2 Samuel 13 - Mukanda Wa Zambi 1970

Amnone ni Tamara

¹ Absalome, mwana wa mwanangana David, yabwa ni ndumbwenyi mubema kuhiana, Tamara, te kanda achiya ku ulo. Amnone, mwana mukwo wa mwanangana, yazanga Tamara kuhiana.

² Ha kumuzanga kuhiana Amnone yayiza yikola. Te chikalu ha kumuheta, mumu mwana pwo yoze kanda achilimona ni lunga, ni yisemi jenyi kaamutayijile ko kubwa hamwe ni malunga.

³ Alioze Amnone yabwa ni umwe sepa lienyi, mukwa malinjekela kuhiana, jina lienyi Jonadabe, mwana wa Shama, mwanakwo ya mwanangana.

⁴ Jonadabe yahula Amnone ngwenyi: “Ngwami, uli mwana wa mwanangana, mba kuchi nakukumona matangwa eswe uli ni chinyengo? Ha chikuma chika?” Amnone ngwenyi; “Ngunazange Tamara, ndumbu ya mwanakwetu Absalome.”

⁵ Jonadabe ngwenyi: “Nyi chocho bomba ha muhela, lionga ngwe unayiji. Muze tatenu meza ni kukumeneka, umulweza ngwe: ‘Vulie mwane! Lwezenu ndumbwami Tamara eze angulingile kama yakulia. Ngunazange angulingile yo ku meso jami, ni kungwaha yo iye mwene.’ ”

⁶ Mba Amnone yaya ni kubomba, yalionga ngwe kanayiji. Mwanangana David yaya ni kumumeneka, mba Amnone yamulweza ngwenyi: “Nalemba mwane, tayizenu kama Tamara eze angulingile yimwe mbolo ku meso jami ni kungwaha yo iye mwene.”

⁷ Chenacho mwanangana atumine liji kuli Tamara, ku zuwo lia wanangana, ngwenyi: “Yako maha ndumbwe Amnone hanga umulingile yimwe yakulia.”

⁸ Mwe Tamara yaya, yamuwana kali ha muhela. Yazomona wunga, yalulika yakulia, yocha yimwe mbolo ku meso je nyi.

⁹ Yayichiza ha chikango, yayisa ha chenga hanga alie. Alioze Amnone yalituna yo, yamba ngwenyi: “Tuhwisa atu eswe haze.” Eswe yaatuhuka.

¹⁰ Mba yambila Tamara ngwenyi: “Neha ye mbolo kuno ku muhela wami, ungulise yo yena mwene.” Tamara yanda ye mbolo, yamukundama.

¹¹ Muze te anamwehe yo, yamukwata ngwenyi: “Ndumbwami, tweya tulimone!”

¹² Tamara ngwenyi: “Ka, ndumbwami, kanda ungukwata ni tachi! Mumu keeshi kuchilinga muno mu Israele! Kanda Ulinga uhepuke uno!

¹³ Sonyi mungwivwa muze mungutala atu. Ngunakulembe hanjika kuli mwanangana. Ngunachifuliela ngwami, manguhangisa kuli yena.”

¹⁴ Alioze katayile ko kumubanjika, yamukwata ni tachi, yalimona nenyi.

¹⁵ Mba Amnone yevwila Tamara kubiha kuhiana. Kubiha chize chahianyine zango lize abwile nalio hatangu. Yamwamba ngwenyi: “Katuka! Yako!”

¹⁶ Tamara ngwenyi: “Ka, hi chocho ko! Kunguhanga ngwe chino chili chibi kuhiana chize hiwangulinga!” Hindu Amnone katayile ko kumubanjika.

¹⁷ Amnone yatambika ngamba yenyi, yamwamba ngwenyi: “Tuhwisa pwo yono haze! Sepekenya ku chajilo!”

¹⁸ Mwe ngamba yamutuhwisa haze, yasepekenya chajilo. Tamara te kanazala kazaku wa moko asuku, nikulita ni ndako ya ana a mapwo ja mianangana waze kanda achiya ku malo.

¹⁹ Tamara yalimwangina uto ha mutwe, yatanuna mahina jenyi, yalikwata suswa mutwe, yaya nikulila mbimbi.

²⁰ Ndumbwenyi Absalome muze hamumona yamuhula ngwenyi: “Kota Amnone kakubinjisa, nyi? Ngunakulembe ndumbwami, kanda ulinyenga nacho kuhiana. Kali ndumbwe. Chuma chino kanda uchilweza mutu mukwo niumwe.” Chenacho Tamara atwamine lume twamishi liakulu ku zuwo lia ndumbwenyi Absalome.

²¹ Mwanangana David, muze hevwa sango jino, yevwa kubiha kuhiana.

²² Absalome yavutwokela Amnone kuhiana, mumu walimwene ni ndumbwenyi Tamara ni tachi, kashika te keshi kumuhanjikisa nawa.

Absalome yakala mulonga wa ndumbwenyi

²³ Muze miaka yaali hiyabalika, ngamba ja Absalome te kaanakambe ngona ja mapanga ku chihunda cha Bal Hazore hehi ni limbo lia Efraime. Yatambika ana ja mwanangana a malunga eswe abwe ko.

²⁴ Absalome yaya kuli mwanangana David, yamwamba ngwenyi: “Vulie mwanangana! Nguli ni ngamba waze anakambe ngona ja mapanga jami. Yenu ni yilolo jenu tweyenu kama ku chiwanyino.”

²⁵ Mwanangana yamukumbulula ngwenyi: “Hi chocho ko mwanami. Nyi yetu eswe twaya, mutukwaha milimo yinji.” Absalome yashinjila tato, hindu tato katayijile ko, yamushika aye kwenyi.

²⁶ Alioze Absalome yamba ngwenyi: “Nyi chocho tayizenu kama Amnone eze.” Mwanangana ngwenyi: “Mumu yika?”

²⁷ Alioze Absalome yashinjila tato David ndoo hatayiza Amnone ni ana jenyi akwo a malunga kuya no. Absalome yalinga chiteleka chinene ngwe cha mwanangana.

²⁸ Absalome yalweza ngamba jenyi ngwenyi: “Nutala kanawa, muze Amnone hazengewa kuhiana, nyi nanwaha chilayi, mushihenu. Kanda nwivwa woma, mulonga muubwa wa yami mwene. Alioze yenu hamukenu, kanda nuyambashana!”

²⁹ Chenacho ngamba alingile chize Absalome aalwezele, yaashiha Amnone. Ana ja David a malunga waze asalile ho yaanyina mutu ni mutu ha chimbulu chenyi, yaachina.

³⁰ Muze haamwangana ni kuya ku mahio, atu akwo yaalweza David ngwo: “Absalome hashiha ana je a malunga eswe, niumwe kasalile ko!”

³¹ Mwanangana yakatuka, yatanuna mahina jenyi ni kubihilila, yalimbila hashi. Atu jenyi eswe waze abwile hamwe nenyi no yaatanuna mahina jo.

³² Alioze Jonadabe, mwana wa Shama yayo ya David, yamba ngwenyi: “Vulie mwanangana! Absalome kashihile ko ana jenu eswe, shina Amnone wika mwe wafwa. Mumu Absalome te kakuhalila Amnone amushihe mumu walimwene ni ndumbwenyi Tamara ni tachi.

³³ Kashika kanda nufuliela sango jino ngwenu, ana jenu a malunga eswe kaashiha, shina Amnone wika mwe wafwa.”

³⁴ Hazehene Absalome yachina. Mukweze yoze te wakufunga zuwo lia mwanangana, yamona mbunga kunyima lienyi, kaanapalumuka ha mulundu ku jila ya Horonaime. Neye yaya kuli mwanangana ni kumulweza yize hamona.

³⁵ Jonadabe yalweza David ngwenyi: “Vulie mwanangana! Waze aneza kaali ana jenu, maliji waze nakulweza kaali amwenemwene.”

³⁶ Ha shimbu lize te maachihanjika, ana ja mwanangana a malunga yaaheta, yaabutuka kulila. Mwanangana ni atu jenyi no yaabutuka kulila mbimbi.

^37-38 Absalome yachina, yaya kuli mwanangana wa mu chifuchi cha Geshure, Talmai, mwana wa Amihude, yatwama ko miaka yitatu. David yanenganyana ni kulila mwanenyi matangwa anji.

³⁹ Alioze muze hahwisa kulila Amnone, yanyonga nawa mwanenyi Absalome.