2 Samuel 23 - Mukanda Wa Zambi 1970

Maliji akusula a mwanangana David

¹ David, mwana wa Jese, te kali mutu yoze alemesene kuli Zambi, yoze atongwele kuli Zambi ya Yakoba akabwe mwanangana, yoze te wakutomba miaso yibema mu Israele. Wano e maliji jenyi akusula:

² Mwiku wa Mwene Zambi wakuhanjika muli yami. Maliji jenyi kaali mu kanwa liami.

³ Zambi ya Israele hanahanjika, kafunga ka Israele hanangwambe ngwenyi: “Mwanangana yoze wakuyula ni ululi yoze wakuyula ni kulemesa Zambi,

⁴ kali ngwe tangwa muze liakuvumbuka ha chichamene nyi kukushi malelwa, uze wakutwila ha yambu muze vula hanoka.”

⁵ Chenacho Mwene Zambi makawahisa vungu liami, mumu hanakolesa Usendo wa miaka yeswe ni yami, uze kuuchi kafwa nichimwe, chilakenyo chize kuchahashile kwalumuka. Yino ye nakuzanga, che muchikabwa kukumba chami, Zambi makachitayiza chamwenemwene.

⁶ Alioze atu abi kaali ngwe mbimbo jize haambila, niumwe kahashile kujikwata ni moko.

⁷ Ha kujikwata shina ubwe ni chikundo cha utale hanji kunga; kumaakoocha ha kahia bwililii.

Tujita twa mwanangana David a lufuma

⁸ Wano e majina a tujita twa mwanangana David a lufuma: mutangu Joshebe Basebete wa ku Takemone, mwata mukachi ka “Miata Atatu a Tujita.” Yasa jita ni tujita 800, yaashiha eswe ni kunga lienyi ha chisuho chimuwika.

⁹ Wa muchaali wa mukachi ka e “Miata Atatu a Tujita,” Eleazare, mwana wa Dodo, wa ku jimo lia Ahohi. Limwe tangwa iye ni mwanangana David yaachoka Afilistia waze akungulukile ku jita. Aisraele te haachina,

¹⁰ alioze Eleazare yamana ni kwasa no jita ndoo kwoko lienyi yilikala mbee ku mukwale, kahashile ko kulitusula. Mwene Zambi iye mwene wakwashile kukumba ha tangwa lize. Muze jita hiyahwa Aisraele yaahiluka kuze abwile, Eleazare, yaabuba yuma ya Afilistia waze afwile.

¹¹ Wa muchitatu hakachi ka e “Miata Atatu a tujita” Shama mwana wa Age, wa ku Harara. Afilistia te haakunguluka ku Lehi, kuma kuze kwabwile munda wa makunde. Aisraele yaachina,

¹² alioze Shama yamana mu munda, yasashila mo, yashiha Afilistia. Mwene Zambi iye mwene wakwashile kukumba ha tangwa lize.

¹³ Limwe tangwa ha kabutu ka kubatula mbuto, miata atatu a ku mbunga ya “Tujita Makumi Atatu” yaaya ku chivwenge cha Adulame, kuze abwile mwanangana David, muze te mbunga ya Afilistia ali mu chikulo cha Refaime.

¹⁴ Ha matangwa waze mwanangana David yabwa kumwe kuma kwakukoleka, ni mbunga ya Afilistia te kaali mu limbo lia Betleheme.

¹⁵ Mwanangana yevwa usona wa kuya ku mahio, kashika, yamba ngwenyi: “Iya mangunehena kama amwe meya a ku shima lia ku chikolo cha Betleheme?”

¹⁶ E miata atatu yaaya ni hamu lio ndusu mu musumba wa Afilistia, yaataha meya ku shima, yaatwala kuli mwanangana David. Alioze David kaanwine ko, yaazujila hashi ngwe mulambu kuli Mwene Zambi,

¹⁷ yamba ngwenyi: “Mwene Zambi, chichi kunwa meya wano nihakepe! Nyi ka, muchibwa ngwe kunanwa manyinga ja atu waze haakunjika mwono wo ku kufwa!” Chenacho alitunyine kwaanwa. Yenayo alingile miata waze atatu a lufuma.

¹⁸ Abishai, mwanakwo ya mwata Joabe, naye te Zeruya, yabwa mwata wa “Tujita Makumi Atatu.” Yasa jita ni tujita 300, yaashiha eswe ni kunga lienyi ha chisuho chimuwika, mba yabwa kajita wa lufuma mukachi ka “Tujita Makumi Atatu.”

¹⁹ Yafumana kuhiana mukachi ka “Tujita Makumi Atatu” te mwe mwata wo. Chibwe chocho kabwile ko ni lufuma ngwe “Miata Atatu a Tujita.”

²⁰ Benaya, mwana wa Jehoyada wa ku limbo lia Kabzele, yabwa kajita mukwo wa lufuma. Yalinga yuma yinji ya hamu mu jita, yashiha tujita aali a tachi a ku chifuchi cha Moabe. Limwe tangwa ha mwaka wa chishika muze neve (neige) hiyanoka hashi, yanjila mu wina, yashiha tambwe.

²¹ Yashiha nawa umwe mukwa Egiptu, lunga munene wataluka, te kali ni kunga. Alioze Benaya yamulinjika ni mulumbu, yamuchangumuna lie kunga, yamushiha nalio.

²² Yino ye yitanga ya hamu ya Benaya, umwe wa kuli “Tujita Makumi Atatu.”

²³ Yafumana mukachi ko. Chibwe chocho kabwile ko ni lufuma ngwe waze “Miata Atatu a Tujita.” Mwanangana David yamupwisa mwata wa tujita waze te akumufunga.

^24-39 Malunga akwo a ku mbunga ya “Tujita Makumi Atatu” wano: Asahele, mwanakwo ya mwata Joabe Elhanane, mwana wa Dodo wa ku Betleheme Shama ni Elika, a ku Harode Heleze, wa ku Pelete Ira, mwana wa Ikeshe wa ku Tekoa Abiezere, wa ku Anatote Mebunai, wa ku Husha Zalmone, wa ku Ahohe Maharai, wa ku Netofa Helebe, mwana wa Bana wa ku Netofa Itai, mwana wa Ribai wa ku Gebea mu Benjamine Benaya, wa ku Piratone Hidai, wa ku yikulo hehi ni Gasha Abialbone, wa ku chifuchi cha Araba Azmavete, wa ku Bahurime Eliaba, wa ku Shalbone Ana malunga ja Jashene Jonatane Shama, wa ku Harare Ahiame, mwana wa Sharare wa ku Harare Elifelete, mwana wa Ahasbai wa ku Maka Eliame, mwana wa Ahitofele wa ku Gilo Hezro, wa ku Karmele Parai, wa ku Arabe Igale, mwana wa Natane wa ku Zoba Bani, wa ku chifuchi cha Gade Zeleke, wa ku chifuchi cha Amone Naharai, wa ku Berote, yoze te wakumbachila Joabe yitwa ya jita Ira ni Garebe, a ku Jatire Uria, Kahite. Tujita a lufuma eswe abwile makumi atatu ni shimbiali.