2 Samuel 3 - Mukanda Wa Zambi 1970

¹ Jita yabwile ya miaka yinji hakachi ka vungu lia Saulu ni lia David. David yaya lume ni kutakama, alioze akwa kulitachika nenyi yaalekumuka.

Ana ja mwanangana David a malunga

² Wano e ana a malunga asambano a mwanangana David waze asemukinyine mu limbo lia Hebrone: Amnone, naye Ahinoame, wa ku limbo lia Jezrele;

³ ni Chileabe, naye Abigaile, yoze ahichikile Nabale, wa ku limbo lia Karmele, ni Absalome, naye Maka, mwana wa mwanangana Talmai wa ku chifuchi cha Geshure;

⁴ ni Adonija, naye Hagite; ni Shefatia, naye Abitale;

⁵ ni Itreame, naye Egla. Wano eswe e asemukinyine mu Hebrone.

Mwata Abnere yalinunga ni mwanangana David

⁶ Ha matangwa eswe a jita hakachi ka vungu lia Saulu ni lia David, mwata Abnere yalitakamisa mukachi ka waze abwile ku sali lia Saulu.

⁷ Saulu wabwile ni temena yenyi Rizpa, mwana wa Aya. Limwe tangwa Ishboshete yahula mwata Abnere ngwenyi: “Mumu yika hiwalimona ni pwo lia tata Saulu?”

⁸ Mwata Abnere yalikasa wuli unji ngwenyi: “Kuma yena Unanyongo ngwe, yami nguli kawa, nyi? Kafwa ngwe nakulingila Ayuda, nyi? Hanji ngwe, ngunahase kukunjika vungu lia mwanangana Saulu, nyi? Chize ku kabutu, yami nguli mukwa kushishika ku chikuma cha tatenu Saulu, ni ana akwo, ni masepa jenyi, hingunanulamwina hanga mwanangana David kechi kunukumba; hindu musono unangusumu mulonga wa pwo!

^9-10 Mwene Zambi hanalakenya ngwenyi, David makatambula wanangana wa Saulu ni vungu lienyi, ni kupwisa David mwanangana wa Aisraele ni Ayuda, chize ku songo limwe lia chifuchi ndoo ku songo likwo. Nyi chamukwashile kuhinga, Mwene Zambi angulambe ngufwe!”

¹¹ Mwanangana Ishboshete yevwila mwata Abnere woma, hikahashile ko nawa kuhanjika liji likwo.

¹² Ha matangwa waze mwanangana David te kali ku Hebrone. Mwata wa tujita Abnere yamutumina tunganda ngwenyi: “Iya mayula chifuchi chino? Likundenu ni yami, mba ngunukwase kununga Aisraele eswe kuli yena.”

¹³ Mwanangana David ngwenyi: “Chinabeme! Mungulikunda ni yena, alioze Chuma chimuwika ngunakwambe ngwami, muze muwiza ni kungunangisa, nyi kuwangunehenene pwo liami Mikale, mwana wa Saulu, kuuchi kumona meso jami.”

¹⁴ Yatumina nawa Ishboshete tunganda ngwenyi: “Nguhilwishile pwo liami Mikale, yoze nambachile ni chihako cha mishosha ya Afilistia 100.”

¹⁵ Chenacho mwanangana Ishboshete yatambula Mikale kuli lunga lienyi Paltiele, mwana wa Laishe.

¹⁶ Paltiele yakaula pwo lienyi ndoo ku chihunda cha Bahurime ni kulila. Alioze muze mwata Abnere hamwamba ngwenyi: “Hiluka kwe, yako ku mahienu,” yahiluka.

¹⁷ Mwata wa tujita Abnere yaya kuli miata ja Aisraele nikwamba ngwenyi: “Hasuku nwazangilile David kubwa mwanangana wenu.

¹⁸ Haliabwila iwulukenu chize Mwene Zambi ambile ngwenyi: ‘Mungukalamwina Aisraele ku tachi ja kavumbi kami David, kuli Afilistia ni kuli akwa kole jo eswe.’ ”

¹⁹ Mwata Abnere yahanjika nawa ni akwa vungu lia Benjamine, mba yaya ku Hebrone ni kulweza mwanangana David yize Aisraele ni a Benjamine haatayiza kulinga.

²⁰ Muze mwata Abnere heza kuli mwanangana David ku Hebrone hamwe ni malunga makumi aali, mwanangana yaalingila chiteleka.

