2 Sango Ja Mianangana 4 - Mukanda Wa Zambi 1970

Yikashi ya zuwo lia Zambi

¹ Mwanangana Solomone yafula chilumbilo cha unengu, kusuhwa metro livwa, chizundamo metro jiwana ni sentimetro makumi atano.

² Yafula nawa chitende cha kujingilika cha unengu. Chizundamo metro jaali ni sentimetro makumi aali, kutohwa metro jiwana ni sentimetro makumi awana, kujingilika chacho metro kumi ni jitatu ni sentimetro makumi aali.

³ Kujingilika haze kushi lia mukomo wa che chitende yikubwa mikala yaali, umuwika helu lia ukwo. Yizulie yalio, yiilifwa ni makuji a ngombe. Yino yeswe yiibwa ya chishinda chimuwika ni chitende.

⁴ Che chitende yichibwa helu lia makuji a ngombe kumi ni aali a unengu. E ngombe yaatala haze, atatu ku norde, atatu ku chitokelo, atatu ku sude, atatu ku chivumbiko.

⁵ Unengu wa chitende ndama yacho milimetro makumi shimbiali ni jitano. Mukomo wacho unalifu ngwe mukomo wa musenge wa kuzembeka ngwe chitemo. Te mwakunjila litro ngwe 60,000.

⁶ Yalinga nawa yimbashila kumi, yasa yimbashila yitano ku sali lia sude lia zuwo lia Zambi, ni yikwo yitano ku sali lia norde. Mwenamo te akukosela tumba ja yifwo ya yimuna waze maalambula milambu ya kwocha. Mahako yaasanasana meya a mu chitende.

^7-8 Yafula yikwachilo ya ndeya kumi ya oru nikulita ni chize aalwezele, ni mesa kumi, yayisa mu chibatulo chinene cha mu zuwo lia Zambi, yikwachilo yitano ni mesa jitano yaayisa sali jitano sali jitano. Yafula nawa yenga ya oru 100.

⁹ Yalinga nawa yiize ya muchima mumu hali mahako, ni yiize yikwo ya haze nawa. Yasa chikolo mukachi ka maaze yachifuka ni unengu.

¹⁰ Che chitende cha unengu yachisa ku sali lia sude ku chivumbuko hehi ni mbango ya zuwo lia Zambi.

^11-16 Mba Hurame yafula nawa yikashi ya kukombela uto, ni yula ya utale, ni mbashila. Yamanununa yikashi yeswe yize amuhele kulinga kuli mwanangana Solomone mumu ha zuwo lia Mwene Zambi. Yuma yenayi ayi: manguji aali, yipangula yaali ya ha masongo a manguji, yizulie ya ngoji ja kusepekenya ha yipangula, yizulie ya mihuko ya granade 400 mu mikala yaali yakujingilika chipangula ni chipangula, matemba kumi, mbashila kumi, chitende, makuji a ngombe kumi ni aali akuzundula chitende, yikashi ya kukombela uto, ni yula ya utale, ni somo. Mukwa utotombo Hurame yafula yuma yino yeswe ya unengu wa kucheka ya kulinga nayo mu zuwo lia Zambi, ngwe chize amwambile kuli mwanangana Solomone.

¹⁷ Yuma yeswe mwanangana kayizuzulwile mu mena hakachi ka membo ja Sukote ni Zereda mu chikulo cha lwiji Yordau.

¹⁸ Yuma yize yokele naye, kashika niumwe kahashile ko kupezala unengu uze alingile nawo.

¹⁹ Mwanangana Solomone yafula nawa yikashi ya oru ya mu zuwo lia Zambi: chilumbilo, ni mesa haze te akutumbieka mbolo ku meso ja Zambi,

²⁰ ni yikwachilo ya ndeya, ni je ndeya ja oru yibema yize yabwile ni kulekwoka kulutwe lia muma mwa chijila kuhiana nikulita ni Shimbi,

²¹ ni yitemo ya kwola ni ndeya, ni malumana a ndeya,

²² ni yifuko ya kujima nayo kahia, ni mbashila, ni yenga ya kusa yuma ya vumba libema, ni yula ya kwokwela nayo kahia. Yikashi yino yeswe yayifula ni oru yibema. Yajilo ya haze ya ku zuwo lia Zambi ni yajilo ya muma mwa chijila kuhiana yayilamika oru.