2 Samuel 2 - Mukanda Wa Zambi 1970

David yaamupwisa mwanangana mu Yuda

¹ Mwabwamuze, David yahula Mwene Zambi ngwenyi: “Munguhasa kuya ku limwe limbo lia Yuda ni kwayula nyi?” Mwene Zambi yamukumbulula ngwenyi: “Ewa, yako.” David yahula ngwenyi: “Ku limbo lika?” Mwene Zambi ngwenyi: “Ku Hebrone.”

² Chenacho David ayile ku Hebrone hamwe ni mapwo jenyi aali: Ahinoame, yoze wa ku limbo lia Jezrele, ni Abigaile, yoze ahichikile Nabale wa ku limbo lia Karmele.

³ Yaya nawa ni atu jenyi ni akwa majiko jo, yaatwama mu yihunda yize te yajingilika Hebrone.

⁴ Mba malunga a mu Yuda yeeza ku Hebrone, yaawayisa David maji hanga abwe mwanangana mu Yuda. Muze David hevwa ngwo, akwa Ajabeshe a mu chifuchi cha Gileade haafunda mwanangana Saulu,

⁵ yatuma ko tunganda ngwenyi: “Mwene Zambi anuwahise mumu hinwasolola zango lienu kuhiana muze hinwafunda mwanangana wenu.

⁶ Mwene Zambi anuwahise ni anulweze utu. Ni yami nawa mungunulingila yibema ha chize hinwalinga.

⁷ Takamenu, hamukenu! Saulu, mwanangana wenu hafwa, alioze Ayuda haanguwayisa maji hanga ngubwe mwanangana wo.”

Ishboshete yaamupwisa mwanangana mu Israele

⁸ Mwata wa tujita twa mwanangana Saulu, Abnere mwana wa Nere, yachina ni Ishboshete, mwana wa mwanangana Saulu, yaazauka Yordau nikuya ku limbo lia Mahanaime.

⁹ Mba kwenako mwata wa tujita Abnere yapwisa Ishboshete mwanangana wa yifuchi ya Gileade, ni Ashere, ni Jezrele, ni Efraime, ni Benjamine, ni wa chifuchi cheswe cha Israele.

¹⁰ Ishboshete muze amupwishile mwanangana wa Aisraele te habwa ni miaka makumi awana, yayula miaka yaali. Alioze vungu lia Yuda yaalalaminya mwanangana David.

¹¹ Neye yayula Ayuda ku Hebrone miaka shimbiali ni Chipinji.

Jita hakachi ka Aisraele ni Ayuda

¹² Mwata wa tujita Abnere ni mwanangana Ishboshete yaakatuka Mahanaime, yaaya ku limbo lia Gibeone.

¹³ Mwata wa tujita Joabe, mwana wa Zeruya, ni miata akwo ja mwanangana David yaalitakana no ku chitende. Kwenako ayo eswe atungile misumba yo, yaatwama mbunga yimuwika muno musali ni yikwo muze musali.

¹⁴ Mwata Abnere yambila mwata Joabe ngwenyi: “Tutayize akweze jetu, sali ni sali lia chitende, acheseke kwasa jita, tutale waze maakumba.” Neye ngwenyi: “Chinabeme.”

¹⁵ Chenacho malunga kumi ni aali a mwanangana Ishboshete a vungu lia Benjamine ashile jita ni malunga kumi ni aali a mwanangana David.

¹⁶ Mutu mweswe yakwata yoze analitachika nenyi ku mutwe, yamunjisa mukwale mu jimo, mba ayo eswe makumi aali ni awana yaalimbuka hashi, yaafwa. Kuma kuze ku Gibeone yaaluka ko jina ngwo: “Munda wa mikwale.”

¹⁷ Jita yabwile yikalu kuhiana, tujita twa mwanangana David yaanongesa Abnere ni tujita twa Aisraele.

¹⁸ Kwabwile malunga atatu, naye te Zeruya: Joabe ni Abishai ni Asahele. Asahele te kakuzomboka ngwe kai,

¹⁹ yabutuka kuhanga Abnere, yamuzombwesa lume pundu, kulihengahenga ka.

²⁰ Mwata Abnere yatewuluka nikwamba ngwenyi: “Yena Asahele, nyi?” Neye ngwenyi: “Ewa, yami.”

²¹ Mwata Abnere ngwenyi: “Litwamine kunguhanga! Hanga umwe wa kuli tujita, utambule chize ali nacho.” Alioze Asahele yamuhanga lume.

²² Abnere yamwamba nawa ngwenyi: “Ngwami litwamine kunguhanga! Mumu yika unanguhamwishina? Nyi nakushiha, mungwivwa sonyi kuli yayenu Joabe.”

²³ Alioze Asahele kazangile ko kwivwa. Kashika mwata Abnere yatuwa Asahele ni shina lia kunga lienyi mu jimo, yilimulia ndusu ndoo ku nyima. Neye yalimbuka, yafwa, Mweswe yoze wejile kuma kuze te anafwila, yamana ko kikilii.

²⁴ Mba mwata Joabe ni Abishai yaabutuka kuhanga Abnere. Muze tangwa hilianjila, yeeza ku mulundu wa Ama uze watwama ku chivumbuko cha chihunda cha Gia, mu jila ya puya ya Gibeone.

²⁵ Malunga ja vungu lia Benjamine yaakunguluka kuli mwata Abnere nawa, yaamana ha mulundu.

²⁶ Mwata Abnere yakololoka kuli mwata Joabe ngwenyi: “Kuma twase lume jita ndoo ku miaka yeswe, nyi? Kunwanyingikine ngwenu, ku songo lia jita mutulikokela kole, nyi? Tuli usoko wenu. Yika unashimbwila ha kukanjisa atu je ha kulitwamina kutuhanga?”

²⁷ Mwata Joabe yakumbulula ngwenyi: “Ni mwe Zambi ya mwono, nyi ngwe kuwahanjikile, kachi tujita twami maanuhanga ndoo hamene chichamene.”

²⁸ Mba mwata Joabe yemba chitavwi ha kulweza tujita twenyi alitwamine kuhanga Aisraele, Chenacho jita yaholele.

²⁹ Mwata Abnere ni tujita twenyi yeenda ndusu mu chikulo cha Yordau ufuku weswe, yaazauka Yordau, muze heenda chichamene cheswe, yaaheta Mahanaime.

³⁰ Muze mwata Joabe halitwamina kuhanga mwata Abnere, yakungulula tujita twenyi eswe, yamona ngwenyi, kunahono atu kumi ni livwa ni Asahele nawa.

³¹ Alioze tujita twa mwanangana David yaashiha atu ja mwata Abnere a ku vungu lia Benjamine 360.

³² Mwata Joabe ni tujita twenyi yaanda Asahele, yaamufunda hehi ni fuka lia tato ku Betleheme. Mba yeenda ufuku weswe, ha kuvumbuka cha tangwa yaaheta ku Hebrone.