2 Samuel 11 - Mukanda Wa Zambi 1970

Mwanangana David ni Batsheba

¹ Ha kakweji wa kunake, muze mianangana akuya ku jita, mwanangana David yatuma mwata Joabe hamwe ni miata a tujita ni e tujita twa Aisraele. No yaakumba Aamone, mba yaalimika ni akwa limbo lia Raba. Alioze mwanangana iye mwene yasala mu Yerusaleme.

² Limwe tangwa ha chingoloshi, mwanangana yakatuka ha muhela wenyi, yakanduka ha fulumba. Muze te anendangana ho, yamona umwe pwo kanasane. Te mubema kuhiana.

³ Mba yatuma kanganda ni kunyingika, nyi kali iya. Yamulweza ngwenyi: “Kali Batsheba, mwana wa Eliame, pwo lia Uria, Kahite.”

⁴ Mwanangana David yatuma tunganda amusake, no yaamunehena ye Neye yalimona nenyi. (Te pwo halibemesa kulu nikulita ni Shimbi yo ya kulibemesa.) Mba mwe pwo yahiluka ku zuwo k lienyi.

⁵ Kulutwe yanyingika ngwenyi, hinaka ufumba, yatuma liji kuli mwanangana ni kumulweza.

⁶ Kashika mwanangana yatuma liji kuli mwata Joabe ngwenyi: “Ngutumine Uria, Kahite.” Mba yaamutumina ye.

⁷ Muze mwe Uria haheta, mwanangana yamuhula sango ja mwata Joabe ni ja mbunga ya tujita, ni chize yinabu ye jita.

⁸ Mba yambila Uria ngwenyi: “Yako ku zuwo uchihwime kama limwe shimbu.” Uria yakatuka. Mwanangana David yamutumina chawana.

⁹ Alioze Uria kayile ko ku zuwo lienyi, yabomba ku chikolo hamwe ni tufunga twa mwanangana.

¹⁰ Muze mwanangana David hevwa ngwo, Uria kayile ko ku zuwo lienyi, yamuhula ngwenyi: “Ngwami, ku wenyi unakatuka. Mumu yika kuwazangile kuya ku zuwo lie?”

¹¹ Uria ngwenyi: “Vulie mwane! Tujita twa Israele ni Yuda kaali mu jita, ni mushete wa Usendo wa Zambi uli hamwe no. Mwene wami Joabe ni tujita twenyi ka eswe kaali haze ha musumba. Kuchi mwane, yami munguhasa kuya ku zuwo liami ni kulia ni kunwa ni kulimona ni pwo liami? Ngunalishingi ni jina lienu ngwami, chahashile kulinga Chuma chize nihakepe!”

¹² Mba mwanangana yamwamba ngwenyi: “Nyi chocho, musono unamina hano, mba hamene muukaya.” Chenacho Uria anaminyine mu Yerusaleme matangwa aali.

¹³ Mwanangana yamutambika ku kulia cha chingoloshi, yamuzengesa. Alioze chibwe ufuku uze nawa Uria kayile ko ku zuwo lienyi, yabomba Jo kwenyi ha blankete yenyi hamwe ni ngamba ja mwene wenyi.

¹⁴ Ha chichamene mwanangana yasoneka mukanda kuli mwata Joabe, yauhana kuli Uria.

¹⁵ Yasoneka ho ngwenyi: “Sako Uria kulutwe, kuze kuli jita ya tachi, himwechenu ko ukawenyi hanga akafwe.”

¹⁶ Chenacho mwata Joabe endesele limbo. Yatuma Uria kulutwe kuma kuze te ananyingika ngwenyi, akwa kole aliko a tachi.

¹⁷ Mbunga ja akwa kole yaatuhuka mu limbo, yaasa jita ni mwata Joabe. Amwe miata ja mwanangana David yaafwa, hamwe ni mwe Uria nawa.

¹⁸ Mba Joabe yatuma lusango wa jita kuli mwanangana David,

¹⁹ yalweza nawa kanganda ngwenyi: “Muze hiwalweza mwe mwanangana sango jeswe ja jita,

²⁰ nyi makevwa wuli ni kukuhula ngwenyi: ‘Mumu yika nunakakundamina ku limbo? Te kunwanyingikine ngwenu, waze ali ha chipanga maanwasa mivwi, nyi?

²¹ Kunushi kwiwuluka chize afwile Abimeleke, mwana wa Gideone, nyi? Ngwami, chabwile mu chihunda cha Tebeze, mwabwile umwe pwo ha chipanga, yaholwela Abimeleke luliwe luze te akutwa nalwo, mwe Abimeleke yafwa hazehene. Mba kuchi kevwe, nwayile chichize hakamwihi ni chipanga?’ Nyi ngwe mwanangana makuhula Chenacho, ukamulweza ngwe: ‘Mwata Uria neye kafwa.’ ”

²² Chenacho mwe kanganda ayile kuli mwanangana David nikumwambulwila li yize yeswe amulwezele kuli mwata Joabe.

²³ Yamba ngwenyi: “Akwa kole jetu haabwa ni tachi kuhiana yetu, yaatuhuka mu limbo ni kwasa jita ni yetu, alioze yitwaashinjika ni kwahilwisa ku chikolo cha limbo.

²⁴ Mba kuze ku chipanga yaaatwasa, yaashiha amwe miata ja mwanangana, ni kavumbi kenu mwata Uria, neye nawa kafwa.”

²⁵ Mba mwanangana yakumbulula mwe kanganda ngwenyi: “Lweza mwata Joabe ngwe, kanda wivwa kubiha ha chuma chino, mumu mukwale wa jita wakushiha sali ni sali. Mulweze ase tachi, atambule limbo.”

²⁶ Muze pwo lia Uria hevwa ngwo mukwo lunga hafwa, yalila.

²⁷ Muze matangwa akulila haabalika, Mwanangana David yamutambika ku zuwo lienyi. Neye yabwa pwo lienyi, yasema nenyi mwana wa lunga. Alioze Chuma chize alingile mwanangana David, Mwene Zambi yachivwila kubiha.