2 Samuel 8 - Mukanda Wa Zambi 1970

Tujita twa mwanangana David yaakumbakumba mu jita

¹ Mwabwamuze mwanangana David yasa nawa jita ni Afilistia, yaakumba, yatambula chifuchi cho.

² Yakumba nawa Amoabe. Yabombesa funge hashi; yeseka mbunga jitatu, yashiha jaali, yahichika yimuwika. Chenacho Amoabe alumukine yilolo jenyi, yaamulambwola milambu.

³ Mba yakumba Hadadezere, mwana wa Rehobe, mwanangana wa mu chifuchi cha Zoba mu Siria. Yamukumba muze mwanangana Hadadezere abwile mu jila akakolese chiyulo chenyi mu chifuchi chize chasulangana ni lwiji Ufrateze ku tunda.

⁴ David yakwata tujita waze akwenda ha tuvwalu 1,700 ni waze te akwenda hashi 20,000. Yafunga ni mwono tuvwalu waze maahasa kwendesa matemba 100, alioze yateta mijiba ya waze asalile.

⁵ Muze Asiria a ku Damasku haatuma tujita ni kukwasa mwanangana Hadadezere, mwanangana David yasa no jita, yashiha tujita 22,000.

⁶ Mba yasa misumba ya tujita mu chifuchi cho; no yaalumuka yilolo jenyi, yaamulambwola milambu. Mwene Zambi yakwasa David kukumba kweswako ayile.

⁷ David yabuba kebwe ja oru kuli miata ja Hadadezere, yajitwala ku Yerusaleme,

⁸ yabuba nawa unengu unji ku Beta ni Berotai, membo waze Hadadezere te akuyula.

⁹ Mwanangana Toi wa mu chifuchi cha Hamate, yevwa ngwo, mwanangana David hakumba tujita twa mwanangana Hadadezere.

¹⁰ Mba yatuma mwanenyi Jorame akameneke mwanangana David ni kumuchichimieka ha kukumba chenyi, mumu Toi te kakwasa jita ni Hadadezere yisuho yinji. Mwe Jorame yatwalila mwanangana David yawana ya kulinga ni oru, ni prata, ni unengu.

¹¹ Mwanangana David yayikunjika kuli Mwene Zambi hamwe ni ye prata ni oru yize abubile kuli mavungu waze akumbile:

¹² Aedome, ni Amoabe, ni Aamone, ni Afilistia, ni Aamaleke, ni yize abubile kuli mwanangana Hadadezere.

¹³ Jina lia David yilifumana kuhiana muze ahilukile ha kushiha Aedome 18,000 mu chikulo cha mungwa.

¹⁴ Yasa misumba ya tujita mu chifuchi cheswe cha Edome. Aedome yaalumuka yilolo jenyi. Mwene Zambi yakwasa David, kweswako ayile yakumba ko.

¹⁵ David yayula chifuchi cheswe cha Israele, yayula kanawa, yabatwola milonga yeswe ni ululi.

¹⁶ Joabe, naye te Zeruya, yabwa mwata wa tujita. Yehosafate, mwana wa Ahilude, mwenawo te wakusoneka sango ja wanangana.

¹⁷ Zadoke, mwana wa Ahitube, ni Ahimeleke, mwana wa Abiatare, e mahako a Zambi; Seraya mwe mukwa kusoneka.

¹⁸ Benaya, mwana wa Jehoyada, mwe mwata wa tujita waze te akufunga mwanangana. Ana ja mwe mwanangana a malunga te mahako.