²¹ Abnere yashika mwanangana ngwenyi: “Haliabwila ngunayi ni kununga Aisraele eswe ku wanangana we. Maakanutayiza kubwa mwanangana wo, mba munuyula chifuchi cheswe ngwe chize nwazangile.” Hohene mwanangana yashika mwata Abnere, neye yaya ni sambukila.

Joabe yashiha Abnere

²² Mwabwamuze, mwata Joabe ni tujita akwo a mwanangana David yaakatuka ku jita, yaaneha ubite unji uze abubile. Mwata Abnere te hakatuka kulu ku Hebrone, mumu mwanangana David hamushika kulu ngwenyi, aye ni uhwimino.

²³ Muze Joabe ni tujita twenyi haaheta, atu yaamulweza ngwo: “Abnere kezanga kuli mwanangana David, neye hamushika ngwenyi, aye ni uhwimino.”

²⁴ Mba mwata Joabe yaya kuli mwanangana, yamwamba ngwenyi: “Kuchi walinga chino? Abnere kezanga kuli yenu. Kuchi nwamwechanga nikuya chichize?

²⁵ Kezanga kuli yenu ni kunwonga ni kunyingika yuma yeswe yize nwakulinga ni kweswe kuze nwakuyaya. Mwene nunachinyingika!”

²⁶ Muze Joabe hakatuka kuli mwanangana, yatuma tunganda ha kuhilwisa Abnere, no yaamuwana ku shima lia Sira, alioze mwanangana David kachinyingikine ko.

²⁷ Muze Abnere haheta ku Hebrone, Joabe yaya nenyi ku lumbu lia chikolo, yalionga ngwe kanambe kumuhanjikishila ku tenga, alioze yamutuwa ha jimo. Chenacho ashihile mwata wa tujita Abnere, mumu neye washihile mwanakwo Asahele.

²⁸ Muze mwanangana hevwa sango jino, yamba ngwenyi: “Mwene Zambi kananyingika ngwenyi, yami ni akwa wanangana wami tunasambe kwetu ku kufwa cha Abnere, mwana wa Nere.

²⁹ Mulonga uno ukabwa kama hali Joabe ni hali akwa jiko lienyi eswe! Ku Chisemuko ni Chisemuko kukabwa kama umwe lunga yoze makabwa ni yikola ya utanji, hanji musongo ukalu wa ha chikowa, (mbumba) hanji yoze makalinga lume milimo ya mapwo, hanji yoze makafwa mu jita, hanji yoze makahona yakulia!”

³⁰ Chenacho mwata Joabe ni mwanakwo Abishai akalile mwanakwo a Asahele, yoze mwata Abnere ashihile mu jita ku limbo lia Gibeone.

Atu yaafunda Abnere

³¹ Mba mwanangana David yambila mwata Joabe ni atu jenyi atanune mahina jo, azale mianji, hanga alile mwata Abnere. Muze te anayi ni kumufunda mwanangana David iye mwene yakaula kunyima lia muhango.

³² Yaamufunda ku limbo lia Hebrone. Mwanangana yamulila mbimbi, ni atu jenyi eswe yaalila.

³³ Mwanangana yemba lungungu yono ngwenyi: “Mumu yika mwata Abnere hafwa chichize ngwe chihepuke?

³⁴ Moko jenyi kaakashile ko. Molu kaasele ko mu kuli. Wafwa lume ngwe yoze haashiha kuli yingulungulu!” Atu eswe yaamulila nawa.

³⁵ Tangwa heswe atu yeezaza ni kulembejeka mwanangana David hanga alie kama chimwe Chuma, alioze iye yalishinga ngwenyi: “Mwene Zambi angushihe nyi nalia chimwe Chuma shimbu tangwa kanda lichitoka!”

³⁶ Atu eswe yaasa ho chinyingi, ni yaachitayiza. Kuma yeswe yize mwanangana alingile, atu yaayitayiza.

³⁷ Atu ja mwanangana David eswe ni Aisraele, eswe yaasa chinyingi ngwo, mwanangana kanasambe kwenyi ha kufwa cha Abnere.

³⁸ Mwanangana yambila atu jenyi ngwenyi: “Kuchalumbunukine kuli yenu ngwo, musono mutu munene wafwa mu Israele, nyi?

³⁹ Chibwe yami nguli mwanangana yoze Zambi awayishile maji, hindu musono hinalekumuka. Ngunamono ngwami, ana malunga wano ja Zeruya kaali akalu kuhiana. Mwene Zambi amwese kama yingulungulu wano lamba nikulita ni yibi yo!”