2 Samuel 22 - Mukanda Wa Zambi 1970

Mwaso wa kukumba

¹ Muze Mwene Zambi hamulamwina ku moko ja mwanangana Saulu ni kuli akwa kole jenyi, mwanangana David yahalisa Mwene Zambi ni mwaso uno:

² Mwene Zambi kali liwe liami, limbo liami liakukoleka, mukwa kungupulula.

³ Zambi yami kali liwe liami lia tachi, muli iye nakuswama. Kali lukebwe wami, mbinga ya ulamwino wami, zuwo liami lisuku liakukoleka, chiswamo chami, chilamwina chami, yoze wakungulamwina ku utoji.

⁴ Nakutambika Mwene Zambi, kakungulamwina kuli akwa kole jami. Mwene Zambi afumane!

⁵ Miavu ya kufwa yiingujingilika, masanga a kwonona yaangufuka.

⁶ Utoji wa kufwa yiungulimba, fuka yilingutela muheto.

⁷ Mu lamba liami yingutambika Mwene Zambi, yingutambika Zambi angukwase. Neye yevwa liji liami mu zuwo lienyi, yabanjika muteto wami, yangukwasa.

⁸ Mba hashi yihanyika ni kuchikima, lilu yilinyika ni kuchikima mumu ha utenu wenyi!

⁹ Mwishi yiukakumuka mu mazulu jenyi, milengi ya kahia ni makala yiilengenya mu kanwa lienyi.

¹⁰ Yatandulula lilu ni tachi, yahulumuka hashi, ku yiliato yenyi yikubwa lelwa lia milima bwii.

¹¹ Yenda ni tambu hali akwa mwono a mwilu, yendela ha mapulwa ja fuji.

¹² Yalifuka milima, malelwa a ndama a vula yaamujingilika.

¹³ Mihenyo ya njaji yiibeyima kulutwe lienyi.

¹⁴ Mba Mwene Zambi yakulunguza mwilu, liji lia Mwene Zambi Mukwa Ndundo Jeswe yilihiohia.

¹⁵ Yaasa mivwi yenyi, yamwanga akwa kole jenyi, yaahanga ni mihenyo ya njaji.

¹⁶ Ha mashima ja kalunga lwiji yihasoloka, fundamentu ja hashi yijifukuka, muze Mwene Zambi abajilile akwa kole jenyi, muze aafujile mwiku wa mu mazulo jenyi.

¹⁷ Mwene Zambi mwilu yanguzozela kwoko, yangutuhwisa mu meya ajotoka.

¹⁸ Yangulamwina ku moko ja akwa kole jami a tachi, kuli eswe waze te akunguvutwokela, anguhiana tachi.

¹⁹ Muze namwene lamba, akwa kole yaangulundumukina, alioze Mwene Zambi yangufunga.

²⁰ Yangutuhwisa, yangusa ha toma, yangulamwina mumu te kakuwahilila ni yami.

²¹ Mwene Zambi kakungukundulula mumu nakulinga yize yinalite, kakunguwahisa mumu Chishi kwami chitela.

²² Yingufunga Shimbi ja Mwene Zambi, chapiangukile kuli Zambi yami.

²³ Hingunafungu Shimbi jenyi jeswe, chalitunyine ko yiyulo yenyi.

²⁴ Kananyingika ngwenyi, Chishi kwami chitela, nakulifunga ku yibi.

²⁵ Kakungukundulula mumu nakulinga yize yinalite, mumu kananyingika ngwenyi, Chishi kwami mulonga.

²⁶ Aa Mwene Zambi, wakubwa mukwa kushishika kuli akwa kushishika, wakubwa mukwa ululi kuli akwa ululi.

²⁷ Wakulisolola munangi kuli akwa kulinanga, alioze wakulimika ni yingulungulu.

²⁸ Wakulamwina akwa kulikehesa, alioze wakukehesa akwa kulengumuka.

²⁹ Mwene Zambi, yena uli ndeya yami, wakuchiza milima yami.

³⁰ Ku tachi je nakuhasa kukumba mbunga ya tujita, nakutumbuka yipanga yo.

³¹ Yitanga ya Zambi yili lume yibema, maliji jenyi kaali amwenemwene. Zambi kali lukebwe wa eswe waze aswama muli iye.

³² Mwe Zambi iya? Mwene Zambi wika. Lie liwe iya? Shina Zambi wika.

³³ Zambi kali chiswamo chami cha tachi, kakululika jila yami kanawa.

³⁴ Kakukolesa molu jami ngwe a kai, kakungufunga kanawa ha milundu.

³⁵ Kakungulongesa kwasa jita, kashika nakuhasa kunana uta wa tachi.

³⁶ Aa Mwene Zambi, lukebwe we kakungulamwina, Ku kukwasa che hiwangupwisa mutu munene.

³⁷ Wakukolesa tusendengele twami, chatalingile nichimwe.

³⁸ Nakuhanga akwa kole jami ni kwakumba, Chishi kuhwima ndoo hinoonona.

³⁹ Nakwalimbwila hashi, keeshi kuhasa kukatuka, kaakubomba hashi ku molu jami.

⁴⁰ Wakungujichika muya hanga ngwase jita, wakunguhombwesela akwa kole jami.

⁴¹ Wakunguhangila akwa kole jami, nakwonona waze akunguvutwokela.

⁴² Kaakufupa chilamwina, alioze keeshi kumona niumwe; kaakutambika Mwene Zambi, alioze keeshi kwakumbulula.

⁴³ Nakwafwenya, kaakubwa ngwe fufuta ya hashi, nakwaliata ngwe malowa a mu jila.

⁴⁴ Hiunangulamwina kuli atu jami waze ungukatukila, hiunangukolesa kuyula mavungu; atu waze te Chanyingikine haabwa enya chifuchi.

⁴⁵ Yilambala kaakuliumba ku meso jami, muze akwivwa liji liami kaakungwononokena.

⁴⁶ Keeshi kubwa nawa ni hamu, kaakutuhuka mu membo jo akukoleka ni kuchikima.

⁴⁷ Mwene Zambi kwali! Hako yami afumane! Ambujolenu unene wa Zambi ya Ndundo yoze wakungulamwina!

⁴⁸ Iye mwe Zambi yoze wakungukala, kakuzeyesela mavungu kuli yami,

⁴⁹ kakungulamwina kuli akwa kole jami. Mwene Zambi, wakungukwasa kukumba akwa kole jami, wakungufunga kuli akwa kushiha atu.

⁵⁰ Kashika nakukuchichimieka hakachi ka mavungu, nakukwimbila uhaliso.

⁵¹ Zambi kakukwasa mwanangana wenyi kukumba kuhiana, kakulweza zango lienyi lize kulishi kuhwa kuli yoze hanatongola, kuli David ni ku vungu lienyi ku miaka yeswe.