Wa Zambi 1970

¹ Ngunakwehe Shimbi ku meso ja Zambi ni ku meso ja Kristu Yesu, yoze makabatwila atu eswe, a mwono ni afu, muze makasoloka mu Wanangana wenyi. Ngwami,

² ambujola liji lia Zambi, sako tachi ha kuliambujola ha mwaka Ubema ni ha uze hi Ubema ko, kumika, ambila, shinjila nikulongesa ni uhomboloji weswe.

³ Mumu tangwa mulikeza lize atu keechi kazanga kwivwa nichimwe longeso liamwenemwene, alioze maakakaula usolo wo ene. Maakakungulula mbunga ya alongeshi kuli ayo waze maakalongesa yize anazange kubanjika.

⁴ Maakehuka kubanjika ku umwenemwene. Maakatewulukila ku yishima yamokomoko.

⁵ Alioze yena, Chakutamba kuliyula yena mwene ha yuma yeswe. Nyongonona mu lamba. Linga milimo ye ya kwambujola Sango Jibema. Umanunune milimo ye ya kavumbi ka Zambi.

Sango ja Paulu

⁶ Hakutwala kuli yami, tangwa liami lia kulihana ngwe mulambu hiliazuka, tangwa liami lia kufwa hiliaheta.

⁷ Hingunalitachika kanawa, hingunazomboka ndoo Ku songo, hingunakakaminya ufulielo wami.

⁸ Haliabwila hangutulikila chawana chize chinalweze ngwo, hinakumba. Chawana chize chili chipangula cha ululi chize Mwene, Ngaji yamwenemwene, makangwaha ha tangwa lize. Kechi kangwaha cho ukawami, alioze ni waze eswe akuzanga kusoloka chenyi.

⁹ Lipupwise unguhete.

¹⁰ Dema hangwehuka, mumu kakuzanga yuma ya hano hashi. Haya ku limbo lia Tesalonika. Kresene haya ku chifuchi cha Galashia, ni Titu ku chifuchi cha Dalmashia.

¹¹ Luka wika uli hamwe ni yami. Hitula Marku, Wize nenyi, mumu kumahasa kungukwasa mu milimo yami.

¹² Ngunakatuma Tichiku ku limbo lia Efesu.

¹³ Muze muwiza, ungunehena chikuto chize nahichikile mu limbo lia Troa maha Karpu. Uneha nawa mikanda, chibichibi yize yakulinga ni malambu.

¹⁴ Fulia unengu Alexandre, chibi kuhiana angulingile. Mwene makamufweta nikulita ni yitanga yenyi.

¹⁵ Ni yena nawa umukeyela, mumu walimikine kuhiana ni longeso lietu.

¹⁶ Muze angusopesele milonga yami chisuho chitangu, mutu niumwe wabwile hamwe ni yami, eswe yaangwehuka. Zambi kanda alula milonga yo.

¹⁷ Alioze Mwene wabwile hamwe ni yami, yangutakamisa. Kashika, nambujolele Sango Jibema kuli eswe waze hi Ayuda ko, ni Mwene Zambi yangupulula ku kanwa lia tambwe.

¹⁸ Neye makangulamwina ku lamba heswe ni kunguhetesa mu Wanangana wenyi wa mwilu. Uhenya wenyi ukamoneke ku miaka yeswe! Chibwe kama Chenacho.

Kumeneka

¹⁹ Meneka Prisila ni Akwila ni zuwo lia Oneseforu.

²⁰ Erastu hanasala ku limbo lia Korintu. Nahichikile Trofimu ku limbo lia Miletu, mumu te kanayiji.

²¹ Lipupwise kwiza shimbu mwaka wa chishika kanda wiza. Ubulu ni Pudene ni Linu ni Klaudia ni akwetu akwo eswe kanakumeneka.

²² Mwene abwe hamwe ni yena. Zambi anulweze utu.