2 Korintu 9 - Mukanda Wa Zambi 1970

Yawana ya kuhana kuli akwa Kristu yiswale

¹ Ngunamono ngwe, kuchatambile kunusonekena hakutwala ku yawana yize tunatumina akwetu akwa Kristu a mu Yudea.

² Mumu ngunanyingika uwahililo wenu ha kukwasa. Kuli akwa Masedonia hingunanuchichimieka ngwami: “Akwetu a mu chifuchi cha Gresia, chize ku mwaka wa kunyima, haanalilulika ha kuhana yawana yo.” Mumu hali yenu, akwo anji nawa mukachi ko haanalikoleza.

³ Ngunanutumina akwetu wano hanga kuchichimieka chetu kanda chibwa chamokomoko, alioze ngunazange nululike ngwe chize nambile hatangu.

⁴ Nyi akwa Masedonia meeza hamwe ni yami, nawa nyi maamona ngwe kanda nulilulika, sonyi jinji mutukevwa, mumu twakunufuliela kuhiana. Hi yetu wika ko mutukevwa sonyi, alioze ni yenu nawa.

⁵ Kashika ngunakanyonga ngwami, chinalite kuhula akwetu wano, nyi maahasa kunuheta hatangu ha kululika chawana chize nwalakenyene kuhana. Chenacho chawana chize muchikabwa chakululika kulu muze hinaheta. Mba chikalumbunuke ngwo, nunachilingi ku zango lia yenwene, hi ku zango lia mutu mukwo ko.

⁶ Nyingikenu ngwenu, yoze matumba mbuto yikepe, makahela yikepe, yoze matumba yinji, makahela yinji.

⁷ Mutu mweswe akahane chize hanyonga kuhana, alioze hi ni chinyengo ko hanji mumu akwo kaanamushinjika. Mumu Zambi kakuzanga mutu yoze wakuhana ni uwahililo.

⁸ Zambi kanahase kunwaha yuma yakulumbama, hanga matangwa eswe munubwa ni yuma yakulumbama mumu hali yenwene ni yize yinazuku mu kuhana kuli atu akwo.

⁹ Ngwe chize hichinasonewa mu Mukanda wa Zambi: “Kakuhana yuma yakulumbama kuli yiswale. Utu wenyi kuwakulinduluka ku miaka yeswe.”

¹⁰ Zambi, yoze wakuhana mbuto kuli njimi ni mbolo ya kulia, makanwaha mbuto jeswe jize nuli najo chikala ni makajitatwisa, hanga nukabwe ni mihuko yinji ku kulambama cha kuhana chenu.

¹¹ Makanubichisa matangwa eswe ni yuma yinazuku hanga ni yenu nukabwe ni yuma yakulumbama ya kulianyina ni atu akwo. Chenacho atu anji maakasakwila Zambi mumu ha yawana yenu.

¹² Yawana yize munuhana muyikwasa akwa Kristu mu kuhona cho, ni atu anji maakasakwila Zambi ha chikuma chize.

¹³ Yawana yize muyikalweza chize nuli. Mba atu anji maakahalisa Zambi muze maakamona chize nwakwononokena Sango Jibema ja Kristu. Maakamuhalisa nawa ku chize nwakulianyina yawana yenu yakulumbama hamwe ni ayo ni akwo eswe.

¹⁴ Maakanulembela Zambi ni zango heswe, mumu Zambi hananulweze utu wenyi Wahiana.

¹⁵ Tusakwilenu Zambi mumu ha chawana chenyi chahiana!