2 Samuel 16 - Mukanda Wa Zambi 1970

Mwanangana David ni Ziba

¹ Muze mwanangana David hahiana hakepe ha mulundu, Ziba, ngamba ya Mefiboshete yamubatwiza, te kali ni yimbulu aali waze anambata mbolo 200, ni yichakata ya vinyu yumu 100, ni mihuko ya wisu 100, ni tuku ya lambu ya vinyu.

² Mwanangana yamuhula ngwenyi: “Kulihi unayi ni yino yuma?” Mwe Ziba ngwenyi: “Vulie mwanangana! Yimbulu wano, akwa jiko lienu lia wanangana endele ho, mbolo ni mihuko hanga akweze alie, ni vinyu hanga waze maahonga mu puya anwe.”

³ Mwanangana yamuhula ngwenyi: “Mefiboshete, mujikulu wa mwene we Saulu, yolihi?” Ziba ngwenyi: “Vulie mwane, kasala mu Yerusaleme, mumu kwamba chenyi ngwenyi, haliabwila Aisraele maamuhilwishila wanangana wa kako Saulu.”

⁴ Mwanangana yambila Ziba ngwenyi: “Yuma yeswe yize te ya Mefiboshete hiyabwa niye.” Ziba ngwenyi: “Vulie mwanangana wami! Nguli ngamba yenu, matangwa eswe chinalite ngulinge chize chinanuwahila!”

Mwanangana David ni Shimei

⁵ Muze mwanangana David haheta ku Bahurime, yalitakana ni umwe wa kuli usoko wa mwanangana Saulu, jina lienyi Shimei, mwana wa Gera, te kaneza ni kushililika mwanangana David,

⁶ yabutula kumwasa mawe ni akwa kuyula jenyi, chibwe te tujita ni tufunga kaanajingilika mwe mwanangana.

⁷ Shimei yashililika nikwamba ngwenyi: “Katuka! Katuka! Mukwa kushiha atu, luchingalwe.

⁸ Yena watambwile wanangana wa Saulu, haliabwila Mwene Zambi kanakumwesa lamba mumu hiwashiha anji a ku jiko lienyi. Mwene Zambi hahana wanangana we kuli mwane Absalome, yena mukwa kushiha atu, jakukangana!”

⁹ Abishai mwana wa Zeruya, yambila mwanangana ngwenyi: “Vulie mwanangana! Kuchi nunatayiza kawa yono kunushililika? Ngwechenu ngumutape!”

¹⁰ Mwanangana yambila Abishai ni yayo Joabe ngwenyi: “Yino hi milonga yenu ko, yenu ana ja Zeruya. Nyi kanangushililika mumu Mwene Zambi hamwamba cho, mba iya mahasa kumukanjisa!”

¹¹ Mba David yambili Abishai ni tumbaji twenyi eswe ngwenyi “Kamba kama mwanami wakulisemena yami mwene kanafupu kungushiha, mba kuchi nunalishimwoka hali yono Kabenjamine? Mwene Zambi hamwamba angushililike, mwechenu hanga angulinge cho.

¹² Kunwanyingikine hanji Mwene Zambi matala lamba liami n manguwahisa mumu ha kushililika chenyi.”

¹³ Chenacho David ni atu jenyi ayile mu jila yo. Mwe Shimei yaakaula ku sali lia mulundu, yaashililika, yaasa mawe ni kwakuwa fufuta muze te anayi.

¹⁴ Mwanangana ni atu jenyi muze haaheta ku lwiji Yordau te haahonga, yaahwima.

Absalome mu Yerusaleme

¹⁵ Absalome ni Aisraele eswe waze abwile hamwe nenyi yaanjila mu Yerusaleme, Ahitofele yabwa hamwe no.

¹⁶ Muze Hushai mukwa Arke, sepa wamwenemwene wa mwanangana David, halitakana ni Absalome, yakololoka ngwenyi: “Vulie mwanangana! Vulie mwanangana!”

¹⁷ Absalome yamuhula ngwenyi: “Kuchi yena ni sepa lie? Kuchi mba kuwayile nenyi?”

¹⁸ Hushai yakumbulula ngwenyi: “Vulie mwanangana! Ngwe kuchi munguhasa? Mumu nguli ku sali lia mwanangana yoze Mwene Zambi hatongola, ni atu wano ni Aisraele eswe. Mungubwa hamwe ni yenu.

¹⁹ Ni mwene, iya te Changutamba kulingila? Hi mwana wa mwene wami ko, nyi? Cheswe te nakulingila tatenu, Chenacho nawa mungunulingila yenu.”

²⁰ Mba Absalome yambila Ahitofele ngwenyi: “Tulweze mana chize chatutamba kulinga.”

²¹ Ahitofele ngwenyi: “Vulie mwanangana! Yeenu nulimone ni mapwo ja tatenu waze asalile ni kufunga zuwo lia mwanangana. Mba mutu mweswe mu Israele manyingika ngwenyi, hinwabwa mukwa kole wa tatenu, mba atu jenu maajikiza.”

²² Kashika yaajikila Absalome zuwo lia makubu ha fulumba lia zuwo lia mwanangana. Atu eswe yaamona chize Absalome anayi ni kulimona ni mapwo ja tato.

²³ Ha matangwa waze, atu yaatambula longeso lia Ahitofele ngwe liji lia Zambi iye mwene. Eswe aali mwanangana David ni Absalome yaatayiza mana ja Ahitofele.