2 Samuel 7 - Mukanda Wa Zambi 1970

Natane yahanjika ni mwanangana David

¹ Mwanangana David yatwama mu zuwo lienyi lia wanangana. Mwene Zambi yamufunga kanawa kuli akwa kole jenyi.

² Mba mwanangana yambili mukwa munanyi Natane ngwenyi: “Tala yami ngunatwama mu zuwo lia kutunga ni mitondo sedru, alioze mushete wa usendo wa Zambi ni atu uli mu zuwo lia makubu!”

³ Natane ngwenyi: “Lingenu cheswacho chinanubemena, mumu Mwene Zambi kali hamwe ni yenu.”

⁴ Alioze ha ufuku uzewene Mwene Zambi yambili Natane ngwenyi:

⁵ “Yako ulweze kavumbi kami David ngwe, Mwene Zambi kanambe ngwenyi: ‘Hi yena ko muungutungila zuwo ngutwame mo.

⁶ Chize kuze natuhwishile Aisraele mu chifuchi cha Egiptu ndoo ni musono, haanga kanda nguchitwama kama mu zuwo; nakwendangana lume ni kutwama mu zuwo lia makubu.

⁷ Mu kwendangana chami cheswe hamwe ni Aisraele, te limwe tangwa hingunahula kama miata waze natongwele ngwami: Mumu yika kunwangutungilile zuwo lia mitondo sedru, nyi?’

⁸ “Kashika lweza kavumbi kami David ngwe, yami Mwene Zambi Mukwa Ndundo Jeswe ngunamwambe ngwami: ‘Nakuchijile ku yambu kuze te wakufunga mapanga, yingukupwisa mukwa kuyula atu jami Aisraele.

⁹ Nabwile hamwe ni yena kweswako te wakuya, hingunanongesa akwa kole je eswe waze abwile kulutwe lie. Mungufumanyisa jina lie ngwe majina ja alemu ahiana a hano hashi.

^10-11 Natongwele hamwe homa yingusa ho atu jami Aisraele. Kwenako maatwama matangwa eswe, niumwe kechi kaabinjisa nawa. Chize kuze anjilile mu chifuchi chino, atu te kaakwasa no jita, alioze chino kuchichi kubwa nawa. Ngunalakenya kukufunga kanawa mumu hali akwa kole je ni kukwaha vungu.

¹² Muze hiwafwa, hiwaya kuli tushakulu twe, umwe wa kuli ana je mungukamupwisa mwanangana, mungukakolesa wanangana wenyi.

¹³ Mwenawo mwe makangutungila zuwo, mungukakolesa wanangana wenyi ndoo ku miaka yeswe.

¹⁴ Mungukabwa tato, neye makabwa mwanami. Muze mavulumuna mungukamufumba ni lamba ngwe chize tata akufumba mwanenyi.

¹⁵ Alioze chichi kumwehuka ngwe chize nehukile Saulu, yoze nachijile hanga yena ubwe mwanangana.

¹⁶ Matangwa eswe yena muukabwa ni vungu, ni wanangana we mungukaulindulula ku miaka yeswe.’ ”

¹⁷ Natane yalweza David maliji eswe waze Mwene Zambi amulwezele.

Mwanangana David yasakwilila Mwene Zambi

¹⁸ Mwanangana David yanjila mu zuwo lia kuwayila lia makubu, yatwama hashi, yalemba ngwenyi: “Aa Mwene Zambi, yami iya, chibwe akwa jiko liami, mba hiwatuneha ndoo kuno?

¹⁹ Chibwe haliabwila unalingi kuhiana, hiwalakenya vungu liami ku miaka yize muyiza ho, nawa hiwatayiza mutu kuchimona, aa Mwene Zambi!

²⁰ Chika mungwamba nawa kuli yena? Unangunyingika kanawa, yami kavumbi ke.

²¹ Mumu wangulakenyene ni wanguzangile, kashika walingile yuma yino yeswe yinene ni kungusolwela yo.

²² Mwene Zambi, yena uli munene! Kukushi niumwe walifwa ni yena. Matangwa eswe twachinyingika ngwetu, yena uli mwe Zambi wika.

²³ Limwe vungu liko hano hashi lialifwa ni vungu lia Israele, nyi? Hiunaalamwina ku undungo ni kwapwisa atu je. Yuma yinene ni ya kukomwesa yize waalingilile hiyinafumanyisa jina lie hashi heswe. Hiunahumu mavungu akwo ni e mazambi jo kulutwe lia atu je, waze watuswile mu chifuchi cha Egiptu kubwa a yena.

²⁴ Hiunapwisa Aisraele atu je ndoo ku miaka yeswe. Mwene Zambi, yena hiunabu Zambi yo.

²⁵ “Mwene Zambi matangwa eswe manununa yilakenyo yize hiwalakenya yami ni vungu liami, linga yize hiwamba.

²⁶ Jina lie mulikafumana, ni atu maakamba ku miaka yeswe ngwo: ‘Mwene Zambi Mukwa Ndundo Jeswe kali Zambi ya Aisraele.’ Muukakolesa wanangana wami ndoo ku miaka yeswe.

²⁷ Mwene Zambi Mukwa Ndundo Jeswe, Zambi ya Aisraele, ngunahamuka kulemba kuli yena, mumu hiwasolola yino yeswe kuli yami, kavumbi ke, ni hiwangulweza ngwe, vungu liami muukaapwisa mianangana.

²⁸ “Mwene Zambi, yena uli Zambi! Wakumanununa yilakenyo ye matangwa eswe. Hiwangulakenya chilakenyo chibema.

²⁹ Wahisa kama vungu liami, hanga akalinduluke ku meso je ku miaka yeswe. Mumu yena, Mwene Zambi, mwe wachamba, kumuukawahisa vungu liami ndoo ku miaka yeswe.”