2 Sango Ja Mianangana 1 - Mukanda Wa Zambi 1970

Mwanangana Solomone yeta mana kuli Zambi

¹ Solomone, mwana wa mwanangana David, yajikiza mu wanangana wa Israele, Mwene Zambi, Zambi yenyi, yabwa hamwe nenyi, yamutakamisa.

² Mwanangana Solomone yambila miata eswe a ku mbunga ja kanunu kanunu, ni ja kulakaji kulakaji ja tujita eswe a mu wanangana, ni miata eswe a mu majiko, ni atu eswe akwo,

³ ngwenyi: “Tuyenu ku limbo lia Gibeone kuma kwa kuwayila.” No yaaya ko mumu kwenako te kuli zuwo lia makubu lia Mwene Zambi lize atungile Moze kavumbi ka Mwene Zambi mu puya.

⁴ (Alioze mushete wa Usendo te uli mu limwe zuwo lia makubu lize mwanangana David ajikile muze auchijile ku limbo lia Kiriate Jearime ni kuuneha ku Yerusaleme.)

⁵ Chilumbilo cha unengu chize alingile kuli Bezalele, mwana wa Uri, mujikulu wa Hure, necho nawa chabwile mu Gibeone kulutwe lia zuwo lia Mwene Zambi. Mwanangana Solomone ni atu eswe yaawayila ko Mwene Zambi.

⁶ Kulutwe lia zuwo lia Zambi mwanangana Solomone yawayila Mwene Zambi, nikulambula milambu ha chilumbilo cha unengu; yimuna waze ashihile ni kwocha ha chilumbilo kaabwile te 1,000.

⁷ Ha ufuku uze Zambi yasoloka kuli Solomone, yamuhula ngwenyi: “Chika unazange ngukwehe?”

⁸ Solomone ngwenyi: “Matangwa eswe walwezele zango linji kuli tata David, ni haliabwila hiwangutayiza kumuhinga.

⁹ Aa Mwene Zambi, Zambi yami, himanununa chilakenyo chize walakenyene tata. Hiwangupwisa mwa nangana wa atu anji, niumwe kahashile kwaalula,

¹⁰ Kashika ngwehe mana ni malinjekela hanga nguhase kwayula. Nyi ka, ngwe kuchi munguhasa kuyula atu je anji chichize?”

¹¹ Mwene Zambi yamukumbulula ngwenyi: “Kuwatongola kanawa. Kuwechile mbongo, hanji yikumba, chibwe ulemu, hanji kushiha akwa kole je, chibwe miaka yinji ya mwono we, alioze hiweta mana ni malinjekela waze muuyula no atu jami, hali waze hingunakupwisa mwanangana.

¹² Kashika mungukwaha mana ni malinjekela, mungukwaha nawa mbongo, ni yikumba, ni ulemu kuhiana mianangana eswe waze aliangile ni waze maakakukaula.”

Tachi ja mwanangana Solomone ni ubite wenyi

¹³ Mwanangana Solomone yakatuka ku limbo lia Gibeone kuma kwa kuwayila, kuze kwabwile zuwo lia Mwene Zambi lia makubu, yahiluka ku limbo lia Yerusaleme. Kwenako ayulile Aisraele eswe.

¹⁴ Yakungulula matemba a jita 1,400, ni tuvwalu 12,000, neye yaasa amwe mu Yerusaleme ni akwo mu membo eka ni eka.

¹⁵ Ha matangwa ja kuyula chenyi prata ni oru yiilumbama ngwe mawe mu Yerusaleme, ni mitondo sedru yiilumbama yinji ngwe mitondo ya misuwa.

¹⁶ Akwa kulanda yaalanjisa mwanangana Solomone tuvwalu a ku yifuchi ya Musri ni Silisia,

¹⁷ ni e matemba a jita a ku chifuchi cha Egiptu. Yaalanjisa tuvwalu ni matemba kuli Ahite ni mianangana ja Siria, temba limuwika te liakufwika prata 600, ni kavwalu umuwika 150.