2 Timoteu 3 - Mukanda Wa Zambi 1970

Matangwa akusula

¹ Chakutamba kunyingika chino ngwe, ha matangwa akusula lamba linji mulikabwa ko.

² Mumu atu maakabwa akwa kulizanga ene, akwa lwahu wa mbongo, akwa kulisamba, akwa kulisuta, akwa kushililika, yihulia kulia yisemi jo, akwa kaleleso hakutwala kuli atu ni kuli Zambi.

³ Keeshi zango, keeshi keke, yilamikiji, akwa Vunda, asasu, akwa kole ku yuma yibema.

⁴ Maakabwa akwa kuhandukula, akwa kulipupula, akwa kulengumuka, akwa kufwila kuwaha cha hano hashi hi Zambi ko.

⁵ Maakasoloka ku meso ja atu ngwe kaakuwayila Zambi, alioze mu mbunge jo kaakulituna tachi jamwenemwene ja Zambi. Lihandunune ni atu waze.

⁶ Amwe hakachi ko kaakunjila mu mazuwo ni kupiangula mapwo alelu, waze akumbata yilemu ya uhiso wa yibi yo, waze akuhungumuka ni usolo weka ni weka,

⁷ mapwo waze kaakufupa matangwa eswe kulilongesa, alioze keeshi mana nichimwe ha kunyingika umwenemwene.

⁸ Ngwe Jane ni Jambre alimikine ni Mose, chimuwika nawa malunga wano kaakulimika ni umwenemwene malunga waze akwete manyonga a uhepuke, keeshi ufulielo wamwenemwene.

⁹ Milimo yo kuyichi kuya nawa kulu twe, mumu atu eswe maakanyingika ngwo, kaali yihepuke, ngwe chize atu anyingikine yikuma ya Jane ni Jambre.

Kushika chakusula

¹⁰ Alioze yena hiunanyingika longeso liami, ni ndako jami, ni upale wami, ni ufulielo wami, ni uhomboloji wami, ni zango liami, ni kunyongonona chami.

¹¹ Unanyingika nawa chize atu akunguhungumiona, ni lamba likwo lize nakumona. Unanyingika yuma yeswe yize yanguwanyine ku limbo lia Antiokia, ni ku membo ja Ikoniu ni Listra, yihungumiona yize nanyongonwene nayo. Alioze Mwene yangupulula ku yuma yize yeswe.

¹² Ni mwene, eswe waze maazanga kwononokena Zambi mu kulinunga ni Kristu Yesu maakamona yihungumiona.

¹³ Alioze yivulumunyi ni akwa mahuza, maakabihia kuhiana, mumu maakonga atu akwo, ni atu akwo no maakonga.

¹⁴ Alioze yena, nyongonona mu yuma yize hiunalilongesa ni yize hiunafuliela. Unanyingika waze akulongesele yo,

¹⁵ ni unewuluka ngwe, chize ku wanuke we Unanyingika Mukanda wa Zambi. Wenawo Unahase kukwaha mana ha kuzuka ulamwino mu kufuliela Yesu Kristu.

¹⁶ Mukanda wa Zambi weswe haanausoneka ni tachi ja Zambi; kuwakukwasa ha kulongesa umwenemwene, ni ha kukumika mahuza, ni ha kululika yitela, ni ha kulongesa kubwa ni ndako yibema.

¹⁷ Chenacho kavumbi makabwa wa kutela kanawa, makalita kulinga milimo yeswe yibema.