2 Samuel 1 - Mukanda Wa Zambi 1970

David yevwa sango ja kufwa cha mwanangana Saulu

¹ Mwanangana Saulu te hafwa muze David anakatuka kuze akumbile Aamaleke. Neye yatwama mu limbo lia Ziklage matangwa aali.

² Muze hikwacha umwe mukweze yaheta ko, te kanakatuka ku musumba wa mwanangana Saulu. Hatanuna mahina jenyi ni kulimwangina mavu ha mutwe ni chinyengo. Yafulamana hashi ku meso ja David nikumuwayila.

³ David yamuhula ngwenyi: “Kulihi unakatuka?” Mukweze ngwenyi: “Ngunachina ku musumba wa Aisraele.”

⁴ David ngwenyi: “Ngulweze sango jako.” Mukweze ngwenyi: “Tujita twetu haachina ku jita, atu jetu anji haafwa, mwanangana Saulu ni mwanenyi Jonatane no haafwa.”

⁵ David ngwenyi: “Kuchi Unanyingika ngwe, mwanangana Saulu ni Jonatane haafwa?”

⁶ Mukweze ngwenyi: “Te ngunabalika chibalikila ha mulundu wa Gilboa, yingumona mwanangana Saulu kanashachila ha kunga lienyi, matemba a jita ni waze akwendela ha tuvwalu te haamukundama.

⁷ Mba mwanangana Saulu yatewuluka, yangumona, yangutambika. Yingutaa ngwami: ‘Vulie mwanangana!’

⁸ Yanguhula ngwenyi: ‘Ku mahienu mahaya?’ Yingumulweza ngwami: ‘Nguli mukwa Amaleke.’

⁹ Mba yangwamba ngwenyi: ‘Kundama kuno ungumanune, mumu ngunabinji kuhiana, hindu chisolo kusutuka.’

¹⁰ Chenacho yingumukundama, yingumumanuna, mumu yingunyingika ngwami, muze malimbuka kumafwa. Mba yinguzula chipangula ku mutwe wenyi ni lukanda ku kwoko lienyi, hinakunehena yo, mwanangana.”

¹¹ Hohene David yatanuna mahina jenyi ni chinyengo, ni malunga waze abwile ko no eswe yaalinga chizechene.

¹² Yaalila ni kulishimwoka, yaalitwamina kulia ndoo ku chingoloshi mumu hali mwanangana Saulu ni Jonatane ni hali Aisraele eswe, atu ja Mwene Zambi, mumu anji afwile mu jita.

¹³ David yahula mwe mukweze yoze wamunehenene sango ngwenyi: “Kumahienu mahaya?” Mukweze ngwenyi: “Nguli mukwa Amaleke, alioze natwama mu chifuchi chenu.”

¹⁴ David yamuhula ngwenyi: “Kuchi te kuwevwile ko woma kushiha mwanangana yoze Mwene Zambi awayishile maji?”

¹⁵ Mba David yatambika umwe wa kuli akweze jenyi ngwenyi: “Mushihe!” Mba mukweze yakwata mukwa Amaleke, yamushiha.

¹⁶ David yambila mwe mukwa Amaleke ngwenyi: “Kufwa chino chili mulonga wa yena mwene, mumu washindakenya kushiha mwanangana yoze Mwene Zambi hanawayisa maji.”

David yemba lungungu ha kufwa cha Saulu ni Jonatane

¹⁷ David yemba lungungu yono mumu hali mwanangana Saulu ni mwanenyi Jonatane.

¹⁸ Yaamba hanga akaulongese Ayuda. (Haanausoneka mu mukanda wa Jashare.)

¹⁹ “Mama yami! Akwa lutwe jetu haashihila ha mulundu wa Israele! Tujita twetu a hamu haalimbwoka!

²⁰ Kanda nuchambujola mu limbo lia Gate chibwe mu majila ja Ashkelone. Kuchina mapwo ja Afilistia maawahilila, kuchina ana mapwo ja yilima meevwa chiseke.

²¹ “Ha milundu ya Gilboa kanda habwa vula ni mume, minda yaho kanda yikabwa ni chinuno! Mumu kebwe ja akwa tachi hijaholoka ni sonyi, lukebwe wa Saulu hominina, keshi maji.

²² Uta wa Jonatane kuwazeyele nichimwe, mukwale wa Saulu kuwabwile ko ni keke ha kwonona mianangana a tachi, ha kushiha akwa kole jo.

²³ “Mwanangana Saulu ni Jonatane, atu te kaakwazanga kuhiana, kaalihandunwine ko mu mwono, chibwe mu kufwa. Tambu lio ngwe lia tela, tachi jo ngwe ja tambwe.

²⁴ “Mapwo mu Israele, lilenu mwanangana Saulu! Iye wanujikile mahina achila a lefuna, wanuhenyesene ni yuma ya uhenya ni oru.

²⁵ “Tujita a hamu haalimbwoka, haanaashihi mu jita. Jonatane kanabombo wa mufu ha mulundu.

²⁶ “Mukwetu Jonatane, chinyengo ngunevu, te uli sepa liami munene! Zango lie liakungukomwesa, liahianyine lize lia mapwo.

²⁷ “Tujita a hamu haalimbwoka, yitwa yo ya jita haayimbila, hiyabwa yamokomoko.”