2 Samuel 10 - Mukanda Wa Zambi 1970

Mwanangana David yakumba Aamone ni Asiria

¹ Mwabwamuze Nahashi, mwanangana wa chifuchi cha Amone, yafwa. Mwanenyi Hanune yamuhinga.

² Mwanangana David yamba ngwenyi: “Changutamba kukolesa Usendo ni mwanangana Hanune ngwe chize tato Nahashi angulingile yami.” Chenacho mwanangana David atumine tunganda ni kumulembejeka mumu ha kufwa cha tato. Muze e tunganda haaheta mu Amone ni haameneka mwanangana Hanune,

³ miata ja Aamone yambila mwanangana wo ngwo: “Kuma nunanyongo ngwenu, mwanangana David hatuma atu wano ni kunulembejeka ase tatenu vumbi, nyi? Alioze hi chocho ko! Kaatuma endese limbo hanga ahase kutukumba!”

⁴ Kashika mwanangana Hanune yakwata tunganda twa mwanangana David, yaakamba wevu sali limuwika, yaabatwola mahina jo ndoo ku matako, mba yaahuma.

⁵ No yeevwa sonyi ha kuhiluka ku mahio. Muze mwanangana hachivwa, yaatumina liji ngwenyi, kanda eza, ashimbwile mu limbo lia Yeriku ndoo muze wevu wo hiwasoka, mba meeza.

⁶ Aamone yaanyingika ngwo, hitwabwa akwa kole ja mwanangana David. Kashika yaakamba tujita 20,000 twa Asiria a ku yifuchi ya Betrehobe ni Zoba, ni 12,000 a ku chifuchi cha Tobe, hamwe ni tujita 1,000 twa mwanangana wa ku chifuchi cha Maka.

⁷ Muze mwanangana David hachivwa, yatuma mwata Joabe ni tujita eswe akalimike no.

⁸ Aamone yaatuhuka, yaalilonga ku chikolo cha Raba, limbo lio lia wanangana. Tujita akwo twa Siria ni a Tobe ni a Maka yaalilonga mu chana.

⁹ Mwata Joabe yamona ngwenyi, akwa kole haamujingilika kulutwe ni kunyima. Kashika yasakula tujita a tachi kuhiana, yaalonga hatalanganyi ni tujita twa Siria.

¹⁰ Tujita waze asalile ho yaahana kuli mwanakwo mwata Abishai. Neye yaalonga mulongo hatalanganyi ni tujita twa Amone.

¹¹ Joabe yamulweza ngwenyi: “Nyi wamona ngwe, Asiria kaananguhiana yami tachi, wiza ungukwase, Nyi ngwe Aamone kaanakuhiana yena tachi, ni yami mungwiza hanga ngukukwase.

¹² Tuhamukenu, tubwe malunga! Twasenu jita ni tachi, mumu hali atu jetu ni mumu ha membo ja Zambi yetu. Mwene Zambi alinge chize anazange.”

¹³ Mwata Joabe ni tujita twenyi yaabutuka kwasa jita ni Asiria, no yaachina.

¹⁴ Muze Aamone haamona ngwo, Asiria kaanachina, no yaachina Abishai, yaanjila mu limbo. Mba mwata Joabe yahiluka ku Yerusaleme.

¹⁵ Muze Asiria haamona ngwo, Aisraele haakumba, yaatambika tujita two eswe.

¹⁶ Mwanangana Hadadezere yatuma liji kuli Asiria a ku sali lia chivumbuko lia lwiji Ufrateze. No yeeza ku limbo lia Helame mu chiyulo cha Shobake, mwata wa tujita twa mwanangana Hadadezere wa ku Zoba.

¹⁷ Muze mwanangana David hachivwa, yakungulula tujita twa Aisraele, yaazauka lwiji Yordau, yaaheta ku Helame, Kwenako alilongele Asiria akalimike nenyi. Jita yiibutuka,

¹⁸ Asiria yaachina. Mwanangana ni tujita twenyi yaashiha tujita 700 waze te akwenda ha matemba, ni 40,000 waze akwenda ha tuvwalu, Yaalemeka mwata wa tujita, Shobake, neye yafwila mu jita.

¹⁹ Muze mianangana waze abwile yilolo ja mwanangana Hadadezere haamona ngwo, haakumba kuli Aisraele, yaalikunda no, yaabwa yilolo jo. Asiria yeevwa woma ha kukwasa nawa Aamone.