2 Samuel 24 - Mukanda Wa Zambi 1970

Mwanangana David yalula atu eswe

¹ Mwene Zambi yevwila nawa Aisraele ufwatulo, mba yashinjika mwanangana David akaabinjise. Yamwamba ngwenyi: “Yako walule Aisraele ni Ayuda.”

² Kashika mwanangana yambila Joabe, mwata wa tujita ngwenyi: “Yako ku mavungu eswe a Israele, chize ku limbo lia Dane ku norde ndoo ku limbo lia Bersheba ku sude, walule atu. Ngunazange kunyingika kwoka cho.”

³ Alioze mwata Joabe yamukumbulula ngwenyi: “Vulie mwanangana! Mwene Zambi awezele kama hali Aisraele kwoka cha atu yisuho kulakaji, ni yenu mwanangana nuchimone kama ni meso jenu. Alioze kuchi mba, yenu mwanangana, nunazange kulinga Chuma chino?.”

⁴ Hindu mwanangana yashinjika Joabe ni akwa lutwe jenyi kuchilinga. Chenacho akatukile ku meso ja mwanangana, yaaya ni kwalula Aisraele.

⁵ Yaazauka Yordau, yaajika musumba ku sude ya Aroere, limbo lia mukachi ka chikulo, mu chifuchi cha Gade. Chize kuze, yaaya ku norde ndoo ku limbo lia Jazere,

⁶ ndoo ku chifuchi cha Gileade, ni ku limbo lia Kadeshe mu chifuchi cha Ahite. Mba yaaya ku limbo lia Dane. Mwakatuka ko, yaaya ku chitokelo ku limbo lia Sidone.

⁷ Mba yaaya ku sude ku limbo liakukoleka lia Tiru, ni ku membo eswe ja Ahive ni Akanana, ndoo ku limbo lia Bersheba ku sali lia sude mu Yuda.

⁸ Muze tukweji livwa ni matangwa makumi aali haabalika, yaaheta ku limbo lia Yerusaleme, te heendangana mu chifuchi cheswe.

⁹ Yaatwala sango kuli mwanangana ja kwoka cha malunga waze te maahasa kwasa jita: mu Israele 800,000, mu Yuda 500,000.

¹⁰ Muze mwanangana halula e atu, yabutuka kulibikala mu mbunge, yaliondela kuli Mwene Zambi ngwenyi: “Navulumuna mulonga unene Wahiana muze nalinga Chuma chino! Nalemba ngukonekene kama mwane. Nalinga uhepuke.”

^11-12 Mwene Zambi yambila Gade, mukwa munanyi wa Zambi kanda wa David, ngwenyi: “Yako ulweze David ngwe, namwaha yuma yitatu, atongole cheswe chize mazanga. Mungumulingila cheswacho matongola.” Ha chichamene, muze mwanangana David hahinduka,

¹³ mwe Gade yaya maha mwanangana, yamulweza yize Mwene Zambi ambile, yamuhula ngwenyi: “Chika munuzanga? Miaka yitatu ya zala mu chifuchi chenu? Hanji kuchina akwa kole jenu tukweji atatu? Hanji matangwa atatu a chipuho chikalu mu chifuchi chenu? Haliabwila hinyongenu, nungulweze chize mungukumbulula kuli Mwene Zambi.”

¹⁴ Mwanangana ngwenyi: “Nguli ngwe wakukasa! Alioze Chazangile angumwese lamba kuli atu. Chinalite angumwese lamba kuli Mwene Zambi iye mwene, mumu kali mukwa keke.”

¹⁵ Kashika Mwene Zambi yatuma chipuho chikalu mu Israele, chize ku chichamene ndoo ha tangwa lize atongwele. Yikufwa 70,000 mu Israele, chize ku Dane ku norde ndoo ku Bersheba ku sude.

¹⁶ Muze kanganda ka Mwene Zambi hanyonga kwonona akwa Yerusaleme, Mwene Zambi yalumuna mbunge yenyi, yambila kanganda yoze te unashihi atu ngwenyi: “Litwamine! Hikwahwa!” Mwe kanganda te uchili ku chizungwilo cha Arauna, mukwa Jebuse.

¹⁷ Mwanangana yamona mwe kanganda yoze te unashihi atu, mba yambila Mwene Zambi ngwenyi: “Chivulumunyi yami. Yami mwe ngunakalinga chibi. Mba wano atu ja mbala chika alinga kama? Chinalite ungumwese yami lamba hamwe ni akwa jiko liami.”

¹⁸ Ha tangwa lizeliene, mukwa munanyi Gade yaya maha mwanangana, yamwamba ngwenyi: “Yako ku chizungwilo cha Arauna, utungile ko Mwene Zambi chilumbilo.”

¹⁹ Mwanangana yononoka ku maliji ja Mwene Zambi, yaya ngwe chize amulwezele kuli mukwa munanyi.

²⁰ Mwe Arauna yatala, yamona mwanangana kaneza ni atu jenyi, yafulamana ku meso ja mwanangana,

²¹ yahula ngwenyi: “Vulie mwanangana! Mumu yika nwejila kuno?” Mwanangana ngwenyi: “Tuneza ni kulanda chizungwilo che ni kutungila Mwene Zambi chilumbilo, mba hanga chipuho chino chihwe.”

²² Arauna yamba ngwenyi: “Vulie mwanangana! Chitambulenu, lambulenu Mwene Zambi cheswacho munuzanga. Ngombe a mulambu wa kwocha wano. Makanga jo ni mabaya a kuzungwila no a kutenga kunyi wano.”

²³ Arauna yahana yeswe kuli mwanangana, yamba ngwenyi: “Mwene Zambi atambule kama mulambu wenu.”

²⁴ Alioze mwanangana yakumbulula ngwenyi: “Hi chocho ko, munguyilanda. Chichi kulambula Mwene Zambi yami milambu yize kuyafwikile nichimwe.” Mba yalanda che chizungwilo ni e ngombe ni ndando ya mbongo ja prata makumi atano.

²⁵ Mba mwanangana David yatungila Mwene Zambi chilumbilo, yochela ho milambu ya kwocha ni milambu ya kulivwa ni Zambi. Hohene Mwene Zambi yakumbulula ku kulemba cha mwanangana, chipuho chikalu yichihwa mu Israele.