2 Petulu 3 - Mukanda Wa Zambi 1970

Kwiza cha muchaali cha Mwene Yesu Kristu

¹ Akwetu, ngunanusonekena mukanda uno wa muchaali. Mu mikanda yino yeswe yaali ngunakeseka kunuhetula manyonga abema a mbunge jenu ha kunwiwulula.

² Ngunazange nwiwuluke maliji waze anulongesele ha shakulu kuli akwa munanyi a kulinanga, nawa Shimbi ja Mwene kanda Chilamwina jize anulongesele tunganda twenu.

³ Hatangu nyingikenu chino ngwenu, ha matangwa akusula akwa kukekuna kumaakasoloka, waze maakalingalinga usolo wo Ubi. Maakanukekuna.

⁴ Maakamba ngwo: “Mwene Yesu hanalakenya ngwenyi: ‘Makeza,’ nyi? Yolihi mba? Tushakulu twetu haanafu kulu, alioze yuma yeswe yili chizechene, chize kuze Zambi atangile yuma yeswe ndoo musono!”

⁵ Kaakuvulama ngwo, hasuku Zambi ahanjikilile, ni lilu ni hashi yiitangiwa. Yasolola hashi ku meya ni yihatangiwa ku meya.

⁶ Chizechene nawa, Zambi yanongesa tushakulu ni sanga linene lia meya.

⁷ Alioze lilu ni hashi ya haliabwila kanayitulika ku liji lizeliene lia Zambi ha kuyonona ni kahia. Kanayifungu ndoo ku tangwa lize makabatwila yitanganyanyi ni kwoonona.

⁸ Alioze, akwetu, kanda nuvulama Chuma chino chimuwika ngwami, ku meso ja Mwene Zambi tangwa limuwika lili ngwe kanunu ka miaka, ni kanunu ka miaka kali ngwe tangwa limuwika.

⁹ Amwe kaakunyonga ngwo, Zambi kanavumewa ku chilakenyo chize alakenyene. Alioze hi chocho ko. Zambi kakulihumikiza ni yenu mumu keshi kuzanga niumwe kutoka, alioze hanga eswe alumuke ku mbunge.

¹⁰ Alioze Tangwa lia Mwene mulikeza ngwe mwiji. Ha Tangwa lize lilu mulikatoka ni lundunjila, yuma yeswe ya lilu muyikashituka ni kahia, hashi ni yuma yeswe yiliho muyikatoka.

^11-12 Nyi yuma yino yeswe muyikahwa ngwe chino, ndako yika chanutamba kubwa nayo? Muze munushimbwila Tangwa lia Zambi, chanutamba kulikoleleza, hanga Tangwa lize mulikeza nikawashi. Ha Tangwa lize lilu mulikawema ni kahia ni yuma ya lilu muyikasangunuka.

¹³ Alioze Zambi hanalakenya lilu liaha ni hashi haha haze muhakabwa ululi. Yenayo tunashimbwila.

¹⁴ Kashika, akwetu shimbu nunashimbwila Tangwa lize, likolezenu hanga nubwe akwa ululi, kunushi kapalia, ku meso ja Zambi, ni hanga nubwe ni uhwimino nenyi.

¹⁵ Nyongenu uhomboloji wa Mwene Yesu. Wenawo uli ulamwino wenu, ngwe chize mukwetu Paulu aliangile kusoneka ni mana waze amuhele Zambi.

¹⁶ Yenayo asonekene mu mikanda yenyi yeswe muze anahanjika ha chikuma chino. Mu mikanda yenyi kumuli yuma yikwo yikalu ha kwivwa. Atu waze kaalilongesele ko ni keeshi kujikiza kaakuhengesa ha kuyilumbununa, ngwe chize akulinga yihanda yikwo ya Mukanda wa Zambi. Chenacho akulikokela kwonona cho ene.

¹⁷ Alioze yenu, akwetu, hinwanyingika kulu yuma yize. Kashika kanyamenu. Nyi ka, yitaganyanyi maanupiangula, mba munukokoloka.

¹⁸ Alioze nyongononenu ha kutatuka mu utu ni yinyingi ya Mwene wetu kanda Chilamwina chetu Yesu Kristu. Uhenya wenyi usoloke chize musono uno ndoo ku miaka yeswe! Chibwe kama Chenacho.