2 Samuel 20 - Mukanda Wa Zambi 1970

Sheba yakatukila mwanangana David

¹ Yikubwa umwe mutu wamokomoko wa ku limbo lia Gilgale, jina lienyi Sheba, mwana wa Bikri wa ku vungu lia Benjamine. Yemba chitavwi, yakololoka ngwenyi: “Yetu ni David kukwahwa! Kutuchi kukaula mwana wa Jese! Yenu Aisraele, tuyenu ku mahietu!”

² Chenacho Aisraele alihandunwine ni mwanangana David, yaakaula Sheba. Alioze Ayuda yaalalaminya kuli mwanangana David, chize ku Yordau ndoo ku limbo lia Yerusaleme.

³ Muze David haheta ku zuwo lienyi mu Yerusaleme, yanda mapwo kumi waze asalile ni kufunga zuwo lia wanangana, yaasa mu limwe zuwo ni kwafunga. Yaaha yakulia, alioze kalimwene ko no. Yaafungila mo ndoo ku kufwa cho mu utwamishi.

⁴ Mwanangana yambila mwata Amasa ngwenyi: “Tambika malunga ja Ayuda, aswile kuno hamwe ni yena hamene alize.”

⁵ Neye yaya ni kwatambika, alioze yalaluka, kahetele ko ha tangwa lize ambile mwanangana.

⁶ Mba mwanangana yambila nawa mwata Abishai ngwenyi: “Tala, Sheba kumatubinjisa kuhiana Absalome. Anda tujita twami hanga numukaule. Nyi ka, kumanjila mu amwe membo akukoleka ni kutuchina.”

⁷ Kashika tujita twa Joabe, ni akwa kufunga mwanangana, ni tujita akwo eswe yaatuhuka mu Yerusaleme hamwe ni mwata Abishai, yaaya ni kuhanga Sheba.

⁸ Muze haaheta ku luliwe ku limbo lia Gibeone, mwata Amasa yaatakana. Mwata Joabe te hazala mahina a jita, ni yabwa ni mukwale mu muya wenyi. Muze te anayi kulutwe, we mukwale yiuholoka.

⁹ Mwata Joabe yameneka mwata Amasa ngwenyi: “Mwoyo mukwetu, kuchi, unahinduka?” Mba yamukwata ku wevu ni kwoko lienyi lia chindume hanga amushise.

¹⁰ Mwata Amasa te kakanyamine ko amone chize mwata Joabe ali ni mukwale mu kwoko lienyi likwo. Hohene mwata Joabe yamukulwila wo mu jimo, mba mijingwa yeswe yiituhuka, yiilumbama hashi. Yafwa lume hazehene, hi kamumanwine ko nawa. Mba mwata Joabe ni mwanakwo mwata Abishai yaaya ni kuhanga Sheba.

¹¹ Umwe wa kuli tujita twa Joabe yamana hehi ni Amasa nikukololoka ngwenyi: “Mutu mweswe yoze unazange mwata Joabe ni mwanangana David, akaule mwata Joabe!”

¹² Amasa te kanatunyu mu manyinga jenyi mukachi ka jila. Muze hamona chize atu eswe kaanamana ko ni kutala, mwe kajita wa mwata Joabe yakokela mufu mu yambu, yamufuka hina.

¹³ Muze hamuchiza mu jila, mutu mweswe yakaula mwata Joabe ni kuhanga Sheba.

¹⁴ Sheba yabalika ndusu mu chifuchi cheswe cha mavungu ja Aisraele ndoo ku limbo lia Abele Bete Maka. Mbunga yeswe ya Chikota cha Bikri yaakunguluka, mba yaamukaula mu limbo.

¹⁵ Tujita twa Joabe yeevwa ngwo, Sheba mu limbo ali. Yaajingilika lie limbo, yaalumbika mulumba wa mavu ku chipanga hanga ahase kunyina, yaabutuka nawa kushima kushi lia chipanga hanga achibuzwile hashi.

¹⁶ Mu limbo yimubwa umwe pwo wa mana, yakololoka helu lia chipanga ngwenyi: “Banjikenu! Banjikenu! Mulwezenu mwata Joabe eze kuno, ngunambe kuhanjika nenyi.”

¹⁷ Neye yaya ko. Pwo yamuhula ngwenyi: “Yena mwata Joabe, nyi?” Iye ngwenyi: “Ewa, yami mwene.” Pwo ngwenyi: “Mwata, ngubanjikenu, yami kavumbi kenu.” Neye ngwenyi: “Ngunabanjika.”

¹⁸ Mwe pwo ngwenyi: “Hasuku achiza nikwamba ngwo: ‘Yeenu nwivwe chiyulo ku limbo lia Abele?’ Yichibwa lume ngwe chize ambile.

¹⁹ Limbo lietu linene, lia uhwimino ni shindakenyo. Mumu yika unazange kulibuzula? Kuchi, unafupu kwonona limbo lia Zambi, nyi?”

²⁰ Joabe ngwenyi: “Ka, chichi kulibuzula ni kulionona nihakepe!

²¹ Wano hi manyonga jetu ko. Tunakaula mutu, jina lienyi Sheba, mwana wa Bikri wa ku chifuchi cha milundu ya Efraime. Halishinga kayanda alimike ni mwanangana David. Twehenu ye, mba tukatuke ku limbo.” Mwe pwo ngwenyi: “Ewa, mutunukongela mutwe wenyi helu lia chipanga.”

²² Mwe pwo yaya kuli atu a mu limbo ni mana jenyi. No yaatapa Sheba, yaakonga mutwe wenyi kuli mwata Joabe helu lia chipanga. Neye yemba chitavwi. Mba tujita twenyi eswe yaakatuka, yaahiluka ku mahio. Mwe mwata Joabe yahiluka ku Yerusaleme kuli mwanangana.

Akwa lutwe a mwanangana David

²³ Joabe yabwa mwata wa tujita eswe twa Aisraele; Benaya, mwana wa Jehoyada, mwata wa tujita waze te akufunga mwanangana David.

²⁴ Adonirame aye te mwata wa ndungo; Yehosafate, mwana wa Ahilude te mukwa lutwe wa kusoneka sango ja wanangana.

²⁵ Sheva mukwa lutwe wa akwa kusoneka; Zadoke ni Abiatare mahako a Zambi;

²⁶ Ira, wa ku chihunda cha Jaire, neye nawa te hako wa mwanangana David.