2 Samuel 9 - Mukanda Wa Zambi 1970

Mwanangana David ni Mefiboshete

¹ Limwe tangwa mwanangana David yahula ngwenyi: “Mu jiko lia mwanangana Saulu munakasala kama umwe mutu, nyi? Nyi kwali, ngunazange kumulweza zango mumu hali Jonatane.”

² Kwabwile umwe kavumbi wa ku jiko lia mwanangana Saulu, jina lienyi Ziba. No yaamutambika aye kuli mwanangana David, neye yamuhula ngwenyi: “Yena Ziba nyi?” Yakumbulula ngwenyi: “Ewa mwane, yami kavumbi kenu.”

³ Mwanangana ngwenyi: “Kunakasala kama umwe mutu wa mu jiko lia mwanangana Saulu, yoze ngunahase kulweza utu nyi? Nalakenyene Mwene Zambi kuchilinga.” Ziba ngwenyi; “Vulie mwanangana! Umuwika uliko, mwana wa Jonatane, Kali chitonji.”

⁴ Mwanangana ngwenyi: “Kulihi ali?” Ziba ngwenyi: “Kali maha Makira, mwana wa Amiele, ku chihunda cha Lodebare.”

⁵ Mba mwanangana yatuma mutu amusake.

⁶ Muze Mefiboshete, mwana wa Jonatane, mujikulu wa mwanangana Saulu, haheta, yaliumba hashi ku meso ja mwanangana David ni vumbi. Mwanangana ngwenyi: “Mefiboshete.” Neye yataa ngwenyi: “Vulie mwanangana! Yami kavumbi kenu.”

⁷ Mwanangana ngwenyi: “Kanda wivwa woma. Ngunazange kukulweza utu mumu hali tatenu Jonatane. Mungukuhilwishila minda yeswe ya kakenu Saulu, matangwa eswe yena muubwa nikwiza ku mesa yami ni kulia.”

⁸ Mefiboshete yaliumba nawa ngwenyi: “Vulie mwanangana wami! Yami nguli ngwe kawa yoze hanafu kulu. Ngwe kuchi munuhasa kungulweza utu ubwahaha?”

⁹ Mba mwanangana yatambika Ziba, kavumbi ka mwanangana Saulu, yamwamba ngwenyi: “Yuma yeswe yize yabwile ya mwanangana we ni ya akwa jiko lienyi ngunayihana kuli mujikulu wa mwene we.

¹⁰ Yena ni ana je a malunga, ni ngamba je, munukalimina akwa jiko lia mwene wenu Saulu, ni kukunga ye mihuko, ni kwanehena yakulia. Alioze Mefiboshete iye mwene matangwa eswe mabwa nikulia ku mesa yami.” (Ziba te kali ni ana a malunga kumi ni atano ni ngamba makumi aali.)

¹¹ Ziba yakumbulula ngwenyi: “Vulie mwanangana! Mungulinga yuma yeswe yize hinwangwamba.” Chenacho Mefiboshete abwile nikulia ku mesa ya mwanangana ngwe ana ja mwanangana a malunga.

¹² Mefiboshete te kali ni mwana umwe wa lunga, jina lienyi Mika. Akwa jiko lia Ziba eswe yaabwa ngamba ja Mefiboshete.

¹³ Chenacho Mefiboshete, yoze wabwile chitonji wa molu eswe aali, yatwama mu Yerusaleme, yalialia yakulia yenyi yeswe ku mesa ya mwanangana.