2 Samuel 4 - Mukanda Wa Zambi 1970

Atu yaashiha mwanangana Ishboshete

¹ Muze mwanangana Ishboshete hevwa ngwo, Abnere haamushiha mu limbo lia Hebrone, yevwa lume ni mu moko kekee, ni Aisraele eswe yaalishimwoka.

² Mwanangana Ishboshete yabwa ni miata aali a tujita. Majina jo Bana ni Rekabe, ana ja Rimone, a ku limbo lia Berote, a ku vungu lia Benjamine, (Berote kakulialwila ku vungu lia Benjamine.

³ E akwa Berote, waze te atwama ko hatangu, yaachinyina ku chihunda cha Gitaime, kwenako atwama ndoo ni musono.)

⁴ Mutu mukwo wa ku vungu lia mwanangana Saulu wabwile Mefiboshete, mwana wa Jonatane, te habwa ni miaka yitano muze Afilistia ashihile mwanangana Saulu ni Jonatane. Muze sango jo hijaheta ku limbo lia Jezrele, ndeji yenyi yamwanda hanga amuchinyise. Alioze muze azombokele fuji kuhiana, mwe mwana yaholoka, yabwa chitonji.

⁵ Rekabe ni Bana yaakatukila, yaaya ku zuwo lia Ishboshete, yaaheta ko tangwa ha muchima, muze te anabombo ni kuhwima mu zuwo lienyi.

⁶ Pwo yoze te wakufunga chikolo yahonga ha kuzungula tiriku, yaya mu tulo. Kashika ahashile kunjila mu zuwo.

⁷ Mba yaanjila mu zuwo lia mwanangana lia kubomba, yaamushiha, yaamubatula mutwe, yaaya nawo, yeenda ufuku weswe ndusu mu chikulo cha Yordau.

⁸ Yaatwala we mutwe kuli mwanangana David ku Hebrone, yaamba ngwo: “Uno we mutwe wa Ishboshete, mwana wa mukwa kole yenu Saulu, yoze wafupile kunushiha. Musono Mwene Zambi hanukala kuli Saulu ni kuli akwa jiko lienyi.”

^9-11 Mwanangana David yakumbulula ngwenyi: “Kanganda yoze wejile kuli yami ku Ziklage ni kungulweza sango ja kufwa cha mwanangana Saulu, yanyonga ngwenyi, namunehena sango jibema. Namukwachile, yingumushiha. Chino che kukundulula chenyi ha sango jenyi jibema. Ni mwe Zambi ya mwono, yoze wangulamwinyine ku utoji, lamba liahiana mulibwa hali yingulungulu waze haashiha mukwa kusamba yoze te unabombo mu zuwo lienyi! Mungumukala kuli yenu waze hinwamushiha ni kununongesa hano hashi!”

¹² Neye yambila tujita twenyi. No yaashiha Bana ni Rekabe, yaabatwola moko ni molu, yaayisukika hehi ni chitende cha Hebrone. Alioze yaanda mutwe wa mwanangana Ishboshete, yaaufunda mu fuka lia Abnere ku Hebrone.