2 Samuel 21 - Mukanda Wa Zambi 1970

Akwa Gibeone yaashiha vungu lia Saulu

¹ Ha matangwa ja kuyula cha mwanangana David, kwabwile zala yinji miaka yitatu. Kashika mwanangana yalemba kuli Mwene Zambi hakutwala ku zala yize. Neye yamukumbulula ngwenyi: “Chuma chino chinakatuka ku uhiso wa Saulu ni akwa jiko lienyi, mumu ashihile akwa limbo lia Gibeone.”

² (Akwa Gibeone, hi Aisraele ko, te mbunga yikepe ya Aamore waze Aisraele alakenyene kwafunga. Alioze Saulu yafupa kwashiha mumu iye mwene yalihana liakulu kuli Aisraele ni Ayuda.)

³ Kashika mwanangana David yatambika akwa Gibeone, yaahula ngwenyi: “Chika Changutamba kunulingila? Mumu ngunazange kuchiza yibi yize anulingile, hanga nuwahise kama atu ja Mwene Zambi.”

⁴ Akwa Gibeone ngwo: “Vulie mwanangana! Mulonga wetu ni mwanangana Saulu ni akwa jiko lienyi kuwahashile kuhwa ni prata hanji oru, hanji kushiha amwe Aisraele, ka.” Mwanangana ngwenyi: “Mba chika nunazange hanga ngunulingile?”

⁵ No yaakumbulula ngwo: “Vulie mwanangana! Mwanangana Saulu wazangile kutwonona yetu eswe mu Israele, kuhichika ho niumwe ni mwono ka.

⁶ Kashika twehenu malunga shimbiali a ku jiko lienyi hanga twasukike ku Gibea, ku meso ja Mwene Zambi, mu limbo lia Saulu, mwanangana yoze Mwene Zambi atongwele.” Mwanangana David ngwenyi: “Mungunukunjikoo.”

⁷ Alioze mumu ha chilakenyo chize alilakenyene ni Jonatane, David yachiza ko mujikulu wa Saulu, Mefiboshete, mwana wa Jonatane.

⁸ Henaho mwanangana yakwata Armoni ni Mefiboshete, ana aali a malunga a Rizpa, mwana yoze Saulu asemene ni Aya. Yakwata nawa ana atano a malunga a mwana pwo wa Saulu, Merabe, waze asemene ni Adriele, mwana wa Barzilai wa ku chihunda cha Mehola.

⁹ Mwanangana yaakunjika kuli akwa Gibeone. No yaasukika ha mulundu ku meso ja Mwene Zambi. Eswe shimbiali yaafwila hamuwika. Chabwile ha kubutuka cha matangwa waze akubatula mbuto.

¹⁰ Rizpa mwana wa Aya, chihalika cha mwatamwali wa mwanangana Saulu yanda mwanji, yalifuka wo, yatwama ha liwe haze habwile e afu. Yatwama ko, chize ku kubutuka kubatwola to ndoo ku vula musazu. Ha mwalwa te kakuhuma tujila, ni ha ufuku te kakuhuma tushitu a mu yambu.

¹¹ Muze mwanangana hevwa chize Rizpa halinga,

¹² yaya, yatambula yifwaha ya Saulu ni ya mwanenyi Jonatane kuli atu a mu limbo lia Jabeshe mu chifuchi cha Gileade. (Mumu akwa Jabeshe te heeya yifwaha yize yabwile hakachi ka limbo Bete Shane muze Afilistia aasukikile, ha tangwa lize aashihile ha mulundu wa Gilboa.)

¹³ Mwanangana yanda yifwaha ya Saulu ni mwanenyi Jonatane, yayichinga ni yifwaha ya waze shimbiali asukikile.

¹⁴ Mba atu yaafunda yifwaha ya Saulu ni mwanenyi Jonatane mu fuka lia Kishi tato ya Saulu, mu chihunda cha Zera mu chifuchi cha Benjamine. Yaalinga yeswe yize ambile mwanangana. Mba Zambi yabanjika ku yilemba yo hakutwala ku chifuchi cho.

Jita ni atu ataluka

¹⁵ Yikubwa nawa jita yikwo hakachi ka Afilistia ni Aisraele. Mwanangana David yahonga kuhiana mu jita.

¹⁶ Umwe mutu wataluka jina lienyi Ishbibenobe, te kanambata kunga lia unengu, kulema chalio kilo jitatu ni Chipinji, ni kanaswelela mukwale Waha. Yanyonga ngwenyi, mahasa kushiha mwanangana David.

¹⁷ Alioze mwata Abishai, mwana wa Zeruya, yeza ni kumukwasa, yalimika ni mwe mutu wataluka, yamushiha. Henaho tujita twa David yaalishinga ngwo: “Kunuchi kwiza kuya nawa ni yetu mu jita, kuchina ndeya ya Israele muyijima.”

¹⁸ Mwabwamuze, yikubwa nawa jita ni Afilistia ku Gobe. Mba Sibekai, wa ku chihunda cha Husha, yashiha nawa umwe mutu wataluka jina lienyi Safa.

¹⁹ Yikubwa jita yikwo ni Afilistia ku Gobe. Mba Elhanane, mwana wa Jaire wa ku limbo lia Betleheme, yashiha Goliate wa ku limbo lia Gate. Chikundo cha kunga lienyi, ndama yacho yinene ngwe mutondo wa mukwa kutunga mahina.

²⁰ Mba yikubwa nawa jita yikwo ku Gate. Umwe mutu wabwile ko wataluka, te mukwa kasambano ku moko ni ku molu, mukwa kuzanga jita.

²¹ Yachoka Aisraele. Mba Jonatane, mwanawa Shama, yayo ya mwanangana David, yamushiha.

²² Wano awana te a ku vungu lia atu ataluka a ku limbo lia Gate. Yaashiha kuli mwanangana David ni tujita twenyi.