2 Samuel 5 - Mukanda Wa Zambi 1970

David yabwa mwanangana mu Israele ni mu Yuda

¹ Mwabwamuze, mavungu eswe ja Israele yeeza kuli David ku limbo lia Hebrone, yaamwamba ngwo: “Vulie mwanangana! Yetu eswe tuli mujingwa umuwika.

² Mwakawali, chibwe muze Saulu abwile mwanangana wetu, hindu te yenu nwakusongwela Aisraele mu jita, ni Mwene Zambi yanulakenya ngwenyi, yenu munukasongwela atu jenyi, munukabwa mukwa kwayula.”

³ Chenacho miata eswe a mu Israele ejile kuli mwanangana David ku Hebrone. Neye yakolesa no Usendo, no yaamuwayisa maji, mba yabwa mwanangana wa Israele.

⁴ David, muze amupwishile mwanangana, te habwa ni miaka 30. Mu wanangana yayula miaka 40.

⁵ Ku limbo lia Hebrone yayula Ayuda miaka shimbiali ni tukweji asambano, ni ku limbo lia Yerusaleme yayula Aisraele ni Ayuda miaka makumi atatu ni yitatu.

⁶ Tangwa yiliheta lize akatukile mwanangana David ni tujita twenyi hanga akase jita ku Yerusaleme. Ajebuse, waze te atwama ko, yaanyonga ngwo, mwanangana David kahashile kukumba limbo lino, yaamwamba ngwo: “Kuwahashile kunjila muno nihakepe. Chibwe tupuputa hanji yitonji maahasa kukuhuma.”

⁷ (Alioze mwanangana David yakumba limbo lio lia kukoleka Zione Haliabwila kaakulivuluka ngwo: “Limbo lia David.”)

⁸ Ha tangwa lizeliene mwanangana David yambila tujita twenyi ngwenyi: “Kukuli umwe yoze wakuvutwokela Ajebuse ngwe yami, yoze mahasa kwashiha, nyi? Nyi chocho, kandukenu mu kapila ka meya ni kwasa jita ni yitonji ni tupuputa waze.” (Kashika akwamba ngwo: “Tupuputa ni yitonji kaahashile kunjila mu zuwo lia Zambi.”)

⁹ Muze haakumba lie limbo liakukoleka, David yatwama mo, ni yaliluka jina ngwenyi: “Limbo lia David.” Mba yalitohwesa sali ni sali kubutuka haze alumbikile mavu ku sali lia mulundu ku chivumbuko.

¹⁰ Mwanangana yaya lume ni kutakama, mumu Mwene Zambi, Mukwa Ndundo Jeswe, yabwa hamwe nenyi.

¹¹ Mwanangana Hirame, wa ku limbo lia Tiru, yatumina mwanangana David mbunga ya miata ni mitondo ya sedru, ni akwa kusonga mabaya, ni akwa kubula mawe hanga atungile David zuwo.

¹² Mba David yasa chinyingi ngwenyi, kuma Mwene Zambi hakolesa wanangana wami mu Israele ni hanangamisa wanangana wami mumu hali atu jenyi.

¹³ Muze David hakatuka ku Hebrone haheta mu Yerusaleme, yambata mapwo akwo, yasema nawa ana a malunga ni a mapwo.

¹⁴ Wano e ana waze asemukinyine mu Yerusaleme: Shamua, ni Shobabe, ni Natane, ni Solomone,

¹⁵ ni Ibare, ni Elishua, ni Nefege, ni Jafia,

¹⁶ ni Elishama, ni Eliada, ni Elifelete.

Aisraele yaakumba Afilistia

¹⁷ Afilistia yeevwa ngwo, David haamupwisa mwanangana wa chifuchi cheswe cha Israele. Mba tujita two yaatuhuka akamukwate. Muze David hachivwa, yaya homa hamwe hakukoleka.

¹⁸ Afilistia yaaheta, yaalitanda mu chikulo cha Refaime.

¹⁹ David yahula Mwene Zambi ngwenyi: “Ngwase jita ni Afilistia, nyi? Muungukwasa ni kwakumba, nyi?” Mwene Zambi ngwenyi: “Ewa, asa koko! Mungukukwasa kwakumba!” ha.

²⁰ Hohene David yaya ku Bale Perazime, kwenako akumbilile Afilistia. Yamba ngwenyi: “Mwene Zambi halicholongoza mukachi ka akwa kole jami ngwe chize sanga lia meya liakupukuka.” Kashika kuma kuze akuvuluka ko ngwo: Bale Perazime.

²¹ Muze Afilistia haachina, yaahichika mahamba jo. Mba David ni tujita twenyi yaambata.

²² Afilistia yaahiluka, yaalitanda nawa mu chikulo cha Refaime.

²³ Mwanangana yahula nawa Mwene Zambi, neye yamukumbulula ngwenyi: “Kanda washila jita sali lino, alioze ajingile kunyima ku mitondo balsame.

²⁴ Muze muwivwa lushindo ha masongo ja mitondo, mba hiasa jita, mumu yami mungutetekela kulutwe lie ni kukumba tujita twa Afilistia.”

²⁵ Neye yalinga ngwe chize amulwezele kuli Mwene Zambi, yahanga Afilistia chize ku limbo lia Geba ndoo ku limbo lia Gezere.