2 Samuel 6 - Mukanda Wa Zambi 1970

David yaneha mushete wa Usendo ku Yerusaleme

¹ Mwanangana David yakungulula nawa tujita a tachi a mu Israele 30,000.

² Yaatwala ku limbo lia Bala mu Yuda akande ko mushete wa Usendo wa Zambi ni atu, uze ukwete jina lia Mwene Zambi Mukwa Ndundo Jeswe, yoze watwama mukachi ka akwa mwono a mwilu.

³ Yaawanda maha Abinadabe ha mulundu, yaausa ha temba haha. Uza ni Ahio, ana ja Abinadabe, yeendesa lie temba,

⁴ Ahio te unatetekela kulutwe.

⁵ Mwanangana ni Aisraele eswe yaahangana nikwimba ni tachi jo jeswe nikufumanyisa Mwene Zambi. Yeemba ni tulialia, ni ndembo, ni ngoma, ni yiwolowolo, ni yifwolo.

⁶ Muze haaheta ku chizungwilo cha Nakone, ngombe yaatalinga. Mba Uza yakwata ku mushete wa Usendo.

⁷ Hazehene Mwene Zambi yatenukina Uza, yamushiha mumu kalemesene ko mushete wa Mwene Zambi. Uza yafwila kuze hehi ni mushete wa Usendo.

⁸ Kashika David yaluka homa haze jina ngwenyi: Ubatwilo wa Uza. David yevwa wuli mumu Mwene Zambi hashiha Uza.

⁹ Mwanangana yevwila Mwene Zambi woma, yamba ngwenyi: “Lwangu mama! Ngwe kuchi munguhasa kuya ni we mushete wa Usendo haliabwila?”

¹⁰ Kashika yanyonga ngwenyi, chichi kuya nawo ku Yerusaleme, mba yautwala maha Obede Edome, wa ku limbo lia Gate.

¹¹ Mushete yiutwama ko tukweji atatu, mba Mwene Zambi yawahisa Obede Edome ni akwa jiko lienyi.

¹² Mwanangana David yevwa ngwo, Mwene Zambi hawahisa Obede Edome ni akwa jiko lienyi ni yimuna yenyi yeswe mumu ha mushete wa Usendo, mba yaya ni kuuchiza ku zuwo lia Obede Edome ni kuuneha mu limbo lia David ni uwahililo.

¹³ Muze malunga waze ambachile mushete wa Usendo-heenda shimbo jisambano, David yaamanyisa, yalambula Mwene Zambi mulambu wa kuji a ngombe ni chimbembe wa mwaka umuwika.

¹⁴ David yazala lume hina litoma lia chijila mu zalilo yenyi, yahangana kuhiana ni kuchichimieka Mwene Zambi.

¹⁵ Chenacho mwanangana ni Aisraele eswe akandukile ku Yerusaleme ni kukololoka ni uwahililo nikwimba yitavwi.

¹⁶ Muze we mushete himuuheta mu limbo, mwazovu wenyi Mikale, mwana wa mwanangana Saulu, yatalila mu kapenda, yamona mwanangana David kanahangana ni kutumbwoka, mba yamulelesa.

¹⁷ No yaaneha we mushete wa Usendo, yaaunangika homa liawo mu zuwo lia makubu haze mwanangana aululikilile. Neye yalambula Mwene Zambi milambu ya kwocha ni ya kulivwa nenyi.

¹⁸ Muze mwanangana hamanununa kulambula milambu, yawahisa atu mu jina lia Mwene Zambi Mukwa Ndundo Jeswe,

¹⁹ mba yaatetela eswe yakulia. Mutu mweswe lunga ni pwo mu Israele yamwaha mbolo yimuwika yimuwika, ni tumba ya yifwo ya kwocha, ni chindanda cha vinyu yumu. Hohene mutu ni mutu yaya ku zuwo lienyi.

²⁰ Muze David heza ni kuwahisa abi jiko lienyi, Mikale yamubatwiza, yamwamba ngwenyi: “Musono mwanangana wa Aisraele hafumanyisa jina lienyi. Halipwisa iye mwene ngwe chihepuke ha mwalwakachi ni kulifukula ku meso ja ana mapwo, tuvumbi twa akwa kuyula jenyi!”

²¹ Neye yamukumbulula ngwenyi: “Nahangananga ni kuchichimieka Mwene Zambi, yoze wangutongwele ni kusalakana tatenu ni akwa jiko lienyi ni kungupwisa mwanangana wa atu jenyi Aisraele. Mungunyongonona ni kuhangana nguchichimieke Mwene Zambi,

²² mungulilelesa nawa kuhiana. Yena muuhasa kunyonga ngwe, nguli wamokomoko, alioze ana mapwo waze wamba, kumaangulemesa kwo!”

²³ Mikale, mwana wa Saulu, kabwile ko ni mwana niumwe ndoo ni ku kufwa chenyi.