2 Samuel 12 - Mukanda Wa Zambi 1970

Natane yakumika mwanangana David, neye yalumuka ku mbunge

¹ Mwene Zambi yatuma mukwa munanyi Natane kuli mwanangana David. Yamwamba ngwenyi: “Mu chihunda chimwe mwabwile amwe malunga aali, umwe pichi, mukwo chiswale.

² Pichi yabwa ni mapanga ni ngombe anji,

³ alioze chiswale yabwa lume ni panga umuwika, yoze alanjile. Yamulela kanawa. Mwe panga yakolela mu zuwo lienyi. Mwe chiswale yamulisa ni tuyakulia twenyi, yamunwishina ku musenge wenyi, yamukangayika mu kondo yenyi. Mwe panga yabwa ngwe mwanenyi wa pwo mu zuwo lienyi.

⁴ Limwe tangwa ngeji yeza ku zuwo lia pichi. Pichi kazangile ko kushihila ngeji chimuna cha iye mwene ni kumulisa, alioze yanda panga wa chiswale, yamushihila.”

⁵ Mwanangana yevwila pichi wuli unji, yamba ngwenyi: “Ni mwe Mwene Zambi, mutu walinga Chuma chino chamutamba kufwa!

⁶ Ha Chuma chino alinga, chamutamba kuhilwisa mapanga awana.”

⁷ Mukwa munanyi Natane yakumbulula mwanangana ngwenyi: “Mutu yoze, yena. Mwene Zambi, Zambi ya Aisraele kanambe ngwenyi: ‘Nakuwayishile kubwa mwanangana wa Aisraele, nakulamwinyine ku moko ja Saulu.

⁸ Nakuhele wanangana wenyi ni mapwo jenyi. Nakupwishile mwanangana wa Aisraele ni Ayuda. Nyi te yino kuyakuzukile, kachi nakuwezelele nawa yuma yeka ni yeka.

⁹ Mba kuchi kevwe wakolema Shimbi jami? Mumu yika hiwalinga chibi chino? Hiwashiha Uria mu jita, hiwamukunjika kuli Aamone akamushihe, hiwatambula pwo lienyi.

¹⁰ Mu Chisemuko che cheswe kumukukabwa kufwa cha upupilo, mumu hiwakolema Shimbi jami ni kutambula pwo lia mbala lia Uria.

¹¹ Mungukavundwila yibi mwe mu jiko lia yena mwene. Muukachimona yena mwene muze mungukatambula mapwo je ni kwakunjika kuli lunga weka, makalimona no he ha mwalwakachi.

¹² Yena wanguvulumwine ku tenga, alioze yami mungukachilinga lume ha mwalwakachi, hanga Aisraele akachimone.’ ”

¹³ Mwanangana yamba ngwenyi: “havulumuna Mwene Zambi.” Mukwa munanyi yamukumbulula ngwenyi: “Mwene Zambi hakukonekena, kuuchi kufwa.

¹⁴ Alioze mwe mwana yoze kumakafwa mumu hiwalelesa Mwene Zambi ha chize walinga.”

¹⁵ Mba mukwa munanyi Natane yaya ku zuwo lienyi. Mwene Zambi yahana yikola yinji kuli mwana yoze mwanangana asemene ni pwo lia Uria.

Mwana wa Batsheba yafwa

¹⁶ Mwanangana yalemba kuli Zambi hanga mwana ahinduke. Yajila kulia, matangwa eswe ufuku yanjila mu zuwo lienyi, yabomba hashi.

¹⁷ Akwa lutwe: a ku zuwo lienyi yaaya ni kumulembejeka hanga atwame kama. Alioze yalituna kwenyi, kazangile ko chibwe kulia, kalile ko nichimwe.

¹⁸ Ha tangwa lia muchishimbiali mwe mwana yafwa. E akwa lutwe yeevwa woma ha kumwambulwila sango jize. Yaamba ngwo: “Muze te mwana uchili ni mwono, mwanangana kazangile ko kutukumbulula muze twahanjekele nenyi. Ngwe kuchi mutuhasa kumulweza ngwetu, mwana hafwa? Malilinga chibi!”

¹⁹ Mwanangana muze hamona chize analinyinyita, yanyonga ngwenyi, mwana hafwa. Mba yaahula ngwenyi: “Kota mwana hafwa, nyi?” No yaakumbulula ngwo: “Chenacho mwanangana.”

²⁰ Neye yahinduka hashi, yasana meya, yawaya maji, yazala mahina abema, mba yaya ni kuwayila mu zuwo lia Mwene Zambi. Muze hahiluka mu zuwo lienyi, yeta yakulia, muze haayilulika, yalia.

²¹ Mba akwa lutwe yaamuhula ngwo: “Chuma chino nwalinga, kuchi chinalumbunuka? Muze te mwana uchili ni mwono, yinulila ni yinujila kulia. Alioze muze hafwa, hinwakatuka, hinwalia!”

²² Mwanangana ngwenyi: “Chenacho, nalilile ni kujila kulia muze te mwana uchili ni mwono. Yingunyonga ngwami, hanji Mwene Zambi manguvwila kama keke, mwana kechi kufwa,

²³ Alioze haliabwila hafwa, mumu yika mungujilila nawa kulia? Munguhasa kuhilwisa mwono wa mwanami, nyi? Limwe tangwa mungukaya kuze haya mwana, alioze iye kechi kahiluka kuno kuli yami.”

Kusemuka cha Solomone

²⁴ Mwanangana David yalembejeka mukwo pwo Batsheba. Yalimona nenyi, neye yasema mwana wa lunga. Yamuluka jina ngwenyi, Solomone. Mwene Zambi yazanga mwe mwana,

²⁵ yatuma mukwa munanyi Natane hanga amuluke jina likwo Jededia, kulumbunuka ngwo: “Zambi kanamuzange.”

Mwanangana David yakumba Raba

²⁶ Mwata wa tujita Joabe yanyongonona kwasa jita ku Raba, limbo lia wanangana wa Aamone, te kali hehi ni kulitambula.

²⁷ Mba yatumina mwanangana David tunganda, ngwenyi: “Ngunalimika ni akwa Raba, hinatambula kulu shima lio lia meya.

²⁸ Haliabwila hikungululenu tujita twenu waze anakasala, nwize nulimike ni akwa limbo, nulitambule yenwene. Chazangile kwakumba yami ni kufumanyisa jina liami.”

²⁹ Mba mwanangana yakungulula tujita twenyi, yaya ku Raba, yasa jita ni akwa limbo, yalitambula.

³⁰ Yachiza chipangula ha mutwe wa Milkome, hamba lia Aamone. Yichibwa ni liwe lia ndando yinji, kulema chalio te kilo makumi atatu ni jitano. Mwanangana yachizala iye mwene, yabuba nawa ubite wa mu limbo unji kuhiana.

³¹ Yanda akwa limbo, yaashinjika ni tachi kulinga milimo ni poko ja mabaya, ni matemo, ni njimbu, yaashinjika ni tachi kulinga briki (tujolo). Mwanangana yalinga nawa chizechene ni atu a mu membo akwo ja Aamone. Mba yahiluka ni tujita twenyi ku Yerusaleme.