2 Korintu 8 - Mukanda Wa Zambi 1970

Kuhana cha yawana

¹ Akwetu, tunazange nunyingike chize Zambi alwezele utu wenyi mu Yikungulwila ya mu chifuchi cha Masedonia.

² Akwa Yikungulwila yize, chibwe amwene lamba liahiana, chibwe abwile yiswale, hindu yaawahilila kuhiana mu kuhana yawana yinji.

³ Ngunashindakenya ngwami, yaahana yawana nikulita ni yize abwile nayo, ni mwene yaahianyisa kuhasa cho. Mu zango lio ene

⁴ yaatulembejeka kuhiana ha kwatayiza kuhana yawana ya kukwasa nayo akwa Kristu, yiswale, a mu chifuchi cha Yudea.

⁵ Kutwachinyongene ngwetu, maahasa kuhana mbongo jinji ngwe jize. Hatangu yaalihana kuli Mwene Yesu, mba ku upale wa Zambi, yaalihana nawa kuli yetu.

⁶ Kashika twaliumbile kuli Titu, yoze wabutwile milimo yino, ha kuyitwala kulutwe ni kunukwasa kumanununa uvumbiko uno wa zango.

⁷ Nuli pichi mu yuma yeswe: mu ufulielo, ni mu kuhanjika, ni mu yinyingi, ni mu zango lia kulinga milimo, nawa mu zango lienu kuli yetu. Kashika tunazange ngwetu, nuhane nawa yawana yinji mu uvumbiko uno.

⁸ Chachambile ngwe Shimbi, alioze ngunanulweze chize amwe atu abwile ni zango lia kukwasa, hanga ni yenu nulweze zango lienu lia umwenemwene.

⁹ Mumu nunanyingika utu wa Mwene wetu Yesu Kristu. Chibwe wabwile pichi, hindu yalumuka chiswale mumu hali yenu, hanga ku uswale wenyi nukabwe pichi.

¹⁰ Ngunanulweze manyonga jami ha yuma yino. Chinalite kumanununa milimo yenu yize nwabutwile mwaka wa kunyima. Yenu nwabwile atangu kulinga milimo yize, nawa yenu nwabwile atangu ni manyonga akuyilinga.

¹¹ Haliabwila likolezenu mu kumanununa milimo yino. Nwabwile ni nyonga libema lia kulinga milimo yino. Ni haliabwila bwenu nawa ni nyonga libema lia kuyimanununa, ngwe chize nunahase kuchilinga.

¹² Mumu, nyi mutu mazanga kuhana chawana, Zambi matayiza chawana chenyi nikulita ni chize ali nacho, hi nikulita ko ni chize keshi nacho.

^13-14 Chazangile numone lamba muze nunakwase atu akwo, alioze haliabwila nuli ni yuma yinji. Kashika chanutamba kukwasa waze keeshi nayo. Mba tangwa likwo, muze munukahona, ni ayo maakabwa ni yuma yinji, no maakahasa kunukwasa. Ha chino yenu eswe munukabwa chimuwika.

¹⁵ Ngwe chize hichinasonewa mu Mukanda wa Zambi ngwo: “Yoze wakungile yinji kabwile ko nayo kuhiana, ni yoze wakungile yikepe kahonene ko.”

Titu ni masepa jenyi

¹⁶ Tunasakwila Zambi yoze hanahane zango linji kuli Titu lia kunukwasa, ngwe yetu nawa tunazange kunukwasa.

¹⁷ Hanatayiza kulinga yize yeswe twamuhulile ni kulinga. Wabwile ni zango linji lia kunukwasa. Kashika iye mwene wabatwile hanga a nuhete.

¹⁸ Tunanutumina mukwetu umuwika hamwe ni Titu. Akwa Yikungulwila eswe kaakumuchichimieka ha chize akwambujola Sango Jibema.

¹⁹ Nawa akwa Yikungulwila haanamutongola hanga abwe ni kwendangana hamwe ni yetu muze mutuya ni kutambula yawana ha kuhalisa Mwene wetu Yesu ni kulweza nawa atu zango lietu lia kukwasa.

²⁰ Tunalingi ni mana eswe ngwetu, atu kanda atusuma mulonga ku milimo yino ya kutambula mbongo jino jinji ja yawana.

²¹ Kutwazangile kulinga yibema ku meso ja Mwene Yesu wika, alioze ku meso ja atu nawa.

²² Tunatumu mukwetu hamwe no. Hitunamweseka yisuho yinji, ni twamumona kakuwahilila ha kukwasa atu. Haliabwila kakuwahilila kuhiana ha kunukwasa, mumu kananufuliela.

²³ Hakutwala kuli Titu, kakulinga hamwe ni yami ha kunukwasa. Hakutwala kuli akwetu akwo, waze aneza hamwe nenyi, akwa Yikungulwila haanaatongola ni kwatuma, kaakuhalisa Kristu.

²⁴ Alwezenu ngwenu, nunaazange chamwenemwene, hanga akwa Yikungulwila eswe achinyingike pundu ngwo, chinalite kunuchichimieka, ngwe chize tunachilingi.