2 Timoteu 1 - Mukanda Wa Zambi 1970

Kumeneka

^1-2 Yami, Paulu, ngunakusonekena yena Timoteu, mwanami yoze nakuzanga kuhiana. Ku upale wa Zambi nguli kanganda ka Kristu Yesu. Hanangutumu ni kwambujola sango ja mwono uze Zambi hanatulakenya, uze tuli nawo mu kulinunga ni Kristu. Tata Zambi ni Kristu Yesu Mwene wetu akulweze utu ni keke, akwehe uhwimino.

Paulu yasakwila Zambi, yatakamisa Timoteu

³ Ngunasakwila Zambi, yoze nakulingila ni mbunge yibema, ngwe chize alingile tushakulu twami. Nakumusakwila muze nakunwiwuluka mu yilemba yami, ufuku ni mwalwa.

⁴ Nakwiwuluka kulila che. Nakwivwa usona unji wa kukumona hanga ngwivwe kuwaha.

⁵ Nakwiwuluka ufulielo we wamwenemwene uze abwile nawo kakenu Loye ni noko Unise. Ngunanyingika ngwami, ni yena nawa uli nawo.

⁶ Kashika ngunakwiwulula ngwami, kolesa chawana chize akwehele Zambi muze nakusele moko.

⁷ Mumu Mwiku uze atuhele Zambi kuushi kutuvwisa woma, alioze wakutwaha tachi, ni zango, ni mana a kuliyula.

⁸ Kanda wivwa sonyi ha kubwa chela cha Mwene wetu, chibwe kanda wivwa sonyi hali yami, funge mu zuwo lia lamba mumu hali Kristu. Alioze tayiza Chihanda che cha lamba lia Sango Jibema, nikulita ni tachi jize akukwaha Zambi.

⁹ Iye hanatulamwina ni hanatutambika hanga tubwe atu jenyi, hi ha yitanga ko yize twalingile, alioze mumu ha manyonga jenyi ni utu wenyi. Hanatulweze utu uno muli Kristu Yesu shimbu te miaka kanda yibwa,

¹⁰ alioze hanatusolwela wo haliabwila, muze Chilamwina chetu Yesu Kristu haneza hano hashi. Mumu Kristu hanakumbu tachi ja kufwa, hanasolola mwono wa miaka yeswe mu Sango Jibema.

¹¹ Zambi hanangwehe yilemu ya kwambujola Sango Jibema ngwe kanganda ni longeshi.

¹² Kashika, chibwe nakumona lamba lino, hindu Chishi kwivwa sonyi mumu ngunanyingika kanawa yoze nakufuliela, ni ngunanyingika pundu ngwami, kanahase kufunga chize angukunjikile ndoo ku Tangwa lize.

¹³ Imbulula yikuma yamwenemwene yize nalongesele. Jikiza mu ufulielo ni zango lize tuli nalio mu kulinunga ni Kristu.

¹⁴ Funga longeso lize nakuhele, ni tachi ja Mwiku wa Linanga uze uli muli yetu.

¹⁵ Unanyingika ngwe, atu eswe mu chifuchi cha Asia haanangwehuka. Hakachi ko Figelu ni Hermogene.

¹⁶ Mwene Yesu alweze keke akwa zuwo lia Oneseforu, mumu hananguwahisa yisuho yinji. Kevwile ko sonyi chibwe nguli mu zuwo lia lamba.

¹⁷ Alioze muze haheta mu Roma, yangufupafupa ni mbunge yeswe ndoo ni muze angumwene.

¹⁸ Mwene Yesu amuvwile keke ha Tangwa lize! Unanyingika kanawa milimo yeswe yize angukwashile muze nabwile mu Efesu.