2 Sango Ja Mianangana 5 - Mukanda Wa Zambi 1970

¹ Muze mwanangana hamanununa milimo yeswe ya zuwo lia Zambi, yasasa yuma yeswe yize alulikile tato David mu yibatulo yeswe ya zuwo lia Zambi, prata, ni oru, ni yuma yikwo.

Mwanangana Solomone yaneha mushete wa Usendo mu zuwo lia Zambi

² Mba mwanangana Solomone yakungulula miata eswe a mavungu ni a majimo ja Aisraele akunguluke mu Yerusaleme, nikwalweza akande mushete wa Usendo wa Mwene Zambi ni atu mu Zione, Limbo lia David ni kuuneha ku zuwo lia Zambi.

³ Ayo eswe yaakunguluka ha matangwa ja chiwanyino cha Yikulika.

⁴ Muze miata eswe haakunguluka, mba Alevi yaazundula mushete wa Usendo,

⁵ yaautwala ku zuwo lia Zambi. Mahako ni Alevi yaaneha nawa zuwo lia Zambi lia makubu ni yuma yeswe yize yabwile mo.

⁶ Mwanangana ni Aisraele eswe yaakunguluka kulutwe lia mushete wa Usendo, yaalambula mapanga ni ngombe anji, kaahashile ko kwaalula mumu okele naye.

⁷ Mba mahako yaaneha mushete wa Usendo mu zuwo lia Zambi, yaaunangika muma mwa chijila kuhiana, mushi lia mapulwa ja chizulie cha akwa mwono a mwilu.

⁸ Mapulwa jo te akwolola helu lia mushete wa Usendo ni ye mikambo yawo.

⁹ Masongo ja mikambo te kaakumoneka lume kuli yoze unamana kulutwe lia muma mwa chijila kuhiana, chibwe kweswako. (Ye mikambo kwe yili ndoo ni musono.)

¹⁰ Mu mushete wa Usendo kumwabwile ko Chuma chikwo shina lume mawe aali waze aselemo kuli Mose ku mulundu wa Sinai, muze Mwene Zambi akolesele Usendo ni Aisraele, muze te anakatuka ku chifuchi cha Egiptu.

Uhenya wa Mwene Zambi

^11-14 Mahako eswe a mbunga jeswe kwe abwile, te haalikunjika ene kuli Zambi. Njimba ja Alevi eswe, Asafe, ni Hemane, ni Jedutune, ni mbunga ya akwa majimo jo yaazala mahina atoma alefuna. Alevi yaamana hehi ni chilumbilo ku sali lia chivumbuko, yaakwata yifwolo ni tulialia. Yaamana hamwe ni mahako 120 waze te anembi yitavwi. Njimba hamwe ni akwa kwimba yitavwi, ni yifwolo, ni tulialia, yaachichimieka Mwene Zambi nikwimba kanawa ngwo: “Chichimiekenu Mwene Zambi, mumu kali mubema, zango lienyi kulishi kuhwa nichimwe!” Muze mahako haatuhuka mu zuwo lia Zambi, susumuku lelwa yilizala mu zuwo lia Zambi ni uhenya wenyi. Ha chino mahako hikaahashile ko kulinga milimo yo.