2 Timoteu 2 - Mukanda Wa Zambi 1970

¹ Yena mwanami, litakamise ku utu uze tuli nawo mu kulinunga ni Kristu Yesu.

² Longeso lize hiunevu kuli yami muze nalongesele ku meso ja atu anji, lilongesa kuli malunga amwenemwene waze maahasa nawa ku longesa atu akwo.

³ Tayiza Chihanda che cha lamba ngwe kajita wakushishika wa Kristu Yesu.

⁴ Kajita yoze wakulinga milimo yibema keshi kunjila mu milonga yize kuyishi kulita ni milimo yenyi, mumu kakuzanga kubemena kuli mwata wenyi.

⁵ Mutu yoze wakuzomboka kahashile kukumba nyi keshi kufunga Shimbi ja kuzomboka.

⁶ Njimi yoze wahondanganyine milimo, chamutamba kubwa mutangu mu kutambula Chihanda cha mihuko yize.

⁷ Nyonga chize ngunakwambe, mumu Mwene Yesu makakwaha malinjekela ha yuma yeswe.

⁸ Iwuluka Yesu Kristu, wa ku Chikota cha David, yoze Zambi ahindwishile ku kufwa nikulita ni Sango Jibema jize nakwambujola.

⁹ Ngunamono lamba mumu nakwambujola Sango Jibema. Haanangukase ngoji ngwe nguli chitanganyanyi. Alioze kaahashile kukasa maliji a Zambi.

¹⁰ Kashika nakulihumikiza mu yuma yeswe mu kukwasa waze atongwele Zambi, hanga Kristu Yesu aalamwine, ni hanga ayo akabwe ni uhenya wa miaka yeswe.

¹¹ Maliji wano kaali amwenemwene ngwo: “Nyi twafwile hamwe nenyi, kachi mutukabwa nawa ni mwono hamwe nenyi.

¹² Nyi mutunyongonona, kachi mutukayula nawa hamwe nenyi. Alioze nyi mutulikala iye, neye nawa makalikala yetu.

¹³ Chibwe yetu kutushi akwa kushishika, hindu iye kali mukwa kushishika, mumu iye kahashile kulikala iye mwene.”

Kavumbi yoze Zambi anatayiza

¹⁴ Iwulula atu, kanda avulama maliji wano. Ahe Shimbi ku meso ja Zambi kanda ahamika hakutwala ku maliji Kuhamika chize chili chamokomoko chakulumbula atu waze akubanjika

¹⁵ Likoleze ni kubemena ku meso ja Zambi ngwe mukwa milimo yoze keshi kwivwa sonyi ha milimo yenyi, yoze wakulongesa kanawa sango jamwenemwene.

¹⁶ Ehuka kuhamika chamokomoko ni chize kuchishi kulita ni ufulielo. Maliji ngwe waze kaakuhandununa atu ni Zambi.

¹⁷ Maliji waze akulongesa kaali ngwe mbongola ya kuzungula musunya wa mutu. Hakachi ko kuhali Himene ni Filetu.

¹⁸ Haanehuka jila ya umwenemwene, haanapiangula amwe akwa kufuliela ni kwamba ngwo, uhindukilo ku kufwa hiunabalika kulu.

¹⁹ Hindu fundamentu ya tachi yize asele Zambi kuyakola. Hanasoneka helu liayo ngwo: “Mwene kananyingika atu jenyi,” nawa ngwo: “Mutu yoze wakwamba ngwenyi: ‘Nguli mukwa Kristu,’ chamutamba kwehuka yibi.”

²⁰ Mu zuwo linene kumushi kubwa lume yikashi ya oru chibwe prata, alioze kumwakubwa nawa yikashi ya mitondo ni ya uma. Yikashi yikwo atu kaakulinga nayo ha tangwa lize lilemu, alioze yikwo kaakulinga nayo tangwa ha tangwa.

²¹ Nyi mutu mehuka yibi yize yeswe, Zambi mamwaha milimo yilemu. Hi chamokomoko ko, mumu kali mukwa kulinanga ku meso ja Zambi, kanalulika kulinga milimo yeswe yibema.

²² Ehuka usolo ubi wa ukweze, bwako ni ululi, ni ufulielo, ni zango, ni uhwimino, hamwe ni waze akulemba Mwene ni mbunge yibema.

²³ Alioze litune kuhamika cha uhepuke ni chize kuchishi kulumbunuka. Unanyingika kuhamika ngwe chize chakukoka kuzwela.

²⁴ Kavumbi ka Mwene kuchamutambile kuzwela. Chamutamba kubwa chimbovu kuli eswe, mukwa kujamina mu kulongesa, chihumikiji.

²⁵ Chamutamba kulongesa akwa pami ni uhomboloji. Tangwa likwo Zambi makaaha tangwa lia kwalumuka ku mbunge ni kunyingika umwenemwene.

²⁶ Mba maakatewuluka ku manyonga abema ni kukondolwela muheto wa Sakwonga, yoze waakwachile ni waabinjishile ha kulinga upale wenyi.