2 Samuel 17 - Mukanda Wa Zambi 1970

Hushai yonga Absalome

¹ Ahitofele yambila Absalome ngwenyi: “Vulie mwanangana! Ngutayizenu kama hanga ngusakule malunga 12,000 ngutuhuke ha ufuku ngukaule David.

² Mungukasa nenyi jita muze hahonga ni halekumuka. Mevwa mwongo, ni atu jenyi eswe kumaachina. Mba mungushiha lume mwanangana wika.

³ Munguhilwisa atu jenyi eswe kuli yenu, ngwe chize nandungi akuhiluka kuli lunga lienyi. Mumu yenu nunazange kushiha lume mutu umuwika, eswe waze maasala ho maabwa mu uhwimino.”

⁴ Absalome ni akwa lutwe eswe ja Aisraele yaatayiza manyonga waze.

⁵ Absalome ngwenyi: “Achitambikenu nawa Hushai, hanga twivwe chize iye mamba.”

⁶ Muze Hushai haheta, Absalome yamwamba ngwenyi: “Wano e mana waze atulweza Ahitofele, twabanjike, nyi? Nyi ka, ni yena tulweze chize mutulinga.”

⁷ Hushai ngwenyi: “Vulie mwanangana! Mana waze anulweza kuli Ahitofele haliabwila, kaabemene.

⁸ Unanyingika, tatenu David ni tujita twenyi kaali akwa tachi, kaali ni wuli ngwe kashitu ursu yoze haamwiya ana jenyi. Tatenu kali kajita wa mana; ha ufuku keshi kubwa hamwe ni tujita twenyi.

⁹ Ha shimbu linoliene kota haswama kulu mu chivwenge hanji hamwe homa hakwo. Muze David mabutuka kwasa jita ni atu jenu, yoze machivwa mambulula ngwenyi: ‘Haanongesa.’

¹⁰ Mba chibwe malunga a hamu, ngwe tambwe, meevwa woma, mumu mutu mweswe mu Israele kananyingika ngwenyi, tatenu kali kajita wa tachi ni tujita twenyi kaali akwa hamu.

¹¹ Manyonga jami kaali wano, kungululenu Aisraele eswe, chize ku limbo lia Dane ku norde ndoo ku limbo, lia Bersheba ku sude. Abwe ngwe kwoka cha masekeseke a ku kalunga lwiji, ni yenwene munubwa kasongo ko mu jita.

¹² Mutuwana David kweswako ali, mutumulundumukina ngwe mume hashi ha shimbu lize kanda achinyonga nichimwe. Chibwe iye chibwe atu jenyi, niumwe kechi kusala ni mwono.

¹³ Chibwe anjile mu chimwe chihunda, atu jetu maanda mihipu, maachikokela mushi lia mundundena. Kukuchi kasala kaliwe nikamwe ha mulundu.”

¹⁴ Absalome ni Aisraele eswe yaamba ngwo: “Mana ja Hushai kaanahiana mana ja Ahitofele.” Mumu Zambi hanyonga ngwenyi, chibwe mana ja Ahitofele kaali abema, kuchatambile kwakaula hanga Absalome amone lamba.

Atu yaakanyamisa David, neye yachina

¹⁵ Mba Hushai yalweza mahako Zadoke ni Abiatare mana waze Ahitofele alwezele Absalome ni akwa lutwe ja Aisraele, ni mana waze iye alwezele.

¹⁶ Hushai yamba nawa ngwenyi: “Lipupwisenu! Tuminenu mwanagana David liji ngwenu, kanda achishila ufuku ku chau cha ku puya, alioze azauke Yordau, hanga iye ni atu jenyi keechi kufwa.”

¹⁷ Jonatane, mwana wa Abiatare, ni Ahimaze, mwana wa Zadoke, yaashimbwila ku shima lia Enrogele hehi ni Yerusaleme, kaanjilile ko mu limbo, nyi ka, maamona kuli atu. Umwe ngamba wa pwo yendangana ni kwalweza sango, no yaaya ni kulweza mwanangana David.

¹⁸ Alioze limwe tangwa umwe mwana lunga yaamona, yalweza Absalome. Hohene Jonatane ni Ahimaze yaachina fuji, yaaya ku zuwo lia umwe lunga mu chihunda cha Bahurime. Te kali ni shima lia meya mu yiize yenyi, no yaanjila mo.

¹⁹ Pwo lia mwe lunga yoze, yafuka ho, yanyika ho mbuto, mutu niumwe wahashile kusaho chinyingi.

²⁰ Akwa lutwe ja Absalome yaaheta ku zuwo, yaahula mwe pwo ngwo: “Ahimaze ni Jonatane kuli ali?” Pwo yakumbulula ngwenyi: “Haazauka chitwetwe.” E atu yaafupafupa, alioze kaamwene ko. Mba yaahiluka kwo ku Yerusaleme.

²¹ Muze haaya, Ahimaze ni Jonatane yaatuhuka mu shima, yaaya ni kunyingika mwanangana David. Yamulweza chize Ahitofele alulikile kulimika nenyi, yaamba ngwo: “Lipupwisenu, nuzauke lwiji.”

²² Chenacho David ni tujita twenyi akatukile, yaabutuka kuzauka, ndoo ha chichamene cheswe eswe te haazauka kulu.

²³ Muze Ahitofele hamona ngwenyi akwa lutwe hikaatayijile mana jenyi, yalulika chimbulu chenyi, yahiluka ku limbo lienyi. Muze halulieka yuma yenyi yeswe, yalisukika. Yaamufunda mu fuka lia tato.

²⁴ Mwanangana David yaheta ku limbo lia Mahanaime ha shimbu lize te Absalome ni tujita twa Aisraele anazauka Yordau.

²⁵ (Absalome yapwisa Amasa mwata wa tujita asalakane Joabe, Amasa te mwana wa Jetere, Kaishmaele, naye te Abigaile, mwana wa Nahashi wa pwo, te ndumbu ya Zeruya naye ya Joabe.)

²⁶ Absalome ni tujita twenyi yaasa musumba wo mu chifuchi cha Gileade.

²⁷ Muze mwanangana David haheta maha Mahanaime, yalitakana ni Shobi, mwana wa Nahashi wa ku limbo lia Raba mu chifuchi cha Amone, ni Makira, mwana wa Amiele wa ku Lodebare, ni Barzilai wa ku Rogelime mu chifuchi cha Gileade.

^28-29 Yaanehena David ni atu jenyi mihela, ni mbasila, ni milondo, ni tiriku, ni masa, ni wunga, ni mbuto yumu, ni chibuyu, ni landa, ni wuchi, ni maji a yamwa, ni mapanga. Mumu yaanyingika ngwo, David ni atu jenyi mu puya meevwa zala ni pwila.