2 Sango Ja Mianangana 2 - Mukanda Wa Zambi 1970

Mwanangana Solomone yalulika kutunga zuwo lia Zambi

¹ Mwanangana Solomone yalulika kutunga zuwo kuze chatamba kuwayila Mwene Zambi, ni zuwo lienyi mwene nawa.

² Yasa atu 70,000 ku milimo ya kumbata yuma ya kutunga nayo, ni 80,000 ku milimo ya kubula mawe. Yikubwa nawa tupita 3,600 akutala ye milimo.

³ Mwanangana Solomone yatuma maliji kuli mwanangana Hirame wa ku limbo lia Tiru ngwenyi: “Ngulingile kama yibema ngwe chize walingile kuli tata mwanangana David muze wamulanjishile mitondo sedru ya kutunga nayo zuwo lienyi.

⁴ Ngunatungu zuwo lia Mwene Zambi, Zambi yami, lia kumulemesena. Mulikabwa lia chijila kuze atu jami ni yami mutubwa ni kumuwayila, ni kumwochela yuma ya vumba libema, ni kutumbieka milambu ya mbolo ya chijila matangwa eswe, ni kulambula milambu ya kwocha chichamene ni chingoloshi, ni ha matangwa a kuhwima, ni ha yiwanyino ya Kakweji Mwaha, ni ha matangwa akwo a chijila hanga tulemese Mwene Zambi, Zambi yetu. Hanambila Aisraele kuchilinga matangwa eswe.

⁵ Ngunazange kutunga zuwo linene, mumu Zambi yetu kali munene Wahiana mazambi eswe akwo.

⁶ Alioze niumwe mahasa kutungila Zambi zuwo, mumu chibwe mwilu mweswe kumwalitele nenyi. Ngwe kuchi kevwe munguhasa kumutungila zuwo shina lia kumwochela yuma ya vumba libema?

⁷ Kashika ngutumine kama umwe mukwa mana yoze wanyingika kulinga milimo ya oru, ni prata, ni unengu, ni utale, ni mahina a ufungo, ni achila, ni alauluka. Akalinge hamwe ni akwa utotombo a mu Yuda ni Yerusaleme waze asele tata David.

^8-9 Ngunanyingika atu je kaali ni mana ja milimo ya mitondo, kashika ngutumine mitondo sedru, ni Shipre, ni mialumuke ya Libano. Hinalulika kulu kutuma atu jami akwase atu je kululika mitondo yinji, mumu zuwo lino ngunambe kutunga mulibwa linene ni lia uhenya.

¹⁰ Yakulia ya atu je mungutuma kilo, 2,000,000 ja tiriku, ni 2,000,000 ja masa, ni litro 400,000 ja vinyu, ni litro 400,000 ja maji a olive.”

¹¹ Mwanangana Hirame yatumina mwanangana Solomone kumbululo. Yasoneka ngwenyi: “Mwene Zambi hakupwisa mwanangana mumu kanazange atu jenyi.

¹² Mwene Zambi, Zambi ya Aisraele, afumane, Tangi ya lilu ni hashi! Hanamwehe mwanangana David mwana wa mana, ni malinjekela, ni yinyingi, yoze habwa ni manyonga a kutunga zuwo lia Mwene Zambi ni likwo lia iye mwene.

¹³ Hinakutumina umwe mukwa utotombo, jina lienyi Hurame.

¹⁴ Naye kali wa ku vungu lia Dane ni tato kali wa ku Tiru. Kananyingika kulinga yuma ni oru, ni prata, ni unengu, ni utale, ni mawe, ni mitondo, ni mahina alauluka, ni a unfungo, ni achila, ni atoma alefuna. Kanahase kulinga yuma yeka ni yeka ya utotombo, yeswe yize atu maazanga. Mweche alinge hamwe ni akwa utotombo je ni hamwe ni waze alingilile tatenu mwanangana David.

¹⁵ Kashika hingutumine kama yize wangulakenyene: tiriku, ni masa, ni maji a olive, ni vinyu.

¹⁶ Mba yetu mutukanubatwila mitondo yeswayo munuzanga ha milundu ya Libano. Mutukayikasa yichita ni kuyihungumwina mu kalunga lwiji ku Jope, mba yenu nuyihetese ku Yerusaleme.”

Mwanangana Solomone yabutuka kutunga zuwo lia Zambi

¹⁷ Mba mwanangana Solomone yalula yilambala eswe waze te atwama mu chifuchi cha Israele, ngwe chize alingile tato David. Yikubwa yilambala 153,600.

¹⁸ Yatongola 70,000 akambate yuma ya kutunga nayo zuwo lia Zambi, ni 80,000 akabule mawe ha milundu. Yatongola nawa tupita 3,600 akatale ye milimo.