2 Sango Ja Mianangana 12 - Mukanda Wa Zambi 1970

Akwa Egiptu yaasa jita ni Ayuda

¹ Muze mwanangana Rehoboame hatakama mu wanangana wenyi, iye ni atu jenyi eswe yeehuka Shimbi ja Mwene Zambi.

² Ha mwaka wa muchitano wa kuyula chenyi, Mwene Zambi yamumwesa lamba mumu ha uhulia wenyi. Mwanangana Shishake yeza, yasa jita ni Yerusaleme.

³ Te habwa ni matemba 1,200, ni akwa kwendela ha tuvwalu 60,000, ni tujita anji kuhiana, kahashile ko kwaalula, ni kuchinga ko tujita twa yifuchi ya Libia, ni Suke, ni Sudane.

⁴ Yaakumba membo ya Yuda akukoleka, yaaheta ndoo ku Yerusaleme.

⁵ Mukwa munanyi Shemaya yaya kuli mwanangana Rehoboame ni kuli miata ja Ayuda waze te anakunguluka mu Yerusaleme mumu te kaanachina Shishake, yaamba ngwenyi: “Lino lili liji lia Mwene Zambi kuli yenu ngwenyi: ‘Hinwangwehuka, kashika ni yami nawa hinanukunjika kuli Shishake.’ ”

⁶ Mba mwanangana ni e akwa kuyula yaalikehesa, yaamba ngwo: “Yize halinga Mwene Zambi yinalite.”

⁷ Muze Mwene Zambi hachimona, yahanjika nawa kuli Shemaya ngwenyi: “Mumu haalikehesa, hichichi kwoonona. Muze Shishake masa no jita Ayuda maamona lamba, alioze maasala ni mwono. Chichi kuvwila Yerusaleme ufwatulo kuhiana.

⁸ Shishake kumaakumba ni Ayuda kumaalilongesa kulituchika chize chili mukachi ka kulingila yami ni kulingila akwa kuyula ja hashi.”

⁹ Mwanangana Shishake yeza ku Yerusaleme yabuba ubite weswe wa mu zuwo lia Zambi ni wa mu zuwo lia mwanangana. Yanda yuma yeswe ni kebwe ja oru jize alingile mwanangana Solomone.

¹⁰ Mba ha kuyisalakanyisa, mwanangana Rehoboame yafula kebwe jeka ja unengu, yaajikunjika kuli miata a tujita waze te akufunga yikolo ya zuwo lia mwanangana.

¹¹ Mba muze te mwanangana akuyaya ku zuwo lia Zambi, e tufunga ananumbachila je kebwe ni kujihilwisa nawa ku zuwo lia tufunga.

¹² Mwene Zambi hikonwene ko chifuchi chenyi liakulu mu utenu wenyi mumu te mwanangana halikehesa ku meso jenyi. Mba yuma yiiwaha mu Yuda.

Songo lia kuyula cha mwanangana Rehoboame

¹³ Rehoboame yayula ku Yerusaleme, yatakamisa wanangana wenyi. Te habwa ni miaka makumi awana ni kashi muze amupwishile mwanangana, yayula miaka kumi ni shimbiali ku Yerusaleme, limbo lize Mwene Zambi atongwele mu chifuchi cheswe cha Israele muze atu maabwa nikumuwayila. Naye ya Rehoboame Nama, wa ku chifuchi cha Amone.

¹⁴ Mwanangana Rehoboame yavulumuna, mumu kasele ko mbunge kulinga upale wa Mwene Zambi.

¹⁵ Yitanga ya mwanangana Rehoboame, chize ku kabutu ndoo ku songo, ni songo ja akwa jiko lienyi haanayisoneka mu mikanda ya Sango ja Mukwa Munanyi Shemaya ni Sango ja Mukwa Munanyi Ido. Kwabwile jita matangwa eswe hakachi ka mwanangana Rehoboame ni mwanangana Jeroboame.

¹⁶ Rehoboame yafwa, yaamufunda mu mafuka ja mianangana mu Limbo lia David. Mwanenyi Abija yamuhinga